salata (t.) f.

סלט, ''סלט'' – ערבוביה;

salada

412900

SALATA DE TOMAT
Materiales:
2-3 tomates grandes
2-3 sevoyas freskas
2 kucharas de prishil pikado
1 kuchara de sumo de limon
3 kucharas de azeyte de oliva
sal i pimienta a gusto
Preparasion: En una chanaka mesklar los tomates kortados pedasikos, la sevoya kortada minudo i el prishil pikado i echar por enriva el sumo del limon, la azeyte de oliva, sal i pimienta. Mesklar todo bien, deshar repozar diez o kinze minutos, para ke todos los materiales tomen la savor el uno del otro i entonses la salata esta pronta para komer.

SALATA TURKA I
Materiales:
2-3 pipinos delgados
1 sevoya seka o
3-4 sevoyas freskas
2 tomates grandes
2 kucharas de prishil pikado
1 punyado de azetunas pretas
vinagre
azeyte de oliva
sal a gusto
Preparasion: Los pipinos se mundan, se enshaguan i se kortan en dos. Se korta lo todo en tajadas delgadas (si es sevoya freska, se korta minuda ansi ke los ravos), se adjusta las azetunas, la sal, el vinagre i la azeyte i se meskla bien.

SALATA TURKA II
Materiales:
1¼ kilos de tomates kolorados i karnudos
6 pimintones vedres klaros
4 pimintones fuertes
1 kavesa de ajo
1 kuchara de paprika dulse
1 kucharika de asukar
1/4 vazo de azeyte de oliva
sal i pimienta a gusto
Preparasion: En una kacharola ancha meter la azeyte, los pimintones fuertes kortados minudo, los pimintones dulses enshaguados i enshugados, sin las pipitas, kortados delgado delgado a la larga i los ajos kortados tajadas delgadas. Meter todo sovre el fuego muy suave, kuando ya se abafo i se ablando, adjustar los tomates enshaguados, sin el kuero i las pipitas i kortados muy minudo, desharlo sovre fuego suave, mesklar de vez en kuando para ke no se apege, asta ke no keda likido del todo. Adjustar sal, asukar i paprika, mesklar bien i deshar repozar dos o tres oras antes de servir afin ke las savores se mesklen unas kon las otras.

SALATA DE BERENDJENA A LA BULGARA (KIOPOLU)
Materiales:
1 tomat
2-3 berendjenas medianas
4 pimintones vedres o kolorados godros
4 kucharas de azeyte
1 kuchara de prishil pikado
1 pimintoniko fuerte o paprika fuerte (segun el gusto)
Preparasion: Asar las berendjenas en el gril o sovre el gaz de todas las partes, deshar ke se yelen un poko, meter kada una debasho del chorro de la fuente kon la agua fuerte i kitar kon delikateza las kashkas ansi ke las pipitas. Pikarlas muy minudo, adjustar las kuatro kucharas de azeyte, la sal, el prishil, el piminton fuerte i los kuatro pimintones muy bien pikados. Mesklar todo bien i deshar en el frijider una o dos oras afin ke las vedruras tomen la savor la una de la otra. Antes de servir rayer un tomat i mesklarlo kon la salata. (Si se mete el tomat kuando se apronta la salata, se agrea).

SALATA DE BERENDJENA A LA GREGA
Materiales:
2 berendjenas grandes
2 kucharas de vinagre o de sumo de limon
2 kucharas de azeyte de oliva
3-4 dientes de ajo machakado
prishil
azetunas pretas
sal a gusto
Preparasion: Asar las berendjenas, de preferensia sovre el gaz para ke tengan una savor de asado. Kuando se ablandan bien de todas las partes, mundar i enshaguar debasho el chorro de la fuente. Pikarlas bien, adjustar el vinagre o sumo de limon, el ajo, azeyte i sal i mesklar bien. Antes de servir esparzir por enriva prishil pikado i por garnitura unas kuantas azetunas pretas.

SALATA DE GAMBAS ASADAS
Materiales:
1 kilo de gambas pulpudas
2-3 kucharas de sal godra
2-3 kucharas de azeyte
4 kucharas de vinagre de vino
1/2 kucharika de sal delgada
1/2 kucharika de asukar

Preparasion: Asar las gambas enriva del gaz o en el gril del orno, asta ke se despega el kuero. Meterlas adientro de una papelera de papel, echar por enriva la sal godra, serrar la bokadura, desharlas una ora i media asta dos oras para ke suden bien i ke el kuero salga mas fasil. Despues enshaguarlas bien debasho del chorro de la fuente para ke salgan todas las pepitas i los kueros, desharlas eskurrir, kortarlas en dos o tres pedasos i aresentarlas en una bocha. Mesklar la azeyte, vinagre, sal i asukar, echar por enriva de las gambas, serrar bien, meter al frijider. Asperar unos kuantos dias asta ke este pronta. Esta salata tan pastoza es apresiada sovre todo por los djudios de Bulgaria.

SALATA DE KUCHUNDURIA RAYIDA
Materiales:
1/2 kilo de kuchunduria
2 kucharas de azeyte
1 limon o
3-4 kucharas de vinagre
1 kucharada de asukar
sal a gusto
Preparasion: Enshaguar bien la kuchunduria, sin mundar la kashka. Kitar todas las ojas i los ravos, meterla a eskaldar. Kuando ya se ablando la kuchunduria (se puede provar kon un piron), kitar del gas, enshaguar de muevo kon agua yelada, kitar la kashka (mizmo kon la mano, es muy fasil) i rayer kon un rayo, de la parte godra, o bien en un "Food-Processor". Meter en una kacharola o plato de Pyrex ondo, echar por enriva la sal, la azeyte i el sumo del limon o el vinagre, mesklar bien i meter al frijider a lo menos por un dia.

SALATA DE TAJADAS DE KUCHUNDURIA
Materiales:
Komo en la recheta presedente
Preparasion: Lo mizmo ke en la presedente recheta, asta ke las kuchundurias ya se kozieron i fueron mundadas, ma despues kortarlas en tajadas o en gajos, adjustar la azeyte, el sumo del limon o el vinagre, sal i, si se dezea, un poko de piminton fuerte. Despues meter al frijider asta ke la kuchunduria absorbe la savor de los ingredientes. Esta salata tura mas ke la primera.

SALATA DE RAVANO
Materiales:
1/2 kilo de ravanos
1/2 kilo de gambas o de pimintones kolorados
1 sevoya chika
4 kucharas de azeyte
3 kucharas de vinagre o
de sumo de limon
sal a gusto
Preparasion: Mundar, enshaguar i kortar minudo la sevoya. Mundar i enshaguar el ravano i el piminton i kortarlos tajadas delgadas (se puede azer en el "Food-Processor" tambien). Adjustar el resto del material, mesklar todo endjuntos, deshar de una parte media ora i servir la salata kon la kumida.

SALATA DE RAVANO KON SAFANORIA
Materiales:
1/2 kilo de ravanos
1/4 kilo de safanorias
1 piminton vedre
2-3 kucharas de sumo de limon
sal a gusto
Preparasion: Mundar el ravano en kitandole una kashka muy delgada para ke el ravano kede kolorado i blanko. Enshaguarlo i rayerlo i azer lo mizmo kon la safanoria. Mesklar endjuntos, adjustar la sal i el limon, mesklar otra vez i aresentarlo todo en un plato, garnizando kon bandas de piminton vedre.