|
RESHAS
Materiales:
1 vazo de azeyte
1/2 paketo de margarina
1 vazo de asukar
1 vazo de agua
1 dedo de vinagre
1 paketo de "Baking Powder" o
1/2 kucharika de soda de bever
1 kucharika de kanela
800 gramos de arina
susam
Preparasion: Meter adientro de un paylon la margarina kortada piskitos chikos, la azeyte, la agua ke ya esta mesklada kon el vinagre, la asukar i la kanela. Mesklar bueno kon una kuchara. Meter el "Baking Powder" o la soda de bever adientro de la arina, mesklar bien, echarlo todo adientro del material ke se topa en el paylon i empesar a azer la masa asta ke se embeve toda la arina. Amasar i finyir la masa o lo menos unos diez o kinze minutos. Desharla repozar a lo menos una ora. Despues, tomar de la masa pedasos un poko mas grandes de una muez i aboltandolos kon la palma de la mano, sovre la meza, azer komo unos dedos de sinko o sesh santimetros de largura i apegar las puntas una kon la otra, dandoles la forma de una mania. Antes de meterlas al orno, ay ke untarlas kon guevo i meter susam por enriva. Enfornarlas en orno no muy kaente.
|