tomat m.

עגבניה

SALATA DE TOMAT
Materiales:
2-3 tomates grandes
2-3 sevoyas freskas
2 kucharas de prishil pikado
1 kuchara de sumo de limon
3 kucharas de azeyte de oliva
sal i pimienta a gusto
Preparasion: En una chanaka mesklar los tomates kortados pedasikos, la sevoya kortada minudo i el prishil pikado i echar por enriva el sumo del limon, la azeyte de oliva, sal i pimienta. Mesklar todo bien, deshar repozar diez o kinze minutos, para ke todos los materiales tomen la savor el uno del otro i entonses la salata esta pronta para komer.

SUPA DE TOMAT I ARROZ
Materiales (6 - 8 porsiones):
1 vazo de arroz
8 vazos de agua
3 tomates rayidos o
2-3 kucharas de tomatada
unos kuantos guesos de karne
sumo de limon
sal i pimienta a gusto
Preparasion: Meter a buyir los guesos asta ke se koze la karne en sus entorno. Kitar la eskuma kon una kuchara, adjustar el arroz bien alimpiado i enshaguado, el tomat rayido o la tomatada, deshar kozer vente minutos, adjustar la sal i la pimienta. Kuando se sierve, se adjusta sumo de limon a gusto.

KULUPIDIA FRITA KON KALDO DE TOMAT
Materiales (4 porsiones):
1 kulupidia de un kilo
2 guevos
1 kuchara de arina
200 gramos de tomatada
2 vazos de agua
1 kucharika de polvo de geyna (si se kere)
1/2 kucharika de sal
1 limon
azeyte para friyir
Preparasion: Apartar la kulupidia rozas rozas. Meter un resipiente kon agua i sal a la lumbre, kuando buyo la agua, echar adientro la kulupidia i desharla kozer asta ke se ablande un poko. Abasharla de la lumbre, enshaguarla kon agua yelada i meterla a eskurrir. Untar kada pedaso en la arina i despues en el guevo, friyirlos de todas las partes i aresentarlos en un paylon. Aprontar una salsa kon la tomatada dezecha en dos vazos de agua, adjustar la sal i la pimienta, el polvo de supa de geyna i el sumo de limon. Echarlo todo sovre la kulupidia frita i meterlo a gizar sovre lumbre flosha 30-40 minutos. Si se kere, se puede gizar al orno tambien.

ARMIKO DE TOMAT
Materiales (4 porsiones):
3 sevoyas
1 kilo de tomates
1/2 maso de prishil pikado
4 kucharas de azeyte
1 kucharika de sal no muy yena
1/2 kucharika de asukar
2 kucharas de arroz
azeyte para friyir sevoya
Preparasion: Mundar las sevoyas, lavarlas i kortarlas en kubos chikos, al tanto ke se puede. Kaentar la azeyte en una sarten i friyir las sevoyas asta ke toman una kolor rosha i se azen transparentes. Kitarlas de la lumbre. Mundar los tomates (para kitar el kuero de los tomates fasilmente basta de meterlos adientro de agua kaente por unos kuantos minutos), kortarlos en kubos i meterlos en una oya, adjustar la sevoya frita, las kuatro kucharas de azeyte, sal i asukar. Kuvrir de agua i meter a kozer en lumbre flosha. Kuando los tomates ya estan kaje kochos, adjustar el arroz ke ya fue alimpiado i lavado de antes, adjustar un poko mas de agua i deshar kozer asta ke el arroz se ablanda i ke la komida no keda muy kalduda. El armiko de tomat deve ser bien apurado. Se kome tivio o yelado. Antes de servir, echar por enriva el prishil pikado.

KEFTES DE PRASA KON KARNE I KALDO DE TOMAT
Materiales (6 - 8 porsiones):
1/2 kilo de karne mulida
1 kilo de prasa
2 revanadas de pan moreno o
2 patatas kochas, echas puree
2-3 guevos
100 gramos de tomatada.
1 limon
sal i pimienta a gusto
azeyte para friyir
Preparasion: De mizmo ke la presedente recheta solo ke despues ke se friyen las keftes, se aresentan en un paylon. Se dezaze sien gramos de tomatada en un vazo i medio de agua, kon el sumo del limon i sal a gusto i se adjusta todo a las keftes i se desha gizar despues ke buyo unos diez minutos, asta ke el kaldo se aze un poko mas espeso.

