|
DULSE DE PERA
Materiales:
1 kilo de pera
1/2 kilo de asukar
1/2 limon
Preparasion: Si las peras son grandes se kortan en dos, ma mijor es eskojer peras chikas afin de desharlas enteras kon el paliko, lo ke da mas grasia al dulse. Enshaguarlas i meterlas en agua buyendo asta ke se ablandan, entonses kitarlas de la agua kaente, enshaguarlas kon agua yelada i mundar la kashka. Meter las peras mundadas en un tifsin burakado asta ke se eskurren bien. Entre tanto traer la asukar a punto para azer el sirop, kere dizir kuando se toma un poko del sirop kon la kuchara kale ke kaya gota a gota i no komo agua. Adjustar las peras i el sumo del medio limon al sirop i deshar buyir unos kuantos minutos. Kitar las peras kon kucharon burakado i aresentarlas en un paylon. Deshar el sirop asta ke viene de muevo a punto (en buyendo porke la pera kita agua). Kuando el sirop vino a punto echarlo por ensima de las peras i desharlas dos dias al ayre kuvijadas kon un panyo muy delgado para ke se seken. Despues meterlas en una bocha.
|