|
LOKMAS
Materiales:
Para las lokmas:
500 gramos de arina
2 vazos de agua tivia
40 gramos de levadura
3 kucharas de asukar
1 guevo
1/2 kucharika de sal
azeyte para friyir
Para el sirop:
2 kucharas de miel
1 vazo de asukar
1/2 kucharika de sumo de limon
1/2 vazo de agua
Preparasion de las lokmas: Meter en una oya la asukar, la levadura ke fue dezecha de antes en un poko de agua tivia, el guevo i lo ke kedo de la agua. Mesklar todo. Adjustar la arina avagar avagar asta ke todo se meskla bueno bueno. Azer una masa muy blanda (se puede mesklar en el mikser de diez a kinze minutos) i desharla ke se venga tres o kuatro oras. Kuando la masa esta pronta, meter azeyte en una sarten bastante onda, tres o kuatro sms., para ke pueda kuvrir las lokmas. Kaentar la azeyte bueno bueno en lumbre fuerte i empesar a eskudiar kon una kucharika bien yena de la masa a la azeyte. Friyir las lokmas de las dos partes, kitarlas kon kuchara burakada i meterlas a eskurrir en un tifsin burakado.
Preparasion del sirop: Meter todos los materiales del sirop en una oya sovre lumbre mediana, desharlo buyir sinko minutos i abasharlo.
Kuando las lokmas estan prontas meter ensima el sirop i un poko de kanela. Komer las lokmas freskas i kaentes.
|