|
TRAVADOS
Materiales:
Para la masa:
1 vazo de azeyte
1/2 vazo de agua tivia
1 kucharika yena de kanela
1 kuchara yena de asukar pudra
350 gramos de arina
Para el gomo:
100 gramos de muez mulida no muy delgada o
100 gramos de fistoki tostado un poko i mulido
2 kucharas de asukar pudra no yenas
2 kucharikas de kanela
1 punyado de susam tostado
Para el sirop:
2 kucharas de miel
1 vazo de asukar
1/2 vazo de agua
1 kuchara de sumo de limon
Preparasion: Mesklar en primero la agua i la azeyte, adjustar avagar avagar una parte de la arina, amasar un poko, adjustar la kanela i asukar i avagar avagar, el resto de la arina. Finyir bien asta ke se obtiene una masa liza i suave, no dura, deshar repozar media ora. Despartir la masa en trenta panetes, finyirlos bien en la palma de la mano i avrir kon flecha o kon la mano, asta ke yegen a tener un diametro de ocho sms. Inchirlos kon una kucharika del gomo ke fue bien mesklado, i serrarlos en apegando los bodres i dandoles la forma de media luna. Meterlos en un tifsin i enfornarlo en ornoke fue kaentado de antes a 210°. Los travados estan prontos kuando toman una kolor rosha eskura.
De otra parte, meter en una kacharola el material del sirop, mesklar bien la asukar kon la agua para ke no se apege en el fondo de la kacharola, meterla a la lumbre; kuando buyo, meter adientro los travados, kuatro o sinko en una vez, darles un buyor i kitarlos kon kuchara burakada. Meter otros kuatro o sinko, ansi asta ke todos se empapan de sirop. Antes de servir, se meten de muevo adientro del sirop ke kedo i ke se puede konservar en una bocha.
|