karne f.

בשר

arrankarse tiras de karne

לפשוט את העור מרוב גירוד; להתמלא רגשי זעם

atuendo de karne/kezo

כלי בשרי/ חלבי

azer karnes

העלה משמנים

dale ke no son tus karnes

נאמר בהסתייגות כאשר מישהו נוהג בברוטליות באדם חסר ישע

dar komo el Dio no de ke se de en karne kasher (ebr.)

להכות מכות נאמנות באכזריות בלתי רגילה

de karne

בשרי

entradiko/ka en karnes

שמנמן

es de mi karne i de mi sangre

עצמי ובשרי

karne asada

צלי בשר

karne de kortar

בשר לטחינה

karne es madre

הבשר הינו המרכיב היסודי בתזונה

karne kasher (ebr.) ke no se kaiga en su mano!

שלא יפול יהודילידיו!

karne kasher (ebr.)/trefa (ebr.)

בשר כשר/בשר טרף

karne kruda

בשר חי

karne kruda a la boka del podjo

דיבורים חסרי הגיון וקשר (נונסנס)

karne manida

בשר שהשאירוהו להתרכך

karne poka i ver al Dio en la kama

עדיף לחסוך על מזונות אך לא על איכות הדיור!

karnes

עור, גלד, עור דק, קשקשים

karnes de perro

אדם בעל כושר עמידה

kedar en karnes

לחיות בעניות גדולה

kitarse de sus karnes

להוציא משלו כדי לסייע לזולת, לתת מפיתו לזולת

kovrar karnes

להשמין, להעלות משמנים

meterse en karnes

להתפשט עירום ועריה

mucha karne i mal sabá

האוכל בשפע אך היחסים במשפחה מעורערים

pastel de karne

מאפה בשר

s'estremesen las karnes

הבשר נעשה חידודים חידודים (