kezo m.

גבינה

de kezo

חלבי

kezo blanko

גבינה לבנה

kezo de kaldera

גבינת צאן מלוחה

kezo de piesa

גבינה קשה משומרת במלח

kezo de sandila (gr.)

גבינה תוצרת בית שמכינים באמצעות בד

kezo endjarrado

גבינה שמנה וקשה מצופה במלח

kezo fresko

גבינה לבנה (רכה)

kien se komió el kezo?- los ratones

תשובה פשטנית לשאלה סבוכה - נאמר כלפי מי שמנסה לפשט את הדברים ללא יסוד

mansevo de kezo fresko

אדם רכרוכי

tomarselo kezo

להפגע, להעלב, לקחת את הדברים קשה

vender el kezo

להתבטא בלי מעצורים, לומר כל מה שיש על הלב

KEFTES DE PAZI O ESPINAKA KON KEZO
Materiales (20-25 keftes):
1/2 kilo de pazi o de espinaka
100 gramos de kashkaval o kezo rayido
2-3 guevos
1 vazo de arina o
2 revanadas de miga de pan moreno
1/2 vazo de leche
sal i pimienta a gusto
azeyte para friyir
Preparasion: Eskaldar la pazi o espinaka, eskurrirla i esprimirla, kortarla minudo djuntos kon los ravos i mesklarla kon el resto del material. Meter a kaentar la azeyte en una sarten, kuando esta bastante kaente, tomar kon una kuchara de supa de la meskla, darle la forma de una kefte i friyirla de las dos partes.

PIMINTONES ASADOS, INCHIDOS DE KEZO I FRITOS
Materiales (6 porsiones):
12 pimintones vedres o kolorados
2-3 guevos
azeyte para friyir
Para el gomo:
150 gramos de kezo de kaldera
150 gramos de kashkaval rayido
150 gramos de otro kezo duro al gusto
2 yemas de guevo, bateadas
Preparasion: Asar los pimintones en el gril, boltandolos de todas las partes, ke se asen ma ke no se kemen. A mizura ke se van asando meterlos en una salatiera tapada o en una papelera kon la bokadura serrada. Desharlos yelar i entonses kitar el kuero de enriva, azer una kortadura al deredor de la kavesa i kitar las pipitas de los pimintones.
Mesklar bien bien todo el material del gomo i meterlo a repozar al frijider por una ora. Inchir los pimintones kon el gomo, metido bien adientro para ke no se fuyga en friyendo. Aresentarlos en una tava, taparlos i meter de muevo al frijider por una ora.
Meter azeyte en una sarten i empesar a kaentarlo sovre el gaz, entremientres batear los guevos, untar los pimintones i friyirlos de todas las partes. Se pueden komer kaentes o tivios.

MAKARON KON KEZO I LECHE AL ORNO
Materiales (6 porsiones):
1 paketo de makarones (o 350 gramos)
2 guevos
250 gramos de kezo blanko
1/2 vazo de kezo rayido (kashkaval
o todo otro kezo pikante)
1/2 vazo de leche
4-5 kucharas de azeyte
1 kucharika no muy yena de sal
Preparasion: Buyir en una oya dos litros de agua kon una kucharika de sal. Meter adientro el makaron i eskaldarlo asta ke se ablanda un poko. Abashar de la lumbre, vaziar la agua kaente i enshaguar el makaron bien, kon agua yelada, debasho del chorro. Untar un pyrex de 20 x 30 sms. kon margarina; mesklar en una chanaka el makaron kon todos los ingredientes i vaziarlo en el pyrex. Meterlo al orno ke ya fue kaentado de antes a 240°, abashar un poko la lumbre i deshar kozer unos 60 minutos o asta ke el makaron toma por ensima una kolor rosha.

BUREKITAS DE KEZO I GUEVO O DE HANDRAJO
Materiales:
Para el gomo regular:
1 guevo bateado
150 gramos de kashkaval rayido
50 gramos de kezo blanko fresko
Para el gomo "handrajo":
1 sevoya
1 berendjena grande
2 tomates
un poko de sal
Para la masa:
5 kupas de arina
1 kupa de azeyte
1 kupa de agua
1 kucharika de soda
un poko de sal
Preparasion: Asar la berendjena, lavarla debasho el chorro i desharla eskurrir diez minutos. Pikarla i adjustar la sevoya kortada minudo i frita, los tomates rayidos i la sal. Azer la masa para las burekitas en amasando bien todo los materiales, i desharla repozar por dos oras en el frijider. Despues avrir una fila de la kuala se korta redondikos kon una kupa i meter ensima de un lado, una kuchara del gomo i serrar por enriva kon la masa, dando la forma de medio sirkolo. Serrar los medios sirkolos, o sea las burekitas, en apretando los bodres entre dos dedos; untarlas de yema de guevo, i echar enriva de eyas un poko de susam, i meter al orno, kaentado de antes asta 200°. Es mijor de aprontar siempre dos gomos para obtener un plato mas variado.

PASTEL DE KEZO
Materiales
Para la masa:
350 gramos de arina
200 gramos de margarina
krema agra
Para el gomo:
200 gramos de kashkaval rayido
200 gramos de kezo rayido (kualker tipo de kezo amariyo)
100 gramos de kezo blanko fresko
2 guevos enteros
1 klara de guevo
1 yema
Preparasion: Se aze la masa de un dia antes i se mete en el frijider. El dia de despues se apronta el gomo en mesklando los materiales dados ariva. Se avri la metad de la masa i se mete en un tifsin ancho apegandola bien a los bodres tambien i metiendo despues el gomo adientro. Se avri la otra metad de la masa i kon eya se kuvri el gomo, serrando bien los bodres. Se pasa enriva del pastel la yema del guevo ke kedo, bateada de antes, i un poko de kezo rayido, i se koze en el orno.

BIMUELOS DE MATSA, PATATA I KEZO
Materiales:
4 matsot
2 patatas kochas
1 vazo de kezo duro rayido
4 guevos bateados
sal a gusto
azeyte para friyir
Preparasion: Esprimir bien i dizminuzar adientro de un paylon las matsot ke ya fueron metidas en mojo i ablandadas. Adjustar la puree ke fue echa de las patatas kochas, el kezo rayido, la sal i los guevos bateados. Mesklar bien todo el material i friyir komo fue eksplikado en la recheta presedente.

BIMUELOS DE PATATA KON KEZO
Materiales:
4 patatas kochas
1 vazo de kezo rayido (kashkaval, parmezan, etc.)
3 guevos bateados
sal a gusto
azeyte para friyir
Preparasion: Mesklar las patatas echas puree, el kezo rayido, los guevos bateados, la leche i la sal. Kaentar bien la azeyte i kon manos umidozas o kon una kuchara tomar la kantidad de un bimuelo, darle la forma redonda i friyirlo de las dos partes asta ke deviene rosho. Kitarlo de la sarten i meterlo sovre un papel ke embeve azeyte. Los bimuelos se komen kaentes kon arope o kon otro sirop.

MANURAS
Materiales:
2 matsot por persona
kezo blanko o kashkaval rayido
azeyte
1 guevo rifidan por persona (si se kere)
Preparasion: En un resipiente buyir agua kon un poko de sal. Abashar de la lumbre i meter adientro las matsot kortadas en pedasos grandes, desharlas repozar tres minutos, kitarlas de la agua i eskurrirlas. En lo ke las matsot estan ainda kaentes i un poko mojadas, esparzir por enriva kezo blanko o kashkaval rayido i una aregada de azeyte. Los ke lo dezean pueden adjustar tambien el guevo rifidan i mesklarlo kon el resto.