|
TRUSHI DE BERENDJENA
Materiales (6 porsiones):
20 berendjenas chikas
1 kol
2 masos de ojas de apio
3 pimintones kolorados
5 dientes de ajo
1 litro de vinagre
3 kucharikas de sal
una preza de asukar
Preparasion: Eskojer las berendjenas ke sean chikas, porke kuanto mas chikas son mijores. Kitar las ojikas ma deshar el paliko. Lavarlas bien i meterlas en un grande resipiente yeno de agua buyendo; desharlas kozer asta ke se ablandan. Kitarlas de la agua kon una kuchara burakada i meterlas a eskurrir. Para ke salga toda la agua se puede meter sovre las berendjenas un pezgo i deshar un poko de tiempo. Entremientres aprontar el gomo del trushi: kortar todas las vedruras minudo, echar una kucharika de sal i todo en mesklando finyir bien las vedruras i adjustar el ajo majado o pikado. Avrir kada berendjena de en medio a la larga, inchir kon este gomo i atarla kon un ilo godro, sin muncho apretar, para ke el gomo kede adientro de la berendjena. Aresentarlas en un bokal kon bokadura ancha. En un otro resipiente mesklar bien el vinagre kon agua (la kantidad del likido deve abastar a kuvrir las berendjenas), adjustar dos kucharas de sal i un preza de asukar. Echar esta meskla sovre las berendjenas i serrar el bokal de manera ermetika. Desharlo una semana sin avrir.
|