berendjena f.

חציל

SALATA DE BERENDJENA A LA BULGARA (KIOPOLU)
Materiales:
1 tomat
2-3 berendjenas medianas
4 pimintones vedres o kolorados godros
4 kucharas de azeyte
1 kuchara de prishil pikado
1 pimintoniko fuerte o paprika fuerte (segun el gusto)
Preparasion: Asar las berendjenas en el gril o sovre el gaz de todas las partes, deshar ke se yelen un poko, meter kada una debasho del chorro de la fuente kon la agua fuerte i kitar kon delikateza las kashkas ansi ke las pipitas. Pikarlas muy minudo, adjustar las kuatro kucharas de azeyte, la sal, el prishil, el piminton fuerte i los kuatro pimintones muy bien pikados. Mesklar todo bien i deshar en el frijider una o dos oras afin ke las vedruras tomen la savor la una de la otra. Antes de servir rayer un tomat i mesklarlo kon la salata. (Si se mete el tomat kuando se apronta la salata, se agrea).

SALATA DE BERENDJENA A LA GREGA
Materiales:
2 berendjenas grandes
2 kucharas de vinagre o de sumo de limon
2 kucharas de azeyte de oliva
3-4 dientes de ajo machakado
prishil
azetunas pretas
sal a gusto
Preparasion: Asar las berendjenas, de preferensia sovre el gaz para ke tengan una savor de asado. Kuando se ablandan bien de todas las partes, mundar i enshaguar debasho el chorro de la fuente. Pikarlas bien, adjustar el vinagre o sumo de limon, el ajo, azeyte i sal i mesklar bien. Antes de servir esparzir por enriva prishil pikado i por garnitura unas kuantas azetunas pretas.

BERENDJENAS FRITAS KON YOGURT I
Materiales (6 - 8 porsiones):
3 berendjenas
4 dientes de ajo
2 vazikos de yogurt
sal
azeyte
Preparasion:Mundar i kortar la berendjena tajadas de 1 - 1,5 sms. de godrura, meter por enriva sal, deshar eskurrir las tajadas en un tefsin burakado serka de una ora, enshugarlas kon papel absorbiente. Friyirlas de las dos partes en azeyte muy kaente por unos kuantos minutos, asta ke toman una kolor rosha. Despues friyir por un segondo tres dientes de ajo pikado i esparzirlos sovre las tajadas de berendjena. Meterlo todo, para ke eskurra la azeyte, en un tefsin burakado o sovre un pedaso de papel absorbiente i despues aresentar las tajadas en un plato. Antes de komer mesklar el yogurt kon la sal i el resto del ajo pikado. Se sierve porsiones i por enriva de kada porsion se mete tres kucharas de yogurt kon ajo.

BERENDJENAS FRITAS KON YOGURT II
Materiales (4 - 6 porsiones):
2 berendjenas
2 vazikos de yogurt
2 dientes de ajo pikado o majado
sal
azeyte para friyir
Preparasion: Lavar las berendjenas sin kitar la kashka, kortarlas en tajadas de medio santimetro, meterlas en un tefsin burakado, echar por ensima sal i desharlas eskurrir una media ora. Despues esprimirlas bien, enshugarlas en una tevaja i friyirlas en la azeyte ke ya fue kaentado de antes. Meter las tajadas fritas sovre un plato i desharlas yelar un poko. Mesklar el yogurt kon el ajo i un poko de sal i echarlo sovre las berendjenas fritas. Servir imediatamente.

TRUSHI DE BERENDJENA
Materiales (6 porsiones):
20 berendjenas chikas
1 kol
2 masos de ojas de apio
3 pimintones kolorados
5 dientes de ajo
1 litro de vinagre
3 kucharikas de sal
una preza de asukar
Preparasion: Eskojer las berendjenas ke sean chikas, porke kuanto mas chikas son mijores. Kitar las ojikas ma deshar el paliko. Lavarlas bien i meterlas en un grande resipiente yeno de agua buyendo; desharlas kozer asta ke se ablandan. Kitarlas de la agua kon una kuchara burakada i meterlas a eskurrir. Para ke salga toda la agua se puede meter sovre las berendjenas un pezgo i deshar un poko de tiempo. Entremientres aprontar el gomo del trushi: kortar todas las vedruras minudo, echar una kucharika de sal i todo en mesklando finyir bien las vedruras i adjustar el ajo majado o pikado. Avrir kada berendjena de en medio a la larga, inchir kon este gomo i atarla kon un ilo godro, sin muncho apretar, para ke el gomo kede adientro de la berendjena. Aresentarlas en un bokal kon bokadura ancha. En un otro resipiente mesklar bien el vinagre kon agua (la kantidad del likido deve abastar a kuvrir las berendjenas), adjustar dos kucharas de sal i un preza de asukar. Echar esta meskla sovre las berendjenas i serrar el bokal de manera ermetika. Desharlo una semana sin avrir.

