patata f.

תפוח אדמה

KEFTES DE PATATA KON KARNE
Materiales (6 porsiones):
7-8 patatas grandes
300 gramos de karne mulida
2 guevos
sal a gusto
arina o polvo de matsa
azeyte para friyir
Preparasion: Mundar, lavar i eskaldar las patatas. Kuando estan bien blandas azerlas puree i desharlas yelar un poko. Adjustar la karne i la sal i finyir asta ke se obtiene una meskla omojena.
Kon manos umidas tomar balikas de la grandor de un guevo i entre las dos manos formar las keftes. Untarlas en la arina i el guevo i friyirlas en la azeyte ke ya fue kaentada de antes. Meter las keftes sovre un papel absorbiente para embever la azeyte i servirlas kaentes.

SATES DE GEYNA KON PATATAS
Materiales (4 - 5 porsiones):
1/2 kilo de sates de geyna limpios
1 sevoya grande, kortada en tajadas
4-5 patatas
100 gramos de salsa de tomat
1½ vazos de agua
sal i pimienta a gusto
azeyte para friyir
Preparasion: Meter las tajadas de sevoya a friyir un poko, adjustar los sates de geyna, sufriyir un poko kon la sevoya, mesklar la salsa de tomat kon la agua, adjustar la sal i la pimienta. Meter a gizar. Despues del primer buyor abashar el fuego i deshar gizar una ora i kinze minutos en fuego flosho. Adjustar kuatro o sinko patatas mundadas, enshaguadas i kortadas kuartos grandes i deshar otros vente minutos. Servir kaente.

BIMUELOS DE MATSA, PATATA I KEZO
Materiales:
4 matsot
2 patatas kochas
1 vazo de kezo duro rayido
4 guevos bateados
sal a gusto
azeyte para friyir
Preparasion: Esprimir bien i dizminuzar adientro de un paylon las matsot ke ya fueron metidas en mojo i ablandadas. Adjustar la puree ke fue echa de las patatas kochas, el kezo rayido, la sal i los guevos bateados. Mesklar bien todo el material i friyir komo fue eksplikado en la recheta presedente.

BIMUELOS DE PATATA KON KEZO
Materiales:
4 patatas kochas
1 vazo de kezo rayido (kashkaval, parmezan, etc.)
3 guevos bateados
sal a gusto
azeyte para friyir
Preparasion: Mesklar las patatas echas puree, el kezo rayido, los guevos bateados, la leche i la sal. Kaentar bien la azeyte i kon manos umidozas o kon una kuchara tomar la kantidad de un bimuelo, darle la forma redonda i friyirlo de las dos partes asta ke deviene rosho. Kitarlo de la sarten i meterlo sovre un papel ke embeve azeyte. Los bimuelos se komen kaentes kon arope o kon otro sirop.

PATATAS REYNADAS
Materiales (6 - 8 porsiones):
5 patatas de una largura de 7 sms., mas largas ke anchas
300 gramos de karne mulida
1 sevoya grande
1 diente de ajo
1 guevo
2 kucharas de prishil
2 kucharas de salsa de tomat
2 vazos de agua
azeyte i arina para friyir
sal i pimienta a gusto
Preparasion: Mundar las patatas, kitar una tajada delgada de debasho i otra de enriva para ke puedan ser aresentadas en el tefsin sin difikultad. Kortar kada patata en sesh tajadas, en todo tres pares de tajadas de kada patata (kada 2 tajadas no deven ser kortadas asta la fin, kere dizir ke las puntas deven kedar apegadas para ke la karne no salga afuera). Mesklar la karne kon la sevoya kortada minudo, el prishil pikado i el ajo machakado i amasar bien bien. Kuando esta bien mesklado, tomar la kantidad de karne menesteroza, ahajarla entre las manos i meterla entre las dos tajadas de patata. Untar las patatas reynadas en la arina i en el guevo bateado i friyirlas. Aresentarlas en el tefsin, en primero las primeras tajadas ke fueron kitadas i despues las patatas reynadas i fritas; echar por enriva la salsa de tomat dezecha en dos vazos de agua, un poko de sal i un poko de prishil pikado i meter a gizar en lumbre suave asta ke la patata se ablanda.