sevoya f.

בצל; כינוי לתורכי

estar kon la sevoya en la lumbre

להיות על גחלים

sevoya dulse

בצל מתוק

sevoya korelada

בצל אדום (משמש לסלט)

tela de sevoya

'בד של גלידי בצל'' - כינוי לבד דק מדי

SEVOYAS REYNADAS
Materiales (5 - 6 porsiones):
10 sevoyas de grandor mediana, para reynar
400 gramos de karne mulida
1 revanada de pan
1 guevo
azeyte i arina para friyir
sal i pimienta a gusto
Para la salsa:
100 gramos de salsa de tomat dezecha en
1 vazo de agua
1/2 kucharika de asukar
1/2 limon
sal i pimienta a gusto
Preparasion: Mundar las sevoyas, kortarlas en dos a la larga, meterlas en un paylon i echar por enriva agua kaente, ke fue echa buyir. Desharlas diez minutos, asta ke se ablandan i se pueden despartir los kates de las sevoyas unos de los otros, en apretando de manera liviana. Kale perkurar ke kada media sevoya se desparta en dos o tres. Mesklar la karne mulida kon la miga del pan esprimida i dizminuzada, la sal i la pimienta, i inchir las medias sevoyas kon este gomo. Untarlas en la arina i el guevo, friyirlas de todas las partes, despues aresentarlas en un paylon o un grande plato de Pyrex, una al lado de la otra, lo redondo para abasho i echar por enriva la salsa echa de antes en mesklando bien los materiales. Tapar el paylon i meterlo al orno en fuego moderado (180°) por una ora.

SEVOYAS REYNADAS KON KARNE I ARROZ
Materiales (2 - 4 porsiones):
4-5 sevoyas grandes
1 kuchara de polvo de supa de geyna
6 kucharas de azeyte
1 limon
sal i pimienta a gusto
Para el gomo:
250 gramos de karne mulida
2 vazos de arroz kocho
sal i pimienta a gusto
Preparasion: Mundar i enshaguar bien las sevoyas, azer una kortadura en kada sevoya de ariva para abasho, meterlas a abafar en "bain-marie" trenta minutos (o bien adientro de agua kaente, ma entonses no kale kozer mas de vente minutos, solo asta ke los kates de las sevoyas se desparten un poko). Abasharlas del gaz, desharlas yelar, despues despartir los kates los unos de los otros kon atension, para ke no se rompan. Tomar el gomo ke fue bien mesklado i inchir kada kat kon delikateza, arodearlo i pozarlo en un paylon kon bodres altos, uno al lado del otro, apretados i la aviertura para abasho afin ke no se avran durante el gizado. Meter en una kacharola 6 kucharas de azeyte, kaentar uno o dos minutos, adjustar el sumo del limon, el polvo de supa de geyna, sal i pimienta, dar un buyor i echarlo por enriva de las sevoyas reynadas, deshar buyir, abashar el fuego i gizar otros 20-30 minutos.

BOKADIKOS DE KALAVASA KON SEVOYAS I AJOS
Materiales (6 - 8 porsiones):
1½ kilos de kalavasikas delgadas
2 tomates
3 sevoyas grandes
8-10 dientes de ajo
2 vazos de agua
1 kuchara de salsa de tomat
1 kucharika de polvo de supa de geyna
1/2 vazo de azeyte
sal i pimienta a gusto
Preparasion: Mundar las kalavasikas, kortar las dos puntas, enshaguarlas bien. Kortar kada kalavasa en kuatro a la larga i despues en tres o kuatro pedasikos, meter sal por enriva i desharlas de una parte.
Mundar i enshaguar las sevoyas, kortarlas en tajadas i meterlas a abafar en un poko de azeyte, en un paylon ke va al orno. Enshaguar los bokadikos de kalavasa, eskurrir i aresentarlos enriva de la sevoya. Enshaguar los tomates, kitar las pipitas, kortarlos minudo i meter enriva de las kalavasas, esparzido bien por todas las partes. Azer lo mizmo kon los dientes de ajo ke fueron mundados i pikados. Dezazer la salsa de tomat i el polvo de supa de geyna en los dos vazos de agua i echar por enriva ansi ke la azeyte ke kedo. Adjustar sal i pimienta. Meter al orno moderado (180°) por una ora o ora i media. Despues de este tiempo si las kalavasikas toman una kolor eskura ma no estan ainda bastante gizadas, se pueden tapar kon papel aluminium i deshar kozer otra media ora en el orno.

FRITADA DE SEVOYA FRESKA
Materiales (4 - 6 porsiones):
1 kilo de sevoya freska
2 revanadas de pan moreno
2 kucharas de prishil pikado
3 guevos grandes
sal i pimienta a gusto.
Preparasion: Mundar i enshaguar bien las sevoyas, kortarlas de ariva abasho en kuatro, i pikarlas minudo; se pueden tomar los ravos tambien si estan freskos. Meter sal por enriva i deshar de una parte ke se asolte la agua. Entremientres tomar la miga del pan ke estava en mojo, esprimirla bien i dizminuzarla adientro de un otro resipiente. Adjustar el prishil, tomar la sevoya ke entremientres ya solto la agua, esprimirla entre las dos manos i meterla adientro del resipiente. Batear los guevos, adjustar pimienta i mesklar todo bien komo una omlet. Gostar i si falta sal, adjustar. Meter azeyte en un tifsin, ke kuvra el fondo, kaentar bien i echar adientro la fritada, aresentandola por enriva kon la espalda de una kuchara o de un piron para ke este igual de todas las partes. Echar una aregada de azeyte por enriva i meter al orno ke ya fue kaentado de antes a 180° serka de 30 minutos o asta ke los bodres de la fritada se desparten del tifsin.

ALIKAS DE GEYNA KON SEVOYA
Materiales: (5 - 6 porsiones):
1 kilo de alikas de geyna
5-6 sevoyas grandes kortadas en tajadas
1 kuchara de polvo de geyna
50 gramos de margarina
sal i pimienta
Preparasion: Saumar las alikas sovre la lumbre i kitarles los pelos. Lavarlas bien i deshar eskurrir. En una sarten, grande i onda, friyir la sevoya kon la margarina asta ke toma una kolor rosha. Meter las alikas sovre la sevoya frita, dezazer el polvo de geyna en un poko de agua i echarlo sovre las alikas, adjustar sal i pimienta, kuvijar de agua i tapar la sarten. Deshar kozer sovre lumbre flosha unos 45 minutos asta ke las alikas se ablandan i ke el kaldo se apura.