|
BOYOS DE VIEJA
Materiales:
1 kilo de arina
3 vazos de agua
3 kucharas de limon o vinagre
3 kucharas de azeyte
1 paketo de margarina
a temperatura de kaza, no de frijider
1 kucharika no yena de sal
Preparasion: Mesklar todo el material sin la margarina, finyir bien bien asta obtener una masa suave i liza. Desharla repozar a lo menos kuatro oras i a lo mas ocho oras. Se puede azer la masa la noche i azer los boyos demanyana demprano. Despues ke la masa repozo, se aze panetes, sali 50-60 panetes. Se aresentan, uno al lado del otro, en un tifsin o otro resipiente polvoreado, kon arina, para ke los panetes no se apegen uno kon el otro. Kuando los panetes estan prontos, se toman uno a uno, se avrin kon la mano o kon flecha, de manera ke sean redondos komo la bokadura de un vazo. Sovre kada uno de eyos se unta un poko de margarina i de muevo se aresentan uno al lado del otro sin ke se apegen, i se meten al frijider. Ansi se kontinua asta ke se eskapa de avrir todos los panetes.
Entonses se empesa a azer los boyos. Se kita del frijider la primera partida de panetes, se mete enriva de la meza una kucharika de azeyte i se empesa a avrir los panetes kon delikateza, avagar avagar. La masa suave se avri bien asta ke deviene un kuadrado de serka de trenta santimetros de fila delgada. De muevo se mete una aregadika de azeyte sovre la fila, i entonses la fila es duvlada en tres i despues otra vez en tres de otra parte, de manera ke se resive un kuadrado de serka de diez sms. Se mete en medio el gomo, ke puede ser pazi, handrajo o kezo i guevo (sigun las rechetas para las burekitas), i se serra en reuniendo las kuatro puntas. Si se serra en reuniendo las dos puntas de manera a formar un triangulo se yaman ojaldres. Se aresenta en una tava, se arega de azeyte por enriva, se polvorea susam o kezo rayido, se mete en el orno fuerte kaentado de antes a 200° - 210° i se desha asta ke toman una kolor rosha eskura. |