muez f.

אגוז

muez de india

קוקוס

muez-muskada/mashkada

אגוז מוסקט

almuez

19030

nuez

336420

NOGADA O SALSA DE MUEZ
Materiales:
1 vazo de muez mulida
1 revanada de pan mojado, la miga
1 vazo de kaldo de pishkado
1 limon, el sumo
1 klara de un guevo
prishil pikado
Preparasion: Mesklar en una kacharola la muez mulida kon la miga de pan mojada, el prishil i la klara de un guevo. Inkorporar a esta meskla el kaldo de pishkado i adjustar el sumo de limon. Meter a kozer la kacharola a fuego moderado kinze minutos, meneandolo todo kon una kuchara de tavla asta ke se obtiene una salsa espesa. La nogada se sierve kon pishkado.

PISHKADO GIZADO KON MUEZ O ALMENDRA
Materiales (4 porsiones):
1 kilo de pishkado ke se puede azer puestas
(kefal, sazan, file, etc.)
3-4 dientes de ajo pikado
1 kuchara yena de prishil pikado
2 vazos de agua
2 kucharas de azeyte
1/2 vazo de muez o almendra mulida godro
1/2 limon
sal i pimienta a gusto
Preparasion: Alimpiar i enshaguar el pishkado, kortarlo en puestas i meterlo a eskurrir. Aresentarlo en un paylon. De otra parte, aprontar en una kacharola la agua, la azeyte, el ajo, el prishil, el sumo de limon, la sal i la pimienta i meter al gaz ke de un buyor o dos. Despues ke buyo, echarlo todo por enriva del pishkado i meter a gizar vente minutos. Antes de servir esparzir por enriva la muez o la almendra machakada.

TORTA DE AVIANAS O MUEZES MULIDAS
Materiales:
3 vazos de arina
1 paketiko de "Baking-Powder"
1/2 paketo de margarina
1 vazo de leche
1½ vazos de asukar
2 guevos
1 vazo de avianas o muezes mulidas godro
1 kuchara de kashka de limon o de pertukal rayida
Preparasion: Buyir la leche, echar adientro la margarina i la asukar i dezazerla bien. Despues ke fue dezecha meter en un paylon la leche i los guevos, bien bateados, adjustar la arina avagar avagar en mesklando bien kon una kuchara de palo, adjustar la aviana o la muez i mesklar de muevo bien. Untar un paylon kon margarina i meter adientro la preparasion. Kaentar el orno a 210° - 240°, antes de meter la torta abasharlo a 180° i deshar la torta asta ke toma una kolor rosha. Para estar siguro ke la torta esta pronta, se mete adientro un paliko. Si salio seko es ke la torta ya esta a punto.

MUSTACHUDOS DE ALMENDRA O MUEZ
Materiales:
1½ kupas de muez (o almendra) machakada
1/2 kupa de arina
1/2 kupa de asukar
1/2 kucharika de kanela
1 guevo bateado
asukar pudra
Preparasion: Mesklar i amasar todo muy bien. Tomar pedasos de la grandor de una muez, darles la forma de una bala o de una kulevrika, i arodearlos despues adientro de la asukar pudra.