|
ENDJINARAS REYNADAS
Materiales (10 - 12 porsiones):
12 endjinaras
1 guevo bateado
2 limones
2 vazos de kaldo de karne o de geyna
arina
azeyte
sal i pimienta a gusto
Para el gomo:
1/2 kilo de karne mulida
1 guevo bateado
1/2 kucharika de muez mashkada, si se kere
1 una revanada de pan
sal i pimienta a gusto
Preparasion: En una kacharola grande i onda meter bastante agua kon sal i el sumo de un limon. Mundar las endjinaras en aferrando i travando las ojas de ariva para abasho, asta ke se yega al korason ke tiene una kolor amariya. Kortar komo un sm. de la punta de las endjinaras por ke son punchozas. Kortar las endjinaras en dos i rayer todos los ilos ke se topan en medio. Meterlas imediatamente en la kacharola ke aprontimos de antes kon agua i limon, para ke no se agan eskuras. De otra parte, mesklar la karne mulida kon el guevo, la miga de la revanada de pan mojada i esprimida, la sal, la pimienta i la muez mashkada. Despues eskurrir las medias endjinaras, inchirlas kon este gomo, untarlas en la arina i el guevo solo de la parte reynada, friyirlas i aresentarlas en un paylon. Mesklar dos vazos de kaldo de karne o de geyna (o una kuchara de polvo de supa de geyna dezecha en dos vazos de agua kaente), una aregada de azeyte, sal i pimienta i el sumo del otro limon. Echarlo todo enriva de las endjinaras i meterlas a kozer en fuego suave serka de una ora o asta ke las endjinaras se ablandan. Si ay menester, se adjusta un poko de agua de vez en kuando.
|