kefté (t.) m.

קציצת בשר

KEFTES DE PATATA KON KARNE
Materiales (6 porsiones):
7-8 patatas grandes
300 gramos de karne mulida
2 guevos
sal a gusto
arina o polvo de matsa
azeyte para friyir
Preparasion: Mundar, lavar i eskaldar las patatas. Kuando estan bien blandas azerlas puree i desharlas yelar un poko. Adjustar la karne i la sal i finyir asta ke se obtiene una meskla omojena.
Kon manos umidas tomar balikas de la grandor de un guevo i entre las dos manos formar las keftes. Untarlas en la arina i el guevo i friyirlas en la azeyte ke ya fue kaentada de antes. Meter las keftes sovre un papel absorbiente para embever la azeyte i servirlas kaentes.

KEFTES DE PRASA
Materiales (3 - 4 porsiones):
1 kilo de prasa
2-3 patatas
1 kuchara yena de polvo de matsa
2 guevos bateados
sal a gusto
arina
azeyte para friyir
Preparasion: Mundar la prasa, kortarla en pedasos de dos o tres sms., lavarla bien i meterla a eskaldar asta ke se ablanda, entonses abasharla de la lumbre, lavarla kon agua yelada i desharla eskurrir. Esprimir la prasa al tanto ke se puede i kortarla muy minudo o pasarla al mikser. Adjustar las patatas eskaldadas i echas puree, el polvo de matsa i la sal i mesklar todo bien. Kon las manos umidas tomar de la meskla la kantidad de una kuchara yena, darle la forma de una kefte, untarla en la arina i el guevo i friyir en azeyte ke ya fue kaentada de antes.

KEFTES DE PRASA KON KARNE
Materiales (6 - 8 porsiones):
1/2 kilo de karne mulida
1 kilo de prasa
2 revanadas de pan moreno o
2 patatas kochas, echas puree
2-3 guevos
sal i pimienta a gusto
azeyte para friyir
Preparasion: Mundar, enshaguar i kortar la prasa minudo i buyirla unos diez minutos asta ke se ablanda. Vaziar la agua, meter la prasa a eskurrir en un tifsin burakado, esprimirla i mesklarla bien kon la karne, el pan moreno mojado, esprimido i dizminuzado o la puree de patata, la sal, la pimienta i los guevos bateados. Tomar la kantidad de una kuchara yena, darle la forma de una kefte i friyir en azeyte kaente. Las keftes se sierven freskas fritas.

KEFTES DE PRASA KON KARNE I KALDO DE TOMAT
Materiales (6 - 8 porsiones):
1/2 kilo de karne mulida
1 kilo de prasa
2 revanadas de pan moreno o
2 patatas kochas, echas puree
2-3 guevos
100 gramos de tomatada.
1 limon
sal i pimienta a gusto
azeyte para friyir
Preparasion: De mizmo ke la presedente recheta solo ke despues ke se friyen las keftes, se aresentan en un paylon. Se dezaze sien gramos de tomatada en un vazo i medio de agua, kon el sumo del limon i sal a gusto i se adjusta todo a las keftes i se desha gizar despues ke buyo unos diez minutos, asta ke el kaldo se aze un poko mas espeso.

KEFTES DE KARNE I BERENDJENA ASADA
Materiales (2 - 4 porsiones):
250 gramos de karne mulida
1 vazo de puree de berendjena
1 sevoya mediana
2 guevos bateados
1 revanada de pan moreno o
arina de matsa, segun el menester
2 kucharas yenas de prishil pikado
azeyte para friyir
sal i pimienta a gusto
Preparasion: Mesklar bien la berendjena asada i echa puree, la karne mulida i la sevoya pikada bien minudo. Si ay likido soltado por la berendjena en demazia, se kita kon una kuchara o se vazya. Despues adjustar los guevos bateados, el prishil pikado i la revanada de pan moreno mojado, esprimido bien bien i dizminuzado o arina de matsa, segun el menester. Mesklar todo el material bien bien asta obtener una masa kondensada, solida. Preparar keftes chikas i friyir en azeyte muy kaente para ke se aferren. Se kome kaente komo "hors d'oeuvre" o primer plato. Si se kere ofreser komo komida, akompanyada de arroz, fideos o makaron, se gizan kon kaldo de tomat i el sumo de medio limon.

