|
DULSE DE KAYISI
Materiales:
1 kilo de kayisi
1 kilo de asukar
1 limon
Preparasion: Enshaguar bien los kayisis, kitarles el kueshko en aziendo un korte no muy ondo en medio, para ke el kayisi kede entero i no piedra su forma. En un paylon meter el medio kilo de asukar, adjustar los kayisis i taparlos kon el resto de la asukar. Adjustar el sumo de un limon i meter de un lado unas dos oras, asta ke la asukar se dezaze mas o menos en la agua ke sale del kayisi.
Despues de dos oras, meter el paylon sovre lumbre fuerte. Preparar un tefsin burakado kon un paylon debasho. Kuando se ve ke el kayisi ya se kozio, kitarlo kon una kuchara burakada i meterlo en el tefsin burakado para ke eskurra la asukar. Kuando ya se kitaron todos los kayisis, deshar el sirop en la lumbre ke se apure; adjustar el sirop ke eskurrio del tefsin burakado i desharlo buyir asta ke viene en punto, kere dizir ke kuando se toma del sirop kon kuchara, el likido deve ser espeso i no kaldudo.
Los kayisis se kitan kon delikateza, sin desformarlos, del tefsin burakado, se aresentan en un paylon i se echa por enriva el sirop. Solo despues ke se yelo todo, se mete enriva un panyo delgado, komo un tul, i se desha tres o kuatro dias en el sol, en boltanto los kayisis de vez en kuando para ke embevan el sirop de todas las partes. Despues de esto se aresentan en una bocha ke se serra bien.
|