|
PASTEL DE KARNE
Materiales (6 - 8 porsiones):
Para la masa:
2½ kupas de arina
150 gramos de margarina ablandada
1 kuchara de azeyte
1 kuchara de vinagre
1/2 kuchara polvo de soda
1/4 de kupa de agua
50 gramos de susam
1 preza de sal
Para el gomo:
1/2 kilo de karne mulida
1 sevoya grande
2 guevos haminados
2 kucharas de prishil pikado
1 kuchara de agua
2 tomates
1 guevo
sal i pimienta a gusto
Preparasion de la masa: Adientro de un resipiente serner la arina kon la sal. Azer un foyo en medio, adjustar la azeyte i la margarina ablandada i empesar a azer la masa, adjustando avagar avagar el vinagre i la agua kon la soda. Amasar bien i kuando la masa esta pronta emburujarla en una oja de nylon i desharla en el frijider por una ora.
Preparasion del gomo: Meter la sevoya a friyir asta ke toma una kolor rosha klara, adjustar la karne i sufriyir endjuntos, en dizminuzando la karne de vez en kuando, ke no se aga bultos. Adjustar la sal, la pimienta, el prishil, el tomat sin el kuero i sin las pipitas, kortado minudo i los guevos haminados kortados minudo i mesklar bien.
Preparasion del pastel: Tomar la masa, despartirla en dos, avrir la metad i meterla en un tefsin untado kon margarina. Meter ensima el gomo de manera igual por todas las partes, tapar kon la otra metad de la masa i apegar los bodres en apretando kon los dedos. Untar por ensima kon el guevo mesklado kon un poko de agua i un poko de susam. Meter a orno moderado de 180° asta ke toma una kolor rosha i se despega de los bodres.
|