KEFTES DE IZMIR FRITAS
Materiales (4 porsiones):
1/2 kilo de karne de vaka mulida
4-5 patatas
3 kucharas de azeyte
1 sevoya grande
3 tomates grandes i kolorados kon pulpa o
3 kucharas de tomatada
2 revanadas de pan sin krosta
3 kucharas de prishil pikado
sal i pimienta preta a gusto
Preparasion: Mesklar la karne mulida, la sevoya rayida o pikada muy minudo, la miga de pan mojada i esprimida ansi ke la sal, la pimienta i el prishil. Amasar todo esto bueno bueno, tomar pedasos de la grandor de una muez i kon las manos mojadas dalde una forma oval. De otra parte mundar las patatas, enshaguarlas i kortarlas tajadas de medio santimetro de espesura. Friyirlas i aresentarlas en un paylon. En la mizma azeyte friyir las keftes i meterlas enriva de las patatas. Tomar los tomates, kitarles el kuero, kortarlos en pedasikos de la grandor de una aviana, sufriyirlos en la azeyte ke kedo en la tava, adjustar un vazo de agua i buyir todo en una. Kuando buyo unos kuantos minutos, vaziarlo enriva de las keftes sin las patatas ke se topan en el tifsin, taparlo i desharlo gizarse unos diez a kinze minutos. Kuando se sierve, se meten las keftes enriva de las patatas i ensima de eyas la salsa. Kale servir kaente.

KEFTES DE IZMIR, SIN FRIYIR
Materiales:
Lo mizmo ke para las keftes fritas i
2 pimintones largos
Preparasion:
Se apronta exaktamente komo en la recheta presedente, solo ke las keftes i las patatas se aresentan en el paylon sin friyir, el tomat se adjusta sin sufriyir o se echa por enriva la tomatada dezecha en un vazo de agua. Kale meter tambien en el bodre del paylon dos pimintones largos, un poko pikantes i despues gizarlo en lumbre mediana 40-45 minutos. Se sierve kaente.

KEFTES DE PISHKADO
Materiales (2 - 3 porsiones):
1/2 kilo de sardela o de file de pishkado
2-3 kucharas de arina de matsa
3 guevos bateados
1 kuchara de prishil pikado
1 sevoya grande
2 dientes de ajo pikado
2 limones
sal i pimienta a gusto
azeyte para friyir
Preparasion: En un resipiente ondo mesklar los guevos, el prishil, la sevoya kortada minudo, la sal, la pimienta i el pishkado ke le fueron kitadas las espinas, fue alimpiado, enshaguado i mulido, aziendo todo este material komo una masa. Kon las manos umidas o kon una kuchara tomar la kantidad ke se kere de esta masa, untarla en arina de matsa o pan rayido i en guevo bateado i friyirla en azeyte bien kaentada de antes. Las keftes se sierven kaentes kon una aregada de limon enriva i al lado agristada (ver en "Salsas").
Si se kere, se pueden aresentar tambien en un paylon, echar por enriva dos kucharas de tomatada dezechas en dos vazos de agua kon el sumo de medio limon, una kuchara de prishil pikado i un poko de sal, i kozer las keftes por sinko o diez minutos.

KEFTES DE PAZI O ESPINAKA KON KEZO
Materiales (20-25 keftes):
1/2 kilo de pazi o de espinaka
100 gramos de kashkaval o kezo rayido
2-3 guevos
1 vazo de arina o
2 revanadas de miga de pan moreno
1/2 vazo de leche
sal i pimienta a gusto
azeyte para friyir
Preparasion: Eskaldar la pazi o espinaka, eskurrirla i esprimirla, kortarla minudo djuntos kon los ravos i mesklarla kon el resto del material. Meter a kaentar la azeyte en una sarten, kuando esta bastante kaente, tomar kon una kuchara de supa de la meskla, darle la forma de una kefte i friyirla de las dos partes.