arreyenado adj.

ממולא

kalavasas arreynadas

קשואים ממולאים

PIMINTONES REYNADOS EN TRUSHI SALAMURA
Materiales (6 - 8 porsiones):
16-18 pimintones no muy largos
1 kol chika
3 safanorias mundadas
1 masiko de anito
1 masiko de prishil
4 vazos de agua
3 vazos de vinagre
1 revanada de pan moreno
30 gramos de sal
unas kuantas ojikas de apio
Preparasion: Enshaguar i kitar la kavesa i las pipitas de los pimintones. Enshaguar i kortar minudo minudo la kol ansi ke las safanorias mundadas en tajadas. Mesklar en un paylon la kol i la safanoria, ansi ke el apio, el anito i el prishil enshaguado i kortado minudo; adjustar un poko de sal i estregar kon las manos para abatir un poko los lugumbres, para ke no tomen muncho lugar. Inchir los pimintones kon la meskla i aresentarlos en una bocha de vidro. Meter por enriva ojas de apio i anito, dezazer la sal en la agua, adjustar el vinagre, mesklar i echar avagar avagar enriva los pimintones reynados. Enriva de todo meter una revanada de pan moreno seko, serrar la bocha i meterla por diez o dodje dias en un lugar klaro i yelado.

PATATAS REYNADAS
Materiales (6 - 8 porsiones):
5 patatas de una largura de 7 sms., mas largas ke anchas
300 gramos de karne mulida
1 sevoya grande
1 diente de ajo
1 guevo
2 kucharas de prishil
2 kucharas de salsa de tomat
2 vazos de agua
azeyte i arina para friyir
sal i pimienta a gusto
Preparasion: Mundar las patatas, kitar una tajada delgada de debasho i otra de enriva para ke puedan ser aresentadas en el tefsin sin difikultad. Kortar kada patata en sesh tajadas, en todo tres pares de tajadas de kada patata (kada 2 tajadas no deven ser kortadas asta la fin, kere dizir ke las puntas deven kedar apegadas para ke la karne no salga afuera). Mesklar la karne kon la sevoya kortada minudo, el prishil pikado i el ajo machakado i amasar bien bien. Kuando esta bien mesklado, tomar la kantidad de karne menesteroza, ahajarla entre las manos i meterla entre las dos tajadas de patata. Untar las patatas reynadas en la arina i en el guevo bateado i friyirlas. Aresentarlas en el tefsin, en primero las primeras tajadas ke fueron kitadas i despues las patatas reynadas i fritas; echar por enriva la salsa de tomat dezecha en dos vazos de agua, un poko de sal i un poko de prishil pikado i meter a gizar en lumbre suave asta ke la patata se ablanda.

SEVOYAS REYNADAS
Materiales (5 - 6 porsiones):
10 sevoyas de grandor mediana, para reynar
400 gramos de karne mulida
1 revanada de pan
1 guevo
azeyte i arina para friyir
sal i pimienta a gusto
Para la salsa:
100 gramos de salsa de tomat dezecha en
1 vazo de agua
1/2 kucharika de asukar
1/2 limon
sal i pimienta a gusto
Preparasion: Mundar las sevoyas, kortarlas en dos a la larga, meterlas en un paylon i echar por enriva agua kaente, ke fue echa buyir. Desharlas diez minutos, asta ke se ablandan i se pueden despartir los kates de las sevoyas unos de los otros, en apretando de manera liviana. Kale perkurar ke kada media sevoya se desparta en dos o tres. Mesklar la karne mulida kon la miga del pan esprimida i dizminuzada, la sal i la pimienta, i inchir las medias sevoyas kon este gomo. Untarlas en la arina i el guevo, friyirlas de todas las partes, despues aresentarlas en un paylon o un grande plato de Pyrex, una al lado de la otra, lo redondo para abasho i echar por enriva la salsa echa de antes en mesklando bien los materiales. Tapar el paylon i meterlo al orno en fuego moderado (180°) por una ora.

TOMATES REYNADOS
Materiales (4 - 6 personas):
1 kilo de tomates, bien duros
250 gramos de karne mulida
1/2 vazo de arroz enshaguado i eskurrido
2 guevos bateados
1 kucharika de azeyte
1/2 vazo de prishil kortado minudo
sal i pimienta a gusto
azeyte para friyir
1 plato de arina
Para la salsa:
2 kucharas de azeyte
2 kucharikas de tomatada dezecha en un vazo de agua
una preza de asukar
sal, si se kere
Preparasion: Lavar los tomates, kortarlos en dos a la ancha, kitar las pipitas i la parte dura de en medio. Aprontar el gomo en mesklando bien el resto de los materiales. Inchir los tomates en apretando el gomo kon el dedo. Friyirlos bien despues de averlos untado en la arina i el guevo. Aresentarlos en un paylon, echar por ensima la azeyte de la fritura kolada, el kaldo de tomat kon la sal i la asukar, tapar i deshar kozer en lumbre suave unos 40 minutos. Se kome kaente.

