|
KEFILIKOS
Materiales:
800 gramos de arina
1 paketo de margarina
1 vazo de azeyte
1 vazo de leche
1 paketo de "Baking-Powder"
marmelada
Preparasion: Kortar la margarina pedasikos i mesklarla bien bien kon la arina entre las dos manos. Adjustar el resto de los materiales afuera de la marmelada, azer una masa suave i desharla repozar media ora. Despartir la masa en ocho panetes, avrir kada panete komo un plato i kortarlo en ocho, de manera ke de toda la masa deven salir sesenta i kuatro kefilikos. Meter un poko de marmelada sovre la parte ancha de la masa i arodearla de tal manera ke la punta de la parte estrecha kede por enriva. Se arodean despues komo una media luna i se enfornan en orno kaentado a 180° asta ke toman una kolor rosha klara. Antes de servir, polvorear por ensima asukar pudra.
|