supa f.

מרק

supa de zarzavat (t.)

מרק ירקות

sopa

441970

SUPA DE AVIKAS
Materiales (4 porsiones):
1/2 kilo de avikas
2 sevoyas pikadas
2 kucharas de salsa de tomat
3 kucharas de azeyte
1 kuchara de polvo de supa de geyna
agua asta ke kuvre las avikas
sal a gusto
Preparasion: Mundar las avikas i meterlas una noche entera en mojo. Al dia enshaguarlas i eskurrirlas en tefsin burakado. Friyir las sevoyas pikadas en una grande oya, adjustar la salsa de tomat i las avikas, kuvijar kon agua i deshar buyir sovre fuego fuerte. Despues de diez minutos abashar el fuego, deshar gizar en fuego moderado serka dos oras asta ke las avikas se ablandan bueno, entonses adjustar el polvo de supa de geyna i deshar otros diez minutos sovre la lumbre.De vez en kuando adjustar agua si ay menester. Si se dezea ke las avikas sean arefinadas (komo hamin) se meten al orno moderado por a lo menos una ora.
En las komunidades sefaradis se uzava gizar avikas en dia de lavado porke era la komida la mas fasil i no ay muncho de lavorar. Siertas famiyas las gizavan kon la karne endjuntos, otras sin karne i algunas kon guesos de tutano.

SUPA DE ARROZ KON GEYNA
Materiales:
7-8 alikas o otras partes de la geyna
3/4 de vazo de arroz
sal a gusto
Preparasion: Esta supa ke se kome jeneralmente para kortar tanit, es muy liviana i en mizmo tiempo sostansioza i su preparasion es muy fasil. Todo lo ke ay de azer es meter en una kaldera grande siete o ocho alikas de geyna ke fueron saumadas i bien alimpiadas, adjustar el arroz alimpiado i la sal, i kuvrir kon agua antes de meter a kozer sovre lumbre mediana por media ora. Despues menguar la lumbre i kozer otruna ora. Siendo ke el arroz embeve muncha agua se deve adjustar agua al tanto ke se aze menester. A la ora de servir, el ken lo dezea puede adjustar unas kuantas gotas de sumo de limon a la supa.

SUPA DE FIDEOS
Materiales (4 porsiones):
4 vazos de kaldo de geyna
2 vazos de agua
1 vazo de fideos
1 limon
sal a gusto
Preparasion: En una kacharola mesklar i meter a buyir la agua i el kaldo de geyna, adjustar la sal i imediatamente despues los fideos. Deshar buyir unos sinko minutos en fuego moderado, en mesklando todo de vez en kuando kon una kuchara, sin dizminuzar los fideos. Se sierve kaente en adjustando una aregada de sumo de limon.

SUPA DE VEDRURAS KON TUTANO
Materiales (6 porsiones):
5-6 guesos kon tutano
3 safanorias
2 kalavasikas delgadas
1 kavesa de apio
2-3 sevoyas
4 patatas grandes
1/3 kupa de arroz
1 masiko chiko de ojas de apio
sal
Preparasion: Lavar bien los guesos i meterlos a buyir en una oya grande. Kitar la eskuma ke se forma enriva para ke el kaldo kede limpio. Mundar todas las vedruras i las patatas, kortarlas en tajadas o, si kere ke la supa sea mas espesa, rayerlas en el "Food-Processor"; pikar minudo las ojikas de apio i echarlo todo adientro el kaldo kon los guesos. Deshar kozer sin tapar i adjustar agua, sigun el menester. Kuando las vedruras ya estan kaje kochas adjustar el arroz ke ya fue bien lavado de antes, ansi ke la sal a gusto. Esta supa ke es muy pastoza i muy saludoza, esta pronta kuando el arroz ya esta bien kocho.

SUPA DE GUEVO I LIMON
Materiales (6 porsiones):
1/2 vazo de arroz
1 guevo entero
1 yema de guevo
1/4 de vazo de sumo de limon
8 vazos de agua
1 kuchara yena de polvo de supa de geyna,
partes de la geyna komo alas, garon, etc.
Preparasion: Meter a kozer la geyna, adjustar el arroz i deshar kozer asta ke el arroz se ablanda. Adjustar la sal i el polvo de supa de geyna. Batear bien el guevo i la yema i adjustar el sumo de limon. Batear de muevo todo en una i adjustarlo a la supa, en mesklando kontinualmente. Kuando esta para buyir, kitar del fuego i deshar ke repoze unos kuantos minutos antes de servir.