TOMATES REYNADOS
Materiales (4 - 6 personas):
1 kilo de tomates, bien duros
250 gramos de karne mulida
1/2 vazo de arroz enshaguado i eskurrido
2 guevos bateados
1 kucharika de azeyte
1/2 vazo de prishil kortado minudo
sal i pimienta a gusto
azeyte para friyir
1 plato de arina
Para la salsa:
2 kucharas de azeyte
2 kucharikas de tomatada dezecha en un vazo de agua
una preza de asukar
sal, si se kere
Preparasion: Lavar los tomates, kortarlos en dos a la ancha, kitar las pipitas i la parte dura de en medio. Aprontar el gomo en mesklando bien el resto de los materiales. Inchir los tomates en apretando el gomo kon el dedo. Friyirlos bien despues de averlos untado en la arina i el guevo. Aresentarlos en un paylon, echar por ensima la azeyte de la fritura kolada, el kaldo de tomat kon la sal i la asukar, tapar i deshar kozer en lumbre suave unos 40 minutos. Se kome kaente.

GUEVOS KON TOMAT
Materiales (6 porsiones):
1/2 kilo de tomates
2 kucharas de azeyte
6 guevos
sal a gusto
Preparasion: Meter el tomat sin el kuero i sin las pipitas, kortado minudo en un paylon onde pueden entrar sesh guevos, adjustar azeyte i sal, tapar i kozer en ahajando de vez en kuando el tomat. Kuando el tomat ya se kozio bien (si no esta bastante kaldudo se puede adjustar un poko de agua) se avrin por enriva los guevos, a una sierta distansia el uno del otro. Si se dezea ke la yema kede kalduda no se tapa el paylon, ma si se kere ke la yema sea haminada, entonses se tapa. Ay ke meter un poko de sal enriva de kada guevo. Se kome kaente.

FRITADA DE TOMAT KON PRISHIL I PIMIENTA
Materiales (4 - 6 porsiones):
1 kilo de tomat
4 guevos bateados
2 kucharas de prishil pikado minudo
2 dos revanadas de pan
sal i pimienta a gusto
Preparasion: Enshaguar el tomat, kitarle el kuero i kortarlo minudo. En un resipiente meter los guevos bateados, el prishil, la sal i pimienta i la miga del pan mojada, esprimida i dizminuzada. Mesklar bien, adjustar el tomat ke fue esprimido un poko para kitarle el kaldo. Kuvrir el fondo de un paylon kon bastante azeyte, kaentar bueno i echar adientro la fritada. Aresentar kon una kuchara para ke este igual de todas las partes. Meter a orno ke fue kaentado de antes a 180° - 210°, i kozer 45 minutos. La fritada esta pronta kuando toma una kolor rosha i sus bodres se despegan del paylon.

ARROZ KON KALDO DE TOMAT
Materiales (4 porsiones):
2 vazos de arroz
4 vazos de agua i
1 kuchara de tomatada, o
2 vazos de sumo de tomat i
2 vazos de agua
6 kucharas de azeyte
sal a gusto
Preparasion: Mundar el arroz i meterlo a lo menos media ora en agua kaente. De otra parte, meter todos los materiales, salvo el arroz, a buyir sovre lumbre fuerte. Entremientres enshaguar el arroz bien i eskurrirlo. Kuando buyo la agua kon los ingredientes echar adientro el arroz, tapar el resipiente i deshar buyir kuatro o sinko minutos, abashar la lumbre i deshar kozer asta ke se trava la agua. Entonses azer la lumbre ainda mas flosha i deshar kozer otros diez minutos i abashar del fuego. Si el arroz salio blando se puede meter entre el tapon i el resipiente un panyal limpio para ke se absorban las gotas ke se kondensaron del vapor de agua i ke kaendo adientro del arroz podrian kavzar ke se ablande ainda mas. Deshar repozar 30-40 minutos, aboltar en un paylon i mesklar para ke no se aga masa, despues de lo kualo se retorna a su resipiente.