orno m.

תנור, כבשן, כור

akavado de salir del orno

טרי מן התנור - זה אך הסתיים ייצורו

avrir la boka un orno

לפתוח פה, לגעור ולגדף בגסות

boka de orno

פי הכבשן

forno

192740

MAKARON KON KEZO I LECHE AL ORNO
Materiales (6 porsiones):
1 paketo de makarones (o 350 gramos)
2 guevos
250 gramos de kezo blanko
1/2 vazo de kezo rayido (kashkaval
o todo otro kezo pikante)
1/2 vazo de leche
4-5 kucharas de azeyte
1 kucharika no muy yena de sal
Preparasion: Buyir en una oya dos litros de agua kon una kucharika de sal. Meter adientro el makaron i eskaldarlo asta ke se ablanda un poko. Abashar de la lumbre, vaziar la agua kaente i enshaguar el makaron bien, kon agua yelada, debasho del chorro. Untar un pyrex de 20 x 30 sms. kon margarina; mesklar en una chanaka el makaron kon todos los ingredientes i vaziarlo en el pyrex. Meterlo al orno ke ya fue kaentado de antes a 240°, abashar un poko la lumbre i deshar kozer unos 60 minutos o asta ke el makaron toma por ensima una kolor rosha.

IGADO KON ARROZ AL ORNO
Materiales (4 porsiones):
1/2 kilo de igado de vaka
4-5 sevoya, medianas
1½ vazos de agua
2 vazos de arroz
3 vazos de agua para el arroz
2 kucharas yenas de prishil pikado minudo
paprika, sal i pimienta a gusto
Preparasion: Meter agua a buyir. Kuando buye, meter adientro el igado asta ke se apreta. Kitarlo del buyor, enshaguarlo kon agua kaente, para ke no se endureska al gizar, deshar eskurrir la agua i kortar el igado minudo, en chikos kubos de un sm. sovre un sm. Mundar las sevoyas, enshaguarlas, pikarlas i friyirlas asta ke toman una kolor rosha. Echar adientro de la sevoya el igado i adjustar un vazo o vazo i medio de agua, prishil i pimienta.Deshar ke se gize avagar avagar asta ke el igado se ablanda i se embeve la agua. Mundar el arroz, enshaguarlo i eskurrirlo, mesklarlo kon el igado i la sevoya, adjustar la sal, el prishil i los tres vazos de agua, meterlo todo en un resipiente ke va al orno i desharlo en el orno, kaentado de antes a 180°, asta ke el arroz se ablanda.

PISHKADO GIZADO AL ORNO
Materiales (6 - 8 porsiones):
2 paketos de file de pishkado
2 tomates no muy grandes
1 sevoya grande
2 kucharas de azeyte
1 gamba
4-5 dientes de ajo
1/4 vazo de agua
2 kucharas de prishil pikado
pimienta, sal i paprika fuerte a gusto
Preparasion: Kitar el kuero i las pipitas de los tomates, meter en un paylon i kozer a lumbre flosha asta ke se ablanda enteramente. De otra parte mundar, enshaguar i kortar la sevoya en tajadas, meterla en una sarten de teflon ke ya esta sovre el fuego, ma sin azeyte, asta ke se seka. Adjustar las dos kucharas de azeyte, la gamba kortada pedasos, los dientes de ajo kortados muy minudo, el tomat, la pimienta, paprika, sal i agua. Asperar asta ke toda en una empese a dar buyor. Kuando buyo, echar todo sovre los pedasos de pishkado ke ya fueron aresentados de antes en un paylon i deshar gizar avagar avagar en lumbre muy flosha (no muncho tiempo porke el file se giza muy presto). Sinko minutos antes de abashar de la lumbre echar por enriva dos kucharas yenas de prishil pikado muy minudo.

PISHKADO KON VEDRURAS AL ORNO
Materiales (4 porsiones):
1 kilo de file o todo otro pishkado (no minudo)
3 kucharas de prishil pikado
2 tomates
1 sevoya grande
2 kucharas de azeyte
1 piminton kolorado grande
4 dientes de ajo pikado
1/4 de vazo de agua
sal i pimienta a gusto
Preparasion: Kortar el tomat, sin kueros i sin pipitas, minudo minudo, meterlo en una kacharola, en lumbre flosha asta ke se ablanda bueno bueno. De otra parte, kortar la sevoya tajadas, meterla en una sarten de teflon i sufriyirlas asta ke sale toda la agua i se seka, adjustar las dos kucharas de azeyte, el piminton ke fue kortado minudo minudo, el tomat abafado, pimienta, sal i agua, meter todo endjunto ke de un buyor. Echar todo esto sovre el pishkado aresentado de antes en un paylon, adjustar las tres kucharas de prishil, tapar el paylon kon una oja de aluminium i meter al orno ke fue kaentado de antes a 180°. Despues de kinze minutos destapar el paylon i deshar ke se gize asta ke toma una kolor rosha.

SARDELAS AL ORNO
Materiales (4 - 6 porsiones):
1 kilo de sardelas
1 piminton vedre grande
1 sevoya kortada tajadas
4 tomates
sal i pimienta a gusto
Preparasion: Mesklar los tomates sin el kuero i las pipitas i pikados, el piminton enshaguado i sin las pipitas i la sevoya kortada tajadas. Meterlos a abafar. Kuando esta pronto, aresentar la metad en un paylon. Kitar las eskamas, las espinas i las kavesas de las sardelas i enshaguarlas bien kon agua yelada. Asezonarlas kon sal i pimienta. Despues meterlas aviertas kon la parte blanka para ariva, en un paylon sovre los otros materiales. Adjustar ensima la otra metad de las vedruras abafadas, sal i pimienta. Deshar ke todo de un buyor en el gaz, echar ensima una aregada de azeyte i meter al orno kaentado a 180° - 200° por 15-20 minutos.

BIMBRIYOS AL ORNO
Materiales:
6 bimbriyos
1½ vazos de asukar
1 vazo de agua
1 limon
krema batida (si se kere)
Preparasion: Lavar bien los bimbriyos, kortarlos en pedasos, a la larga, i kitarles el korason. Meterlos en un resipiente i kuvrirlos kon agua i el sumo de un limon. Pasada una ora, kitar los bimbriyos de la agua i meterlos en un Pyrex, la parte de la kashka para ariva, kon medio vazo de agua i medio vazo de asukar i meterlos a orno moderado durante vente i sinko minutos. Entonses kitarlos del orno, aboltarlos, echar por enriva el resto de la asukar i la agua i meter de muevo al orno por otros vente minutos. Desharlos yelar i servirlos kon krema batida.

MANSANAS AL ORNO
Materiales (6 porsiones):
6 mansanas
3 kucharas de asukar
1 kucharika de kanela
1 kuchara de pasas sultanina
3 kucharas de muez mulida
Preparasion: Kon la punta de una kucharika o kon un kuchiyo no muy agizado kavakar las mansanas, kitar el korason, las pipitas i un poko de la pulpa. Enshaguarlas i inchirlas bien kon el material ke fue mesklado de antes, meterlas en pie en un plato ke va al orno, polvorear por ensima un poko de asukar i meterlas al orno ke fue kaentado a 180°, asta ke las mansanas se ablandan ma no piedren sus forma.