SUPA KON KEFTIKAS DE KARNE
Materiales (6 porsiones):
1/2 kilo de karne mulida
2 kucharas de prishil
1 tomat
1 diente de ajo
1/2 vazo de arroz
2 litros de agua
sal i pimienta a gusto
azeyte para friyir
Preparasion: Mesklar la karne mulida kon la sal, la pimienta i el prishil pikado. Azer keftikas chikas, friyirlas i meterlas de un lado. A la mizma azeyte adjustar el tomat sin el kuero i sin las pipitas, rayido o molido, el ajo i la sal i deshar friyir un poko. Meterlo todo en un tendjere adekuado, adjustar la agua, deshar ke de un buyor i a la fin adjustar las keftikas i el arroz, i deshar buyir asta ke se koze.

SUPA DE KARNE KON KOPETIKAS
Materiales (6 porsiones):
1/2 kilo de karne de vaka o kodrero
2 guesos kon tutano
1/2 kilo de karne mulida
2-3 kucharas de azeyte para friyir
1/2 vazo de arroz
3 kucharas de prishil pikado
sal i pimienta a gusto
Preparasion: Enshaguar la karne kortada pedasos i los guesos, meterlo todo en una kacharola grande i kuvijar kon dos litros de agua yelada. Kuando buyo, kitar kon una kuchara la eskuma ke sale enriva i da kolor suzya a la supa. Adjustar sal i pimienta, deshar kozer en lumbre flosha serka de una ora i media o asta ke la karne se ablanda, todo el tiempo tapado. Entremientres adjustar sal i pimienta a la karne mulida, amasar bueno bueno kon las manos umidozas, azer balikas de karne de la grandor de una muez i friyir de manera muy liviana en la azeyte. Media ora antes ke la supa tenga ke ser servida echar adientro la kopetikas i kinze minutos mas tadre el arroz. Gizar asta ke el arroz se ablanda. Antes de servir la supa se esparze enriva de kada plato prishil pikado minudo.

SUPA DE LENTEJAS
Materiales (4 porsiones):
1/2 kilo de lentejas vedres
unos kuantos guesos kon karne o guesos kon tutano.
2 grandes tomates sufritos o
2 kucharas de tomatada
1 sevoya grande
3 vazos de agua
sal i pimienta a gusto
Preparasion: Alimpiar las lentejas i meterlas en mojo por unas kuantas oras. De otra parte, en una kacharola onda, meter a kozer los guesos, kitando de vez en kuando la eskuma de enriva, kon una kuchara. Kuando la karne se desparte del gueso (sinyo ke la karne ya se ablando), adjustar las lentejas i kozerlas asta ke se ablanden. Adjustar el tomat kortado pedasikos i sufrito o la tomatada, la sevoya frita un poko i la sal i deshar kozer avagar avagar asta ke las lentejas se arefinan. Si la supa sale muy espesa, se puede adjustar un vazo de agua i deshar buyir otros sinko minutos.

SUPA DE TOMAT I ARROZ
Materiales (6 - 8 porsiones):
1 vazo de arroz
8 vazos de agua
3 tomates rayidos o
2-3 kucharas de tomatada
unos kuantos guesos de karne
sumo de limon
sal i pimienta a gusto
Preparasion: Meter a buyir los guesos asta ke se koze la karne en sus entorno. Kitar la eskuma kon una kuchara, adjustar el arroz bien alimpiado i enshaguado, el tomat rayido o la tomatada, deshar kozer vente minutos, adjustar la sal i la pimienta. Kuando se sierve, se adjusta sumo de limon a gusto.

SUPA DE GUEVO I LIMON PASKUAL
Materiales (6 porsiones):
2 matsot dizminuzadas
1 guevo entero
1 yema de guevo
1/4 de vazo de sumo de limon
8 vazos de agua
1 kuchara yena de polvo de supa de geyna
partes de la geyna komo alas, garon etc.
Preparasion: Meter a kozer la geyna, adjustar las matsot i deshar kozer kinze minutos. Adjustar la sal i el polvo de supa de geyna. En otro resipiente batear bien el guevo i la yema i adjustar el sumo de limon. Batear de muevo todo en una i adjustarlo todo a la supa, en mesklando kontinualmente. Kuando esta para buyir, kitar de la lumbre i ya esta pronta para servir.