|
ASHURE
Materiales:
1 vazo de trigo
1 vazo de asukar
1 paketiko de asukar vanilya
granos de granada
pasas
muez
kanela
Preparasion: Mundar i enshaguar bien el trigo, meterlo en mojo una noche entera: Al dia, meterlo a kozer en lumbre basha, mirar de vez en kuando si ainda esta duro o, si no ay bastante agua, adjuntar agua kaente asta ke se ablanda. Desharlo yelar, kitar un vazo del trigo kocho i meterlo de lado, meter el resto al blender i despues ke el trigo ya esta bien ahajado, pasarlo por un tifsin burakado para kitarle los kueros. Adjustar a lo ke salio la sukar, el paketiko de asukar vanilya i el vazo de trigo kocho ke avia sido kitado. Meter todo de muevo a la lumbre, sovre fuego mediano i menear de vez en kuando asta ke se ata, ma no muncho. Kuando ya se aze un poko espeso, kitarlo de la lumbre, desharlo yelar un poko i eskudiarlo en platikos ondos, metiendo enriva agua rozada, granikos de granada, piskitos de muez, pasas i kanela sigun el gusto. |