ALBURNIYA
Materiales (4 porsiones):
2 berendjenas
100 gramos de tomatada
1 kupa de agua
1/2 kupa de kaldo de geyna o de karne
4 porsiones de geyna o de karne kocha
sal i pimienta a gusto
Preparasion: Las berendjenas se mundan i se kortan tajadas no muy delgadas, se mete ensima un poko de sal i se deshan una ora para ke eskurran la agua i no traven muncha azeyte al friyir. Se friyen las tajadas un poko, de las dos partes, se aresentan en un paylon; se adjusta una salsa echa kon los sien gramos de tomatada, la agua, el kaldo de geyna o de karne i la sal. Despues se meten las porsiones de geyna o de karne en la salsa kon las tajadas de berendjena i se desha kozer de kinze a vente minutos.

BERENDJENAS AOGADAS
Materiales (6 - 8 porsiones):
2 berendjenas medianas
1/2 vazo de garvansos
2 sevoyas
4 tomates
2 kucharikas de polvo de supa de geyna o de karne
1/4 de vazo de azeyte
karne kocha (si se kere)
sal i pimienta a gusto
Preparasion: Friyir la sevoya kortada minudo asta ke toma una kolor rosha. De otra parte, meter a gizar los garvansos asta ke se ablandan. Los garvansos ya fueron metidos de la noche anterior en mojo. Despues meter el tomat sin el kuero i sin las pipitas en una oya asta ke se abafa (si se kere se puede meter tomat en konserva). Enshaguar i mundar las berendjenas de tal manera ke kede un sm. de kashka i un sm. mundado, para ke la berendjena no se despape. Despues kortarlas en pedasos kuadrados de dos sms., adjustarlas al tomat abafado djuntos kon el garvanso kocho, sal, pimienta, el polvo de supa i la karne kocha. Meter todo a gizar asta ke se apura.

BERENDJENA REYNADA (Karni Yarik)
Materiales (6 porsiones):
6 berendjenas largas
2 sevoyas
4 tomates
250 gramos de karne mulida
1 kuchara de prishil pikado
sal i pimienta a gusto
Preparasion: Kortar la kavesa de las berendjenas, mundarlas en deshando ariva i abasho dos sms. de kashka para ke no se avran. Enshaguarlas i eskurrir bien la agua. Avrir las berendjenas de en medio, kavakar kon delikateza la una metad solo, en forma de barka. Friyirlas en azeyte kaente asta ke toman una kolor rosha klara. Friyir un poko la sevoya kon la karne mulida. Kitar el kuero de tres tomates, kortarlos no muy minudo i adjustar a la karne. Kuando ya se ablando el tomat, kitar de la lumbre, adjustar el prishil, la sal i la pimienta i mesklar bueno. Inchir kon el gomo las partes de las berendjenas ke fueron kavakadas, aresentarlas en un paylon, en lo ke la parte inchida de gomo esta para abasho. Meter enriva de kada berendjena una tajada de tomat, kuvrirlas kon agua, adjustar una aregada de azeyte i un poko de sal i gizarlas en orno kaentado a 150° o sovre lumbre suave unos 30-40 minutos o asta ke la salsa se apura.

