peshkado m.

דג

asentar peshkado

לכבוש דג בציר

peshkado a la buyor kon limón i pereshil

דג בלימון ופטרוזיליה

peshkado abafado

דג מאודה

peshkado bivo

דג חי

peshkado kon guevo i limon

דג בלימון וביצה

peshkado kon kapam (t.)

דג מבושל בעגבניות ובצל

peshkado salado/peshkado asentado

דג מלוח, דג כבוש

peshkado, limón i agua de mar

לשנות/להחליף נושא

pishkado

371170

PISHKADO AHILADO
Materiales (4 porsiones):
1 kilo de pishkado (kefal, sazan o bakala)
1 kuchara de prishil pikado
2-4 tomates bien echos
1/2 kucharika de asukar
1 limon
azeyte
sal i pimienta a gusto
Preparasion: Kitar el kuero de los tomates, meterlo en un tendjere kon la azeyte, los tomates i el prishil kortado minudo. Despues adjustar la asukar i el sumo del limon ansi ke la sal i la pimienta a gusto i meter sovre la lumbre. Kuando el tomat se aze komo puree, menguar el fuego i aresentar el pishkado kortado puestas, deshar kozer a fuego basho diez minutos, aboltar las puestas i kozer otros diez minutos. Se kome kaente o yelado.

PISHKADO GIZADO KON MUEZ O ALMENDRA
Materiales (4 porsiones):
1 kilo de pishkado ke se puede azer puestas
(kefal, sazan, file, etc.)
3-4 dientes de ajo pikado
1 kuchara yena de prishil pikado
2 vazos de agua
2 kucharas de azeyte
1/2 vazo de muez o almendra mulida godro
1/2 limon
sal i pimienta a gusto
Preparasion: Alimpiar i enshaguar el pishkado, kortarlo en puestas i meterlo a eskurrir. Aresentarlo en un paylon. De otra parte, aprontar en una kacharola la agua, la azeyte, el ajo, el prishil, el sumo de limon, la sal i la pimienta i meter al gaz ke de un buyor o dos. Despues ke buyo, echarlo todo por enriva del pishkado i meter a gizar vente minutos. Antes de servir esparzir por enriva la muez o la almendra machakada.

PISHKADO GIZADO AL ORNO
Materiales (6 - 8 porsiones):
2 paketos de file de pishkado
2 tomates no muy grandes
1 sevoya grande
2 kucharas de azeyte
1 gamba
4-5 dientes de ajo
1/4 vazo de agua
2 kucharas de prishil pikado
pimienta, sal i paprika fuerte a gusto
Preparasion: Kitar el kuero i las pipitas de los tomates, meter en un paylon i kozer a lumbre flosha asta ke se ablanda enteramente. De otra parte mundar, enshaguar i kortar la sevoya en tajadas, meterla en una sarten de teflon ke ya esta sovre el fuego, ma sin azeyte, asta ke se seka. Adjustar las dos kucharas de azeyte, la gamba kortada pedasos, los dientes de ajo kortados muy minudo, el tomat, la pimienta, paprika, sal i agua. Asperar asta ke toda en una empese a dar buyor. Kuando buyo, echar todo sovre los pedasos de pishkado ke ya fueron aresentados de antes en un paylon i deshar gizar avagar avagar en lumbre muy flosha (no muncho tiempo porke el file se giza muy presto). Sinko minutos antes de abashar de la lumbre echar por enriva dos kucharas yenas de prishil pikado muy minudo.

PISHKADO KON GUEVO I LIMON
Materiales (4 porsiones):
1 kilo de pishkado (kefal, chipura,
sardela o todo otro pishkado)
2 guevos
2 kucharas de azeyte
1 kuchara de prishil pikado
1 limon
sal i pimienta a gusto
Preparasion: Eskamar el pishkado, alimpiarlo i enshaguarlo i si es grande se puede azer puestas. Meter sal por enriva i desharlo eskurrir en tefsin burakado. Aresentarlo en un paylon, kuvrirlo kon agua, adjustar el sumo de medio limon, la azeyte, el prishil, la sal i la pimienta. Deshar kozer todo sovre lumbre moderada kinze minutos. Despues abasharlo de la lumbre, batear los guevos kon el sumo del otro medio limon i echarlos por enriva del pishkado en lo ke esta ainda kaente. Se sierve kaente o yelado.

PISHKADO KON NOGADA
Materiales (4 porsiones):
1 kilo de pishkado
1 sevoya kortada en kuatro
5 klavos de komer
5 ojas de laurel
1 litro de agua
sal i pimienta a gusto
Preparasion: Eskamar, lavar i alimpiar bien el pishkado. Kortarlo en puestas, guadrar la kavesa i la kola. Meter las puestas, la sevoya, el laurel, los klavos de komer, la sal i la pimienta en una kacharola kon agua, i kozerlo a fuego moderado vente minutos. Kitar el pishkado del kaldo, separarlo de las espinas i meterlo en una pineta. Adjustar la kavesa i la kola a kada una de las puntas. Echar la salsa de nogada, echa asigun la recheta nogada, sovre el pishkado i desharlo yelar. Kuando ya esta bien yelado meter el pishkado al frijider por kuatro oras a lo menos, para ke la salsa se espesee mas. Servir yelado.

