kopeta f.

קציצת בשר; ממתק נוגט אגוזים/שקדים (לפורים)

kupeta

281850

SUPA DE KARNE KON KOPETIKAS
Materiales (6 porsiones):
1/2 kilo de karne de vaka o kodrero
2 guesos kon tutano
1/2 kilo de karne mulida
2-3 kucharas de azeyte para friyir
1/2 vazo de arroz
3 kucharas de prishil pikado
sal i pimienta a gusto
Preparasion: Enshaguar la karne kortada pedasos i los guesos, meterlo todo en una kacharola grande i kuvijar kon dos litros de agua yelada. Kuando buyo, kitar kon una kuchara la eskuma ke sale enriva i da kolor suzya a la supa. Adjustar sal i pimienta, deshar kozer en lumbre flosha serka de una ora i media o asta ke la karne se ablanda, todo el tiempo tapado. Entremientres adjustar sal i pimienta a la karne mulida, amasar bueno bueno kon las manos umidozas, azer balikas de karne de la grandor de una muez i friyir de manera muy liviana en la azeyte. Media ora antes ke la supa tenga ke ser servida echar adientro la kopetikas i kinze minutos mas tadre el arroz. Gizar asta ke el arroz se ablanda. Antes de servir la supa se esparze enriva de kada plato prishil pikado minudo.

KOPETIKAS DE KARNE KON PUREE DE BERENDJENA
Materiales (6 - 7 porsiones):
Para la puree de berendjena:
3 berendjenas medianas
3 kucharas de azeyte
3-4 dientes de ajo
una preza de asukar
sal a gusto
Para las kopetikas:
1/2 kilo de karne mulida
1 revanada de pan moreno seko
1 kuchara de prishil pikado
1 guevo bateado
sal i pimienta preta a gusto
Preparasion: Asar las berendjenas bien de todas las partes i mundarlas debasho del chorro de la fuente kon agua yelada. Meterlas a eskurrir bien bien, despues pikarlas kon un kuchiyo. En una kacharola kaentar la azeyte, meter los dientes de ajo machakados ke se friygan un poko; adjustar la berendjena pikada, la sal i la preza de asukar. Mesklar bien i meter a gizar por media ora en lumbre flosha. De otra parte, mesklar en otra kacharola el pan dizminuzado, ke antes fue metido en mojo y bien esprimido, kon la karne, la sal, la pimienta preta i el prishil. Amasar bien asta ke todos los materiales se mesklan el uno kon el otro i despues kon manos un poko mojadas azer kopetikas chikas, de la grandor de una muez. Meterlas adientro de la puree de berendjena, tapar la kacharola i gizar en lumbre flosha. Despues de media ora gostar, si falta algo adjustarlo. Meter al orno por otros kinze minutos. Se kome kaente.

KOPETIKAS DE ARROZ AL UZO DE SILIVRI
Materiales (4 - 5 porsiones):
500 gramos de karne mulida
1/3 de vazo de arroz
1 sevoya
2-3 dientes de ajo
1 guevo
3 tomates blandos
1/2 kucharika de sal
pimienta preta a gusto
Preparasion: Rayer el tomat i la sevoya, ahajar el ajo, mesklar el tomat, la sevoya, el ajo, el guevo ansi ke el arroz ke fue alimpiado, enshaguado i eskurrido, kon la karne mulida, sal i pimienta, mesklar bien asta ke se une todo i deviene una masa. Estonses tomar pedasos, azer balikas de la grandor de un guevo chiko. Friyirlas muy poko de las dos partes en una sarten ancha. Tapar la sarten, deshar kozer avagar avagar kon su bafo en lumbre flosha asta media ora. Amatar la lumbre, ma no destapar. Las kopetas estan prontas kuando soltan kaldo i ke los arrozes salen de eyas komo punchones.

KOPETAS DE PECHO DE GEYNA
Materiales (4 porsiones):
1/2 kilo de karne de pecho de geyna mulida
1 guevo
1 revanada de pan mojada
1 sevoya grande pikada
1 kuchara de prishil pikado
1 diente de ajo ahajado
1 kuchara de margarina o godrura de geyna
1 kucharika de polvo de supa de geyna
1/2 vazo de agua (para el kaldo)
una preza de komino
sal i pimienta a gusto
azeyte para friyir
Preparasion: Mojar las manos i mesklar todos los materiales bien. Azer kopetas, friyirlas en la azeyte kaentada de antes i aresentarlas en un resipiente. Mesklar la kucharika de polvo de supa de geyna kon el medio vazo de agua, adjustar a las kopetas i deshar kozer en lumbre muy moderada kaje una ora. Adjustar un poko de agua kada vez ke se embeve. A la fin las kopetas deven kedar sin kaldo, en sus azeyte.