BERENDJENA REYNADA (Karni Yarik)
Materiales (6 porsiones):
6 berendjenas largas
2 sevoyas
4 tomates
250 gramos de karne mulida
1 kuchara de prishil pikado
sal i pimienta a gusto
Preparasion: Kortar la kavesa de las berendjenas, mundarlas en deshando ariva i abasho dos sms. de kashka para ke no se avran. Enshaguarlas i eskurrir bien la agua. Avrir las berendjenas de en medio, kavakar kon delikateza la una metad solo, en forma de barka. Friyirlas en azeyte kaente asta ke toman una kolor rosha klara. Friyir un poko la sevoya kon la karne mulida. Kitar el kuero de tres tomates, kortarlos no muy minudo i adjustar a la karne. Kuando ya se ablando el tomat, kitar de la lumbre, adjustar el prishil, la sal i la pimienta i mesklar bueno. Inchir kon el gomo las partes de las berendjenas ke fueron kavakadas, aresentarlas en un paylon, en lo ke la parte inchida de gomo esta para abasho. Meter enriva de kada berendjena una tajada de tomat, kuvrirlas kon agua, adjustar una aregada de azeyte i un poko de sal i gizarlas en orno kaentado a 150° o sovre lumbre suave unos 30-40 minutos o asta ke la salsa se apura.

MAKARON REYNADO DE KARNE
Materiales (4 - 5 porsiones):
250 gramos de makaron
2 litros de agua
1 kucharika de sal
Para el gomo:
200 gramos de karne mulida
1 sevoya mediana
1 tomat
1 patata eskaldada
4 guevos
3 kucharas de azeyte
sal i pimienta a gusto
Preparasion: Abafar la sevoya, adjustar la karne mulida despartiendola kon un piron para ke no keden bultos, adjustar sal i pimienta i deshar sovre la lumbre asta ke todo se sufriye. Abashar de la lumbre i adjustar el tomat mundado i kortado bien minudo.
De otra parte meter a buyir los dos litros de agua kon una kucharika de sal. Kuando buye la agua echar adientro el makaron i eskaldarlo de dodje a kinze minutos asta ke se ablanda. Despues enshaguarlo basho agua yelada i meterlo a eskurrir. En un resipiente bastante grande i ondo batear dos guevos, adjustar un poko de sal i la metad de los makarones, mesklarlo todo. Untar de azeyte un paylon i meterlo a kaentar a la lumbre. Kuando la azeyte esta kaente, aresentar el makaron mesklado kon los guevos, adjustar el gomo ke fue aprontado de antes i deshar ke kontinue a kaentarse sovre lumbre moderada. Batear un otro guevo i adjustar la otra metad del makaron i un poko de sal, mesklar i echarlo todo sovre el gomo. A la fin, tomar la patata eskaldada, azerla puree, mesklar kon el kuatren guevo, un poko de sal i pimienta i echarlo por enriva del makaron. Meter al orno kaentado de antes a 200° i kozerlo 45 - 50 minutos, asta ke toma una kolor rosha.

PISHKADO REYNADO
Materiales (2 porsiones):
1/2 kilo de pishkado (sardela, kefal o file)
1 kilo de tomat
2 kucharas de prishil pikado
2 revanadas de pan
4 guevos bateados
50 gramos de muez o almendra machakada (si se kere)
1/2 kucharika de pimienta
1 kucharika de sal
Preparasion: En una kacharola se mesklan los tomates sin el kuero i sin las pipitas, la miga de las revanadas de pan mojada i bien esprimida, el prishil pikado, los guevos bien bateados i la muez o almendra, si se kere. De otra parte, preparar el pishkado: si es sardela, despues de eskamarla se kita las espinas i si es kefal o file se azen puestas. Despues en un paylon se mete azeyte a kaentar, no muncho, solo ke kuvra el fondo del paylon. Entremientres se kaenta el orno. Kuando la azeyte esta bien kaente meter la metad de todo el material mesklado en el paylon, aresentar el pishkado i kuvrirlo kon la otra metad del material. Echar una aregada de azeyte por enriva i meter al orno kaentado a 180° por unos vente minutos. El pishkado esta pronto kuando se aze rosho por todas las partes. Se sierve kaente.