|
BULGUR
Materiales:
2 vazos de bulgur mundado
2 sevoyas
2 tomates
4 vazos de agua o de kaldo de karne o geyna
3 kucharas de azeyte
sal i pimienta a gusto
Preparasion: En un tendjere ondo meter las tres kucharas de azeyte kon las sevoyas kortadas minudo i friyir asta ke la sevoya toma una kolor transparente. Entonses adjustar el tomat sin kueros i sin pipitas i kortado minudo, i abafarlo. Adjustar la agua o kaldo de karne o de geyna, la sal i la pimienta i meter a buyir. Kuando buyo, echar adientro el bulgur mundado, bien enshaguado i eskurrido, i deshar kozer en lumbre moderada de kinze a vente minutos o asta ke se embeve toda la agua i kontinuar a kozer sovre lumbre flosha otros kinze minutos. Abashar del gaz, deshar repozar sinko o diez minutos i despues mesklarlo todo para ke no se apege i ke no se aga bultos. Servir kaente. |