PISHKADO REYNADO
Materiales (2 porsiones):
1/2 kilo de pishkado (sardela, kefal o file)
1 kilo de tomat
2 kucharas de prishil pikado
2 revanadas de pan
4 guevos bateados
50 gramos de muez o almendra machakada (si se kere)
1/2 kucharika de pimienta
1 kucharika de sal
Preparasion: En una kacharola se mesklan los tomates sin el kuero i sin las pipitas, la miga de las revanadas de pan mojada i bien esprimida, el prishil pikado, los guevos bien bateados i la muez o almendra, si se kere. De otra parte, preparar el pishkado: si es sardela, despues de eskamarla se kita las espinas i si es kefal o file se azen puestas. Despues en un paylon se mete azeyte a kaentar, no muncho, solo ke kuvra el fondo del paylon. Entremientres se kaenta el orno. Kuando la azeyte esta bien kaente meter la metad de todo el material mesklado en el paylon, aresentar el pishkado i kuvrirlo kon la otra metad del material. Echar una aregada de azeyte por enriva i meter al orno kaentado a 180° por unos vente minutos. El pishkado esta pronto kuando se aze rosho por todas las partes. Se sierve kaente.

PISHKADO KON VEDRURAS AL ORNO
Materiales (4 porsiones):
1 kilo de file o todo otro pishkado (no minudo)
3 kucharas de prishil pikado
2 tomates
1 sevoya grande
2 kucharas de azeyte
1 piminton kolorado grande
4 dientes de ajo pikado
1/4 de vazo de agua
sal i pimienta a gusto
Preparasion: Kortar el tomat, sin kueros i sin pipitas, minudo minudo, meterlo en una kacharola, en lumbre flosha asta ke se ablanda bueno bueno. De otra parte, kortar la sevoya tajadas, meterla en una sarten de teflon i sufriyirlas asta ke sale toda la agua i se seka, adjustar las dos kucharas de azeyte, el piminton ke fue kortado minudo minudo, el tomat abafado, pimienta, sal i agua, meter todo endjunto ke de un buyor. Echar todo esto sovre el pishkado aresentado de antes en un paylon, adjustar las tres kucharas de prishil, tapar el paylon kon una oja de aluminium i meter al orno ke fue kaentado de antes a 180°. Despues de kinze minutos destapar el paylon i deshar ke se gize asta ke toma una kolor rosha.

PALAMIDA GIZADA
Materiales (2 - 3 porsiones):
2 palamidas
1 safanoria
1 sevoya
4 kucharas de azeyte
1/2 kavesa de apio
1/2 kucharika de sal
1/2 limon
un poko de pimienta preta
Preparasion: Alimpiar i enshaguar bien los pishkados. Kortar en tajadas la sevoya, el apio i la safanoria, i meter todo en un resipiente ondo. Adjustarle la sal i la pimienta, el sumo de limon i media kupa de agua i meterlo todo a buyir. Azer el pishkado puestas, i despues ke el kaldo ya buyo, meterlo enriva de las vedruras i desharlo gizar a lumbre moderada unos vente minutos, metiendo de vez en kuando del kaldo enriva del pishkado. Se sierve kaente.

GIUVECH DE PISHKADO
Materiales (8 porsiones):
1½ kilos de pishkado (palamida, kefal, tono, sazan)
2 kupas de arroz
6½ kupas de agua
6 pimintones (no fuertes)
6 tomates
1/2 kupa de azeyte
5 dientes de ajo pikado
sal i paprika a gusto
Preparasion: Eskojer uno de los pishkados indikados ariva, eskamarlo, kitar las grenyas, enshaguarlo bueno i kortarlo en puestas de dos a tres santimetros de godror. Mundar el arroz, enshaguarlo, eskurrirlo i kozerlo en kuatro kupas de agua, durante diez minutos en lumbre mediana. Kitarlo de la lumbre, enshaguarlo kon agua yelada i eskurrirlo. Meter el arroz en un tifsin de aluminium o pyrex de 35 sms. de diametro, echar por enriva la kupa de azeyte, aresentar los pimintones -sin las pipitas i kortados tajadas-, los tomates kortados en kuatro, el ajo machakado, el pishkado, sal i paprika. Adjustar dos vazos i medio de agua. Meter al orno, en temperatura mediana, por una ora i vente minutos. Servir kaente.

KEFTES DE PISHKADO
Materiales (2 - 3 porsiones):
1/2 kilo de sardela o de file de pishkado
2-3 kucharas de arina de matsa
3 guevos bateados
1 kuchara de prishil pikado
1 sevoya grande
2 dientes de ajo pikado
2 limones
sal i pimienta a gusto
azeyte para friyir
Preparasion: En un resipiente ondo mesklar los guevos, el prishil, la sevoya kortada minudo, la sal, la pimienta i el pishkado ke le fueron kitadas las espinas, fue alimpiado, enshaguado i mulido, aziendo todo este material komo una masa. Kon las manos umidas o kon una kuchara tomar la kantidad ke se kere de esta masa, untarla en arina de matsa o pan rayido i en guevo bateado i friyirla en azeyte bien kaentada de antes. Las keftes se sierven kaentes kon una aregada de limon enriva i al lado agristada (ver en "Salsas").
Si se kere, se pueden aresentar tambien en un paylon, echar por enriva dos kucharas de tomatada dezechas en dos vazos de agua kon el sumo de medio limon, una kuchara de prishil pikado i un poko de sal, i kozer las keftes por sinko o diez minutos.