mogado m.

עוגית מרציפן, רקיק מעויין

MOGADOS DE ALMENDRA (MASAPAN)
Materiales:
1/2 kilo de almendra sin kashka
2 vazos de asukar pudra
1 guevo bateado
Preparasion: Buyir agua en una oya, echar adientro las almendras, tapar la oya, amatar la lumbre i desharlas uno poko de tiempo (5-7 minutos) asta ke se puede kitar el kuero de las almendras. Mundarlas, enshaguarlas i meterlas a sekar. Kuando se sekaron, molerlas i pasarlas a un resipiente, mesklarlas kon la asukar i el guevo. Amasar todo bien. Kuando la masa esta pronta, tomar un poko kon las manos ke fueron mojadas kon sumo de limon, dar la forma de un palo de la godror ke se kere i kon un kuchiyo kortar en forma de mogados. Aresentar en una tava i deshar sekar un dia o dos. Meter los mogados en una bocha serrada, ansi pueden turar mas de un mez. Se pueden guadrar en el frijider tambien.

MOGADOS DE BIMBRIYO
Materiales:
800 gramos de bimbriyos
2 vazos de asukar
2 limones
1½ vazos de agua
Preparasion: Mundar la kashka de los bimbriyos, kortarlos en kuartos, kitarles las pipitas i el korason, enshaguarlos i kozerlos sin tapar en fuego moderado, en un vazo i medio de agua asta ke se ablandan, mas o menos media ora. Eskurrirlos i desharlos yelar en tefsin burakado, despues azerlos puree en pasandolo por mulino o kon un piron o en el blender. Mezurar la kantidad de puree obtenida, adjustar la mizma kantidad de asukar ansi ke el sumo de un limon para dos vazos de puree de bimbriyo. Meter todo en una kacharola i kozer en fuego moderado. Mesklar de vez en kuando, kuando se esta koziendo, asta ke no keda likido del todo i se obtiene una masa ke se despega fasilmente de la kacharola. Mojar el fondo de un paylon no ondo, kon el sumo de medio limon i aresentar de manera igual la masa de bimbriyo en estando ainda kaente. Meter tino a ke este lizo lizo, en echando por enriva el sumo del ultimo medio limon. Taparlo kon un pedaso de gaza i meterlo al aire unos kuantos dias asta ke se seka bueno bueno. Entonses se kortan mogados. Este dulse se konserva afuera del frijider mas de tres mezes, en el frijider mizmo un anyo.

MOGADOS DE SUSAM
Materiales:
1 vazo de susam
2 kucharas de asukar
1 kuchara de miel
1 punyado de almendras medias
Preparasion:
Tostar un poko el susam i las almendras. En una kacharola meter la asukar i la miel i kozer sovre lumbre fuerte asta ke se dezazen. Kuando devienen un sirop espeso echar adientro el susam i las almendras tostadas, mesklar bien dos o tres minutos. Antes de esto alimpiar bien la laja de la kuzina, untar una parte de eya kon azeyte i eskudiar enriva el kontenido de la kacharola. Kon una kuchara de tavla, tambien untada de azeyte, enderecharlo bueno, kortarlo en forma de mogados i desharlos yelar, despues de lo kualo se pueden kitar fasilmente i aresentar en un plato de vidro.