BOKADIKOS DE BERENDJENA
Materiales (4 - 6 porsiones):
2 berendjenas (800 gramos a 1 kilo)
10 dientes de ajo
2 tomates grandes
2 kucharas de azeyte
1 kuchara de polvo de supa de geyna
1 kuchara de tomatada
1 vazo de agua
piminton fuerte (si se kere)
sal a gusto
Preparasion: En un resipiente ondo meter dos kucharas de azeyte i sufriyir el ajo. Kuando se izo un poko rosho, adjustar la tomatada i los tomates rayidos, deshar friyir un poko. Adjustar las berendjenas despues ke fueron preparadas de la manera sigiente: kitar los palikos i las ojas vedres a su deredor, mundarlas en kitando dos sms. de la kashka i deshando otros dos. Despues kortarlas en bokadikos, kubos de tres a kuatro sms. kada uno, i meterlos en la salsa de tomat. Kuando ya fueron metidos los bokadikos de berendjena, adjustar la sal, el piminton si se kere, i un vazo de agua, mesklar bien i deshar gizar avagar en lumbre basha. Sinko minutos antes de abashar de la lumbre, dezazer el polvo de supa de geyna en medio vazo de agua i adjustar a la komida.

IMAM BAYILDI
Materiales (4 porsiones):
1/2 kilo de berendjenas grandes
200 gramos de karne mulida
1/2 kilo de tomat
1 sevoya
1 kuchara de prishil pikado
1-2 pimintones fuertes o dulses, a gusto
1 kuchara yena de tomatada
sal i pimienta a gusto, azeyte para friyir
Preparasion: Mundar, enshaguar i kortar las berendjenas en tajadas de 1.5 sms. Fiyirlas un poko i estando ainda kaentes ahajar en medio de kada tajada kon un piron i azer komo un foyo chiko para poder aresentar el gomo. Entremientres meter la sevoya kortada minudo a abafar en lumbre mediana, adjustar la karne mulida i mesklar de vez en kuando kon un piron para ke no keden bultos. Kuando se sufriyo la karne, adjustar el piminton kortado minudo, el prishil pikado, el tomat sin kueros i sin pipitas i pikado, sal i pimienta. Es menester de meter de un lado un tomat entero ke sera uzado mas tadre. Gizar todo i abashar de la lumbre. Entonses kon una kuchara meter del gomo en medio de kada tajada i aresentarlas una al lado de la otra en un paylon. El tomat ke fue metido de un lado se korta tajadas i se mete enriva del gomo. Dezazer la tomatada en una vazo de agua i echar por enriva, adjustar un poko de sal i kuvrir de agua. Meter a gizar sovre lumbre flosha avagar avagar asta ke se arefina. Antes de servir se puede meter al orno por una media ora.

KEBAP DE BERENDJENA
Materiales (6 - 8 porsiones):
1 kilo de berendjenas
1/2 kilo de karne
1/2 maso de prishil pikado
3-4 pimintones, fuertes o dulses
1/2 kilo de tomat
1 kuchara de tomatada
azeyte para friyir
Preparasion: Mundar i enshaguar las berendjenas, kortarlas en pedaso de tres sms. de anchura i kuatro sms. de largura. Friyirlas un poko de todas las partes i meterlas enriva de un papel absorbiente para ke trave la azeyte. Kortar la karne tambien en pedasos de 3 x 3 sms i sufriyirla. Kuando la karne esta bastante blanda, mesklar kon la berendjena frita i adjustar la sostansia ke solto la karne. Aresentar todo esto en un paylon i meter enriva tajadas de piminton, el prishil pikado, el tomat kortado revanadas, sal i pimienta i la tomatada dezecha en agua. Kuvrir de agua lo ke esta en el paylon, i gizar sovre lumbre muy flosha asta ke se apura bueno.

KEFTES DE KARNE I BERENDJENA ASADA
Materiales (2 - 4 porsiones):
250 gramos de karne mulida
1 vazo de puree de berendjena
1 sevoya mediana
2 guevos bateados
1 revanada de pan moreno o
arina de matsa, segun el menester
2 kucharas yenas de prishil pikado
azeyte para friyir
sal i pimienta a gusto
Preparasion: Mesklar bien la berendjena asada i echa puree, la karne mulida i la sevoya pikada bien minudo. Si ay likido soltado por la berendjena en demazia, se kita kon una kuchara o se vazya. Despues adjustar los guevos bateados, el prishil pikado i la revanada de pan moreno mojado, esprimido bien bien i dizminuzado o arina de matsa, segun el menester. Mesklar todo el material bien bien asta obtener una masa kondensada, solida. Preparar keftes chikas i friyir en azeyte muy kaente para ke se aferren. Se kome kaente komo "hors d'oeuvre" o primer plato. Si se kere ofreser komo komida, akompanyada de arroz, fideos o makaron, se gizan kon kaldo de tomat i el sumo de medio limon.

