shurup (t.) m.

סירופ, עסיס ענבי מתוק, סירופ ענבים מתוק

SHURUP DE KONDJA
Materiales:
2-3 kondjas grandes, koloradas i guezmozas
1/2 vazo de agua
1 vazo de asukar
1/2 limon
Preparasion: Enshaguar bien las ojas de las kondjas ke deven ser grandes i guezmozas, aviertas ma no amurchadas, eskurrirlas i meterlas a buyir en un tendjere kon la agua, el sumo del limon i la asukar. Kuando dio un buyor o dos, abashar la flama i deshar ke buyga otros kinze o vente minutos. Se obtiene un sirop kolorado kon una savor i un guezmo maraviyozos. Para servir, meter una kucharika del sirop konsentrado en un vazo de agua yelada.

SHURUP DE SUMO DE LIMON I PORTOKAL
Materiales:
6 portokales
6 limones
asukar
Preparasion: Kortar i esprimir bien los limones i las portokales. Mezurar la kantidad del sumo i adjustar la mizma kantidad de asukar (para kada vazo de sumo un vazo de asukar) i meterlo todo en un resipiente. Kuando empesa a buyir, abashar la lumbre i deshar buyir otros kinze minutos. Abashar de la lumbre, deshar el shurup bien yelar i meterlo en bokales limpios i bien sekos. Este shurup puede ser konservado en el frijider muncho tiempo.