|
BAKLAVA
Materiales:
750 gramos (30 ojas) de fila
400 gramos de muez machakada no muy minudo
1/3 vazo de azeyte
1 kucharika de kanela
Para el sirop:
2 vazos de asukar
1 vazo de agua
1/2 limon
Preparasion: Untar kon azeyte un pyrex de 35 x 22 sms. de dimension. Meter unas kinze ojas de fila, una enriva de la otra untando azeyte entre kada dos o tres kates (siendo ke las dimensiones de las filas son un poko mas grandes ke el pyrex se deven duvlar de manera ke se adjusten a sus dimension). Despues ke ya fueron metidas todas las kinze filas, echar enriva la muez machakada ke fue mesklada kon la kanela. Kon una kuchara esparzirla bien sovre la fila afin ke kuvra toda la superfisia. Tapar kon las otras kinze filas sigun lo fue echo de antes. Untar enriva un poko de azeyte i azer kortes sovre la baklava en forma de rektangulos o lozanjes, ma sin kortar asta el fondo.
Meterla en orno ke ya fue kaentado de antes a 200° i kozer unos 35-40 minutos o asta ke la baklava toma una kolor rosha.
Entremientres aprontar el sirop kon los dos vazos de asukar i la agua. Buyirlo todo meneyando kon una kuchara de tavla asta ke la asukar se dezaze. Despues ke buyo desharlo kozer otros dos o tres minutos, adjustar el sumo del medio limon, abashar de la lumbre i desharlo yelar. Vaziar el sirop yelado sovre la baklava kaente, kortar los kuartos asta el fondo i deshar yelar. Si se kere se puede servir kon krema freska. |