|
PITAGRA
Materiales:
2 kilos de fruta agra i dulse (kayisi, sheftali, zirguela, mansana, uva, pera etc.), bien echa, blanda
Preparasion: Enshaguar la fruta, kitar los kueshkos (si se emplea mansana o pera kitar la kashka i el korason), molerla i mesklarla despues en mikser diez minutos (se puede uzar un "Food-Processor" tambien). Meter la fruta mulida en una kacharola o tava de teflon i buyir sovre lumbre fuerte, mesklando de vez en kuando. La meskla se empesa a azer espesa i buye en aziendo buchichas grandes. Kuando ya se travo todo el likido i keda komo una puree deshar yelar un poko. Kuvrir una tava de orno kon una oja de nylon, untar un poko de azeyte para ke la pitagra se despege fasilmente del nylon i estirar ensima la puree de fruta, de manera ke este derecha i igual de todas las partes. Deshar sekar unos kuantos dias. Kuando ya se seko, arodearla komo una rolada djuntos kon el nylon, kortar a la anchura pedasos i meter en una bocha serrada. Kuando se kere komer se kita el nylon.
|