sardela f.

סרדין; כינוי לאדם צנום

estar komo sardelas en kutí

להיות לחוצים כסרדינים בקופסה

sardela de bakal (t.) kristiano

אדם דל בשר בעל מראה חולני

sardelas de barmil

סרדינים כבושים במלח (בחבית)

sadrela

411600

SARDELAS AL ORNO
Materiales (4 - 6 porsiones):
1 kilo de sardelas
1 piminton vedre grande
1 sevoya kortada tajadas
4 tomates
sal i pimienta a gusto
Preparasion: Mesklar los tomates sin el kuero i las pipitas i pikados, el piminton enshaguado i sin las pipitas i la sevoya kortada tajadas. Meterlos a abafar. Kuando esta pronto, aresentar la metad en un paylon. Kitar las eskamas, las espinas i las kavesas de las sardelas i enshaguarlas bien kon agua yelada. Asezonarlas kon sal i pimienta. Despues meterlas aviertas kon la parte blanka para ariva, en un paylon sovre los otros materiales. Adjustar ensima la otra metad de las vedruras abafadas, sal i pimienta. Deshar ke todo de un buyor en el gaz, echar ensima una aregada de azeyte i meter al orno kaentado a 180° - 200° por 15-20 minutos.

KAZADIKAS DE SARDELA
Materiales (2 - 3 porsiones):
1/2 kilo de sardelas freskas, duras i el ojo briyando
1 guevo bateado
1 limon
arina
sal a gusto
azeyte para friyir
Preparasion: Eskamar, kitar las kavesas i la espina de enmedio de las sardelas, avrirlas, enshaguar bien kon agua yelada (kon agua kaente o tivia se ablandan), meterlas a eskurrir, echar por enriva sal i mesklar bien. Tomar dos sardelas aviertas, meter la una enriva de la otra de parte de la tripa, untarlas en la arina i el guevo bateado i friyirlas en azeyte bastante kaente. Kitarlas de la azeyte despues ke estan roshas de las dos partes. Es preferable de servirlas kaentes kon limon kortado tajadas ke se esprime por ensima, akompanyadas de salata vedre.

KAPAMA
Materiales (2 - 4 porsiones):
1/2 kilo de sardela
1 kilo de tomat
1/2 kilo de sevoya
azeyte
un poko de sal, de asukar i de agua
Preparasion: Se friye un poko la sevoya kortada en aniyos kon la azeyte i se abafa kon un poko de agua, se echa adientro el tomat kortado en pedasikos sin los kueros i sin las pipitas, se friye un poko todo endjunto. Se koze kon un poko de sal, de agua i una preza de asukar. Kuando esta bien kocho se adjusta el pishkado i se le da un buyor.

EMPANADAS
Materiales (8 porsiones):
1 kilo de sardelas medianas
2 findjanes de muez machakada
1 findjan de prishil pikado
sal i pimienta a gusto
Para friyir:
2 guevos
4 kucharas de agua
arina
azeyte
Preparasion: Eskamar las sardelas, kitar las kavesas i las grenyas, kortar la tripa i avrirlas, kitar la espina de en medio i la kola i avrirlas en dos, de manera ke las dos partes de la sardela formen un solo file, enshaguarlas i desharlas eskurrir.
En una kacharola mesklar la muez machakada, el preshil, la sal i la pimienta. Meter sovre el file de una sardela una kucharika de la meskla de la kacharola i tapar kon otro file de sardela, de manera a obtener un djenero de sandwich. Kontinuar ansi asta ke se eskapan las sardelas. Entonses batear los guevos komo para omlet, adjustar las kuatro kucharas de agua i mesklar bien. Untar los sandwiches de sardela en la arina i despues en los guevos bateados. Friyir en azeyte kaente de las dos partes. Servir kaente.

KEFTES DE PISHKADO
Materiales (2 - 3 porsiones):
1/2 kilo de sardela o de file de pishkado
2-3 kucharas de arina de matsa
3 guevos bateados
1 kuchara de prishil pikado
1 sevoya grande
2 dientes de ajo pikado
2 limones
sal i pimienta a gusto
azeyte para friyir
Preparasion: En un resipiente ondo mesklar los guevos, el prishil, la sevoya kortada minudo, la sal, la pimienta i el pishkado ke le fueron kitadas las espinas, fue alimpiado, enshaguado i mulido, aziendo todo este material komo una masa. Kon las manos umidas o kon una kuchara tomar la kantidad ke se kere de esta masa, untarla en arina de matsa o pan rayido i en guevo bateado i friyirla en azeyte bien kaentada de antes. Las keftes se sierven kaentes kon una aregada de limon enriva i al lado agristada (ver en "Salsas").
Si se kere, se pueden aresentar tambien en un paylon, echar por enriva dos kucharas de tomatada dezechas en dos vazos de agua kon el sumo de medio limon, una kuchara de prishil pikado i un poko de sal, i kozer las keftes por sinko o diez minutos.