pazí/pazil (t.) m.

תרד, תרד ההרים

AVIKAS KON PAZI O ESPINAKA
Materiales (6 - 7 porsiones):
1/2 kilo de pazi o espinaka
2 vazos de avikas
1 kucharika yena de tomatada
1 kuchara no yena de polvo de supa de geyna
sal i pimienta a gusto
1/2 kilo de karne (si se kere)
Preparasion: Meter las avikas en mojo una noche entera; a la demaniana vaziar la agua, kuvijar kon agua limpia i darles un buyor para kitar los gazes. Kuando la agua buye, enshaguar las avikas por segunda vez i meterlas en un tendjere kuvijadas kon agua, adjustar el resto del material, en desparte de la pazi o la espinaka i de la sal. Si se kere se puede meter endjuntos tambien medio kilo de karne echa porsiones. Meter todo a gizar. Kuando las avikas ya se empesan a ablandar, adjustar la sal i la espinaka alimpiada o la pazi ke fue mundada, enshaguada i kortada a un sm. de anchura, inkluzo los ravos, i deshar gizar asta ke la karne, si fue metida, i las avikas se ablandan i se arefinan.

PAZI O ESPINAKA KON ARROZ
Materiales (2 porsiones):
1/2 kilo de pazi o de espinaka
1 sevoya chika
1/3 de vazo de arroz
1 tomat rayido
2 kucharas de sumo de limon
3 kucharas de azeyte
1 kucharika de polvo de supa de geyna
pimienta
Preparasion: Alimpiar bien la pazi o la espinaka, enshaguarla i eskurrirla, kortarla de un santimetro de anchura djuntos los ravos. Kortar la sevoya, meterla kon las tres kucharas de azeyte a abafar adientro de una kacharola. Adjustar la pazi o la espinaka, el arroz, el tomat rayido i la agua ansi ke la sal, el limon, la pimienta i el polvo de supa de geyna. Gizarlo todo asta ke el arroz se ablanda. Es una komida liviana i muy saludoza.

KEFTES DE PAZI O ESPINAKA KON KEZO
Materiales (20-25 keftes):
1/2 kilo de pazi o de espinaka
100 gramos de kashkaval o kezo rayido
2-3 guevos
1 vazo de arina o
2 revanadas de miga de pan moreno
1/2 vazo de leche
sal i pimienta a gusto
azeyte para friyir
Preparasion: Eskaldar la pazi o espinaka, eskurrirla i esprimirla, kortarla minudo djuntos kon los ravos i mesklarla kon el resto del material. Meter a kaentar la azeyte en una sarten, kuando esta bastante kaente, tomar kon una kuchara de supa de la meskla, darle la forma de una kefte i friyirla de las dos partes.

YAPRAKES DE PAZI
Materiales (6 - 8 personas):
1 kilo de pazi
2 vazos de agua
1/2 vazo de azeyte
1/2 kilo de karne mulida
1/2 vazo de arroz
1/2 vazo de prishil pikado
1 limon
sal i pimienta a gusto
1/2 vazo de arroz
1/2 vazo de prishil pikado
1 limon
sal i pimienta a gusto
Preparasion: Kitar los ravos del pazi, enshaguar kon muncho kudio las ojas ke no se buraken, despues desharlas en agua kaente uno o dos minutos para ablandarlas, eskurrirlas i kitar kon delikateza los tronchos godros de en medio. De otra parte, mesklar bien el arroz mundado i enshaguado, el prishil, la karne mulida, la sal i pimienta. Meter las ojas duvladas (la parte briyando para afuera) enriva la tavla de gizar, tomar un poko del gomo, meterlo en la punta de la oja i duvlar. Duvlar tambien un sm. de kada parte i arrodear bien serrado. Aresentar los yaprakes en un paylon o kasuela uno al lado del otro, echar por enriva la azeyte, el sumo del limon, la agua i la sal, tapar i deshar kozer 25-30 minutos o asta ke el arroz se ablanda. Si se kere se puede adjustar, antes de abashar de la lumbre, un guevo bateado ke da mas savor a la komida.

PRASIFUCHI DE PAZI O ESPINAKA
Materiales (6 - 8 porsiones):
1 kilo de pazi o espinaka
4 guevos
2 patatas o
2 revanadas de pan
2 vazos de kashkaval rayido
sal a gusto
Preparasion: Lavar el pazi o la espinaka bien bien, kortar no muy delgado i echarlo adientro de un tendjere kon agua buyendo, eskaldar sinko minutos, sovre todo para ke se ablanden los tronchos. Eskurrir, enshaguar kon agua yelada i esprimir bien. En un resipiente mesklar bien el pazi, las patatas kochas i echas puree o la miga del pan mojada i bien esprimida, los guevos bateados, el kezo i la sal. Kuvrir el fondo de un paylon kon azeyte i meterlo a kaentar. Despues ke la azeyte esta kaente echar adientro el prasifuchi i aresentar bien de todas las partes para ke este igual. Echar por enriva una aregada de azeyte i meter al orno ke ya fue kaentado de antes a 180° - 200° por 45 minutos. El prasifuchi esta pronto kuando toma una kolor rosha i los bodres se despegan del paylon.