|
BISKOCHOS DE RAKI
Materiales:
5 vazos de arina
1/2 paketiko de "Baking-Powder"
100 gramos de margarina
3 kucharas de asukar
1/4 vazo de raki
1/2 vazo de agua
1 guevo bateado
4 kucharas de susam
1 preza de sal
Preparasion: Meter la arina sernida en un resipiente ondo, kortar la margarina por enriva en piskitos chikos i dezminuzarla entre las manos kon la arina, adjustar la asukar, la sal, la agua i el raki. Amasarlo todo bien bien asta obtener una masa liza. Tomar pedasos de la masa de la grandor de un guevo chiko, amasarlos enriva de la meza i darles la forma de una mania de kinze santimetros en apegando las puntas la una sovre la otra. Untar los biskochos kon el guevo bateado, meterlas por enriva el susam. De otra parte, polvorear un poko de arina en la tava ke va al orno, aresentar ai los biskochos i enfornar en orno kaentado de antes a 180°. Deshar 40-45 minutos o asta ke los biskochos toman una kolor rosha ermoza. Despues ke se yelan se meten en un kuti de teneke serrado, ansi turan muncho tiempo freskos.
Estos biskochos son servidos en enverano kon limonada i en invierno kon kafe turko o kon te. El anason ke se topa en el raki da a estos biskochos un guezmo partikular, muy agradavle.
|