boyo m.

לחמניה, עוגה מלוחה, מאפה עגול ממולא בגבינה או בשר; מצה בצורת פיתה

boyikos afrijaldados

מאפה מבצק עלים

boyo de azeite/polvo/asuka

לחמניות מסוגים שונים

boyo de semurá (ebr.)

מצה שמורה

un boyo en kayente/en azeite

לחמניה טריה/נוטפת שמן - באירוניה: מי שדורש הכל בלי זכות

BUREKITAS DE KEZO I GUEVO O DE HANDRAJO
Materiales:
Para el gomo regular:
1 guevo bateado
150 gramos de kashkaval rayido
50 gramos de kezo blanko fresko
Para el gomo "handrajo":
1 sevoya
1 berendjena grande
2 tomates
un poko de sal
Para la masa:
5 kupas de arina
1 kupa de azeyte
1 kupa de agua
1 kucharika de soda
un poko de sal
Preparasion: Asar la berendjena, lavarla debasho el chorro i desharla eskurrir diez minutos. Pikarla i adjustar la sevoya kortada minudo i frita, los tomates rayidos i la sal. Azer la masa para las burekitas en amasando bien todo los materiales, i desharla repozar por dos oras en el frijider. Despues avrir una fila de la kuala se korta redondikos kon una kupa i meter ensima de un lado, una kuchara del gomo i serrar por enriva kon la masa, dando la forma de medio sirkolo. Serrar los medios sirkolos, o sea las burekitas, en apretando los bodres entre dos dedos; untarlas de yema de guevo, i echar enriva de eyas un poko de susam, i meter al orno, kaentado de antes asta 200°. Es mijor de aprontar siempre dos gomos para obtener un plato mas variado.

BOYIKOS DE KASHKAVAL I
Materiales:
300 gramos de kashkaval rayido
(o de otro kezo amariyo komo gruyer)
1 kuchara de parmezan rayido
200 gramos de margarina
2 guevos
300 gramos de arina
una preza de pimienta
sal
Preparasion: Meter en un resipiente el guevo bateado, el kezo kashkaval i el parmezan rayidos, la margarina kortada en pedasos, la sal i la pimienta. Mesklar todo bien i echar la arina poko a poko, mesklando todo el tiempo asta ke se aze una masa. Meterla al frijider i desharla repozar a lo manko una ora. Despues de esto avrir kon la masa una fila de medio santimetro i kon un findjaniko de kafe kortar redondos, untarlos kon guevo bateado i mesklado kon un poko de azeyte, meter al orno kaentado a 200°, deshar unos vente minutos.

BOYIKOS DE KASHKAVAL II
Materiales:
350 gramos de arina
1/2 paketo de "Baking Powder"
150 gramos de margarina
200 gramos de kashkaval rayido
1 guevo
1 vazo de yogurt
Preparasion: Meter la arina en un resipiente, adjustar la margarina ablandada de antes i kortada en pedasikos chikos, ansi ke el kashkaval rayido (se desha unos 50 gramos a parte), el guevo i el yogurt. Mesklarlo todo bueno kon un piron asta ke se aze una masa. Esparzir un poko de arina sovre la laja o una tavla i avrir de la masa una fila de un sm. de espesura. Formar boyikos en kortandolos de la fila kon el bodre de una kupa. Esparzir ensima de los boyikos el resto del kashkaval rayido i meter al orno kaentado de antes a 200° por unos vente minutos o asta ke los boyikos se azen roshos.

BOYOS DE RAYO
Materiales:
1/2 paketo de margarina ablandada
1 vazo de kezo rayido, de preferensia kashkaval
2 guevos grandes bateados
1/2 pan seko
azeyte para untar la tava ke va al orno
un poko de sal
Preparasion: Mojar la miga ke fue kavakada del medio pan seko, esprimirla i dizminuzarla, mesklarla kon el resto del material i azer una masa liza. Tomar pedasos de la grandor de un guevo, amasar entre las dos manos, arodear, dar la forma de una balika i ahajarla entre las palmas de la mano en forma redonda. Kuando estan todos los boyos prontos, tomar uno por uno, meter enriva del rayo i apretar un poko para ke tome la forma de los burakos del rayo (de aki el nombre "boyos de rayo"). Untar una tava kon un poko de azeyte, aresentar en la tava, (si se dezea se puede untar por enriva guevo bateado i polvorear un poko de kashkaval rayido, ma no es ovligatorio), i meter al orno ke fue kaentado de antes a 180° - 200°. Los boyos estan prontos kuando toman una kolor rosha enriva i debasho. Se komen freskos kitados del orno.