limón m.

לימון

azerse un limón

להחוויר; ללבוש סבר תוקפני

la kara limón

חיוור כמת

limón puro

חמוץ מאוד

limón tuzú

חומצת לימון

TRUSHI DE LIMON
Materiales:
2 kilos de limones amariyos
150 gramos de sal delgada (mas o menos un vazo)
100 gramos de paprika fuerte o dulse
1/2 vazo de azeyte
1 limon para sumo
Preparasion: Enshaguar bien los limones i kortar tajadas de un sm. de anchura. Mesklar la sal i la paprika i untar kada tajada en esta meskla. Aresentar todas las tajadas en una bocha de vidro i serrarla por tres dias. En el interval de este tiempo el limon solta sumo. Despues de tres dias avrir la bocha i adjustar el sumo de un limon i medio vazo de azeyte. El limon esta pronto para komer despues de diez o dodje dias.

SUPA DE GUEVO I LIMON
Materiales (6 porsiones):
1/2 vazo de arroz
1 guevo entero
1 yema de guevo
1/4 de vazo de sumo de limon
8 vazos de agua
1 kuchara yena de polvo de supa de geyna,
partes de la geyna komo alas, garon, etc.
Preparasion: Meter a kozer la geyna, adjustar el arroz i deshar kozer asta ke el arroz se ablanda. Adjustar la sal i el polvo de supa de geyna. Batear bien el guevo i la yema i adjustar el sumo de limon. Batear de muevo todo en una i adjustarlo a la supa, en mesklando kontinualmente. Kuando esta para buyir, kitar del fuego i deshar ke repoze unos kuantos minutos antes de servir.

PISHKADO KON GUEVO I LIMON
Materiales (4 porsiones):
1 kilo de pishkado (kefal, chipura,
sardela o todo otro pishkado)
2 guevos
2 kucharas de azeyte
1 kuchara de prishil pikado
1 limon
sal i pimienta a gusto
Preparasion: Eskamar el pishkado, alimpiarlo i enshaguarlo i si es grande se puede azer puestas. Meter sal por enriva i desharlo eskurrir en tefsin burakado. Aresentarlo en un paylon, kuvrirlo kon agua, adjustar el sumo de medio limon, la azeyte, el prishil, la sal i la pimienta. Deshar kozer todo sovre lumbre moderada kinze minutos. Despues abasharlo de la lumbre, batear los guevos kon el sumo del otro medio limon i echarlos por enriva del pishkado en lo ke esta ainda kaente. Se sierve kaente o yelado.

SHAROPE
Materiales:
2 kupas de asukar
1/2 kupa de agua
1/2 kuchara de sumo de limon
Preparasion: Meter la asukar kon la agua en un resipiente de nirosta i desharla dos oras, asta ke la asukar se dezaze mas o menos. Despues se mete el resipiente sovre lumbre fuerte i se empesa a menear kon una kuchara de tavla asta ke empesa a buyir. De vez en kuando se kita la eskuma ke se forma enriva. Kuando empeso a buyir, se adjusta el limon i se desha buyir asta ke la asukar viene a punto, en aziendo buchichas fuertes.
Para ver si la asukar vino en punto se toma kon una kuchara un poko del sharope i se desha kayer sovre un plato. Si en kayendo se aze un ilo es ke el punto ya esta bueno. Entonses abashar el resipiente de la lumbre i desharlo tiviar (mas yelado ke tivio). Despues kon una kuchara de palo menear el sharope, empesando de en medio, todo el tiempo en la mizma direksion, kon fuersa i prestez, asta ke deviene blanko komo la leche.
Kon manos umidozas kitar el sharope del resipiente, finyirlo bien, ke no kede kuajones, meterlo en un plato tapado kon un panyaliko blanko i umidozo i guadrarlo en el frijider. Antes de servir se puede mesklar, segun el gusto, kon almastiga machakada, almendra tostada i machakada, muez kortada menuda, shokolata rayida, kakao, muez de koko rayida, fistokis kortados minudo o kashka de limon o portokal rayida.

SHURUP DE SUMO DE LIMON I PORTOKAL
Materiales:
6 portokales
6 limones
asukar
Preparasion: Kortar i esprimir bien los limones i las portokales. Mezurar la kantidad del sumo i adjustar la mizma kantidad de asukar (para kada vazo de sumo un vazo de asukar) i meterlo todo en un resipiente. Kuando empesa a buyir, abashar la lumbre i deshar buyir otros kinze minutos. Abashar de la lumbre, deshar el shurup bien yelar i meterlo en bokales limpios i bien sekos. Este shurup puede ser konservado en el frijider muncho tiempo.

LIMONADA
Materiales:
5-6 limones
8 vazos de agua
1/2 vazo de asukar
Preparasion: Esprimir los limones, adjustar el sumo i el medio vazo de asukar a los ocho vazos de agua, meneando bien kon una kuchara. Meter en un jarro, desharlo en el frijider y servir bien yelado.