yaprak (t.)

עלים/עלי גפן ממולאים

yaprakitos (t.) de parra

עלי גפן ממולאים

AVIKAS KON YAPRAKES
Materiales (6 - 8 porsiones):
24 ojas de parra
300 gramos de karne mulida
1 kuchara de tomatada
2 vazos de avikas
azeyte para friyir
sal i pimienta a gusto
Preparasion: Enshaguar las ojas de parra. Si son ojas freskas ay ke meterlas por dos minutos en agua buyendo para ke se ablanden un poko. Si son konservadas en salamura ay ke enshaguarlas bien para kitarles la sal o desharlas en mojo una ora o dos. Despues inchir las ojas kon karne mulida mesklada kon sal i pimienta, dandoles la forma de sigaro (para mijor saver komo azer los yaprakes, ver en la recheta "Yaprakes de karne"). Friyirlas un poko i meterlas de una parte. Las avikas mundadas ay ke meterlas en mojo una noche entera. Si no se izo esto, meterlas a eskaldar kon media kucharika de soda de bever, asta ke se ablandan un poko, entonses vaziar esta agua i enshaguar las avikas kon agua kaente. Despues meterlas en un resipiente ondo, adjustar la tomatada dezecha en un vazo de agua, kuvijar las avikas kon agua, adjustar la sal i la pimienta ansi ke la azeyte kon la kuala fueron fritos los yaprakes, echar por enriva los yaprakes fritos i meter a gizar asta ke las avikas se ablandan bien bien. Si ay menester, se puede adjustar un poko de agua kaente de vez en kuando, para ke el kaldo no se apure demazia.

YAPRAKES DE KARNE
Materiales (8 - 10 porsiones):
500 gramos de karne mulida
300 gramos de ojas de parra
2 sevoyas mundadas
3 kucharas de arroz mundado
1 kuchara de azeyte
1 kuchara de prishil pikado
2 kucharas de tomatada
2 limones
sal i pimienta a gusto
Preparasion: Mesklar bien la karne mulida, las sevoyas pikadas, el arroz, el azeyte, el prishil, la sal i la pimienta (el ken le gusta puede adjustar tambien unos kuantos dientes de ajo machakado). De otra parte, alimpiar las ojas de parra (kitar las suzyas i burakadas) i meterlas a buyir muy poko en agua kon la sal i el sumo de un limon. Kitar las ojas de la agua, enshaguarlas i eskurrirlas bien. Despues tomar kada oja por la parte mat, meter adientro el gomo, duvlar los dos lados i arodear de abasho para ariva, dandole la forma de un sigaro. Aresentar los yaprakes en un paylon, uno al lado del otro i kuvrirlos kon unas kuantas ojas de parra. Aprontar una salsa kon dos kucharas de tomatada dezecha en un poko de agua, el sumo de un limon i una kuchara de azeyte, adjustar la sal i echar todo sovre los yaprakes. Adjustar mas agua i kuvrir los yaprakes. Meterlos a gizar en lumbre fuerte por kinze minutos i kontinuar a gizarlos sovre fuego moderado asta ke se embeve toda la agua.

YAPRAKES DE PAZI
Materiales (6 - 8 personas):
1 kilo de pazi
2 vazos de agua
1/2 vazo de azeyte
1/2 kilo de karne mulida
1/2 vazo de arroz
1/2 vazo de prishil pikado
1 limon
sal i pimienta a gusto
1/2 vazo de arroz
1/2 vazo de prishil pikado
1 limon
sal i pimienta a gusto
Preparasion: Kitar los ravos del pazi, enshaguar kon muncho kudio las ojas ke no se buraken, despues desharlas en agua kaente uno o dos minutos para ablandarlas, eskurrirlas i kitar kon delikateza los tronchos godros de en medio. De otra parte, mesklar bien el arroz mundado i enshaguado, el prishil, la karne mulida, la sal i pimienta. Meter las ojas duvladas (la parte briyando para afuera) enriva la tavla de gizar, tomar un poko del gomo, meterlo en la punta de la oja i duvlar. Duvlar tambien un sm. de kada parte i arrodear bien serrado. Aresentar los yaprakes en un paylon o kasuela uno al lado del otro, echar por enriva la azeyte, el sumo del limon, la agua i la sal, tapar i deshar kozer 25-30 minutos o asta ke el arroz se ablanda. Si se kere se puede adjustar, antes de abashar de la lumbre, un guevo bateado ke da mas savor a la komida.