KOPETIKAS DE KARNE KON PUREE DE BERENDJENA
Materiales (6 - 7 porsiones):
Para la puree de berendjena:
3 berendjenas medianas
3 kucharas de azeyte
3-4 dientes de ajo
una preza de asukar
sal a gusto
Para las kopetikas:
1/2 kilo de karne mulida
1 revanada de pan moreno seko
1 kuchara de prishil pikado
1 guevo bateado
sal i pimienta preta a gusto
Preparasion: Asar las berendjenas bien de todas las partes i mundarlas debasho del chorro de la fuente kon agua yelada. Meterlas a eskurrir bien bien, despues pikarlas kon un kuchiyo. En una kacharola kaentar la azeyte, meter los dientes de ajo machakados ke se friygan un poko; adjustar la berendjena pikada, la sal i la preza de asukar. Mesklar bien i meter a gizar por media ora en lumbre flosha. De otra parte, mesklar en otra kacharola el pan dizminuzado, ke antes fue metido en mojo y bien esprimido, kon la karne, la sal, la pimienta preta i el prishil. Amasar bien asta ke todos los materiales se mesklan el uno kon el otro i despues kon manos un poko mojadas azer kopetikas chikas, de la grandor de una muez. Meterlas adientro de la puree de berendjena, tapar la kacharola i gizar en lumbre flosha. Despues de media ora gostar, si falta algo adjustarlo. Meter al orno por otros kinze minutos. Se kome kaente.

PRINSESAS
Materiales (6 porsiones):
6 berendjenas redondas
Para el gomo:
1/2 kilo de karne mulida
2 sevoyas grandes
1 tomat rayido
2 kucharas de azeyte
1 kuchara de polvo de geyna o kaldo de geyna
2 kucharas de prishil o anito o ojas de apio pikado
sal i pimienta a gusto
Para la salsa:
200 gramos de tomatada
2 vazos de agua
1 kucharika de polvo de supa de geyna
1/2 limon
sal i pimienta a gusto
Preparasion: Para preparar el gomo, alimpiar, enshaguar i kortar minudo las sevoyas. Meterlas en una sarten de teflon, sin azeyte, mesklarlas todo el tiempo para ke no se kemen, asta ke se abafan. Adjustar las dos kucharas de azeyte i friyir un poko la sevoya, despues kitar de la lumbre. Adjustar el tomat rayido, la sal i la pimienta, una kuchara de polvo de supa de geyna, una kuchara de prishil kortado minudo (o anito o ojas de apio pikado) i el medio kilo de karne mulida. Mesklar bueno.
De otra parte, mundar las berendjenas, kortarlas en dos, a la larga, kavakarlas i kitar todo lo de adientro, enshaguarlas i inchirlas kon el gomo. Friyirlas de todas las partes i aresentarlas en un paylon. Aprontar la salsa en metiendo a buyir los 200 gramos de tomatada kon los dos vazos de agua, el sumo del medio limon, la sal i la pimienta i una kucharika de polvo de supa de geyna. Kuando la salsa esta pronta, kitarla de la lumbre i vaziarla enriva de las berendjenas, tapar bien i meter en orno kaente. Kuando se empesa a goler el guezmo de la komida, abashar la temperatura del orno, kitar el tapon i deshar en el orno asta ke se forma enriva una tela i ke la salsa se apura, entonses kitar del orno i servir kaente.

REVANADAS DE BERENDJENA FRITAS
Materiales:
3-4 berendjenas
2 guevos
arina
sal
azeyte para friyir
Preparasion: Kortar las berendjenas en revanadas, echarles ensima un poko de sal, untar en la arina i despues en el guevo bateado i friyir en azeyte bien kaente. Aboltarlas kon un piron para ke se friygan de todas las partes. Se sierven kaentes akompanyadas kon karne al orno.

