|
SHAROPE
Materiales:
2 kupas de asukar
1/2 kupa de agua
1/2 kuchara de sumo de limon
Preparasion: Meter la asukar kon la agua en un resipiente de nirosta i desharla dos oras, asta ke la asukar se dezaze mas o menos. Despues se mete el resipiente sovre lumbre fuerte i se empesa a menear kon una kuchara de tavla asta ke empesa a buyir. De vez en kuando se kita la eskuma ke se forma enriva. Kuando empeso a buyir, se adjusta el limon i se desha buyir asta ke la asukar viene a punto, en aziendo buchichas fuertes.
Para ver si la asukar vino en punto se toma kon una kuchara un poko del sharope i se desha kayer sovre un plato. Si en kayendo se aze un ilo es ke el punto ya esta bueno. Entonses abashar el resipiente de la lumbre i desharlo tiviar (mas yelado ke tivio). Despues kon una kuchara de palo menear el sharope, empesando de en medio, todo el tiempo en la mizma direksion, kon fuersa i prestez, asta ke deviene blanko komo la leche.
Kon manos umidozas kitar el sharope del resipiente, finyirlo bien, ke no kede kuajones, meterlo en un plato tapado kon un panyaliko blanko i umidozo i guadrarlo en el frijider. Antes de servir se puede mesklar, segun el gusto, kon almastiga machakada, almendra tostada i machakada, muez kortada menuda, shokolata rayida, kakao, muez de koko rayida, fistokis kortados minudo o kashka de limon o portokal rayida.
|