ENCHUSA DE BERENDJENA
Materiales (6 - 8 porsiones):
Para la masa:
1 vazo de azeyte
1/2 vazo de agua
3 vazos de arina
1 guevo
1 punyado de kezo rayido
Para el gomo:
3 berendjenas
2 kucharas de azeyte
100 gramos de kezo blanko
1 guevo
100 gramos de kashkaval rayido
Preparasion: Asar bien las berendjenas sovre la flama del gaz, aboltandolas para ke esten bien asadas de todas las partes. Enshaguarlas kon agua yelada debasho de la fuente, mundar la kashka i desharlas eskurrir para ke salga toda la agua. Despues pikar las berendjenas sovre una tavla, meterlas en una kacharola kon las dos kucharas de azeyte, el kezo blanko dizminuzado, el guevo i los sien gramos de kashkaval rayido i mesklarlo todo bien.
En un otro atuendo meter un vazo de azeyte i medio de agua, meter a kaentar sovre la lumbre meneando kon un piron para ke la azeyte se meskle kon la agua. Kuando ya esta bien kaente, kitar de la lumbre, echar adientro poko a poko los tres vazos de arina, meneando todo el tiempo para ke se meskle bien, adjustar un guevo i un punyado de kezo rayido i amasar bien. La masa deve estar blanda. Si esta dura se puede adjustar un poko de agua i si a la kontra esta muy blanda se adjusta un poko de arina. Kuando la masa esta pronta despartir en dos, polvorear la meza kon un poko de arina i kon la flecha avrir dos filas delgadas. Untar un paylon kon azeyte, meter adientro una de las dos filas i kon las manos apegar los bodres para ke tome la forma del paylon. Meter ensima el gomo de berendjena, tapar kon la otra fila i de muevo apegar la masa para ke este todo bien tapado. Meter al orno ke ya fue kaentado bien de antes, abashar la temperatura a 180° o 200° i deshar kozer una ora.

ESFUNGATU SUNGATU DE BERENDJENA
(ALMODROTE AL UZO DE YUGOSLAVIA)
Materiales (6 - 8 porsiones):
3-4 berendjenas non grandes
1/2 vazo de azeyte
100 gramos de kezo rayido
2 guevos
1 revanada de pan sin krosta
un poko de sal
Preparasion: Asar las berendjenas sovre la flama del gaz, enshaguarlas, mundarlas, eskurrirlas bien i pikarlas sovre una tavla. Meterlas en un resipiente grande djuntos kon el medio vazo de azeyte, el kezo, los guevos bateados, la sal i la miga de pan mojada, bien esprimida i dizminuzada, i mesklarlo todo bien. Untar un paylon de azeyte, meterlo a kaentar. Kuando ya esta la azeyte kaente echar adientro el kontenido del resipiente, meterlo al orno ke ya fue kaentado de antes, abashar la temperatura a 180° - 200° i kozer media ora. Kuando esta pronto, se korta en pedasos i se sierve kon guevos haminados.

KEZADIKAS DE BERENDJENA
Materiales:
Para la masa:
2 vazos de az
1 vazo de agua eyte
3 vazos de arina (aproksimadamente)
1 kucharika yena de sal
Para el gomo:
2 berendjenas grandes
1 guevo
5-6 kucharas yenas de kashkaval rayido
100 gramos de kezo blanko
Preparasion de la masa: Meter la arina en una chanaka, azer en medio un foyo i adjustar la azeyte, agua i sal. Mesklar todo asta ke se obtiene una masa liza. Si esta muy blanda se adjusta mas arina (la kantidad depende de la kalidad de la arina). Despues ke la masa ya esta pronta, se toman balikas de la grandor de un guevo i kon las manos, se les da la forma de un vaziko. Kuando todos los "vazikos" ya estan prontos se meten uno al lado del otro en una tava de orno i se meten al frijider.
Preparasion del gomo: Asar las berendjenas sovre el gaz. Mundarlas i enshaguarlas bien kon agua yelada i desharlas eskurrir. Despues pikar bien las berendjenas, adjustar el guevo, los kezos i la sal i mesklarlo todo. Kitar las kezadikas del frijider, inchirlas kon el gomo, meter sovre kada kezadika un poko de kashkaval rayido i kozer en orno kaentado de antes a 180° - 200°, asta ke las kezadikas toman una kolor rosha klara i ke la berendjena ya esta seka. El refran dize "koza de masa, en kaente". Estas kezadikas tambien son muncho mas savrozas si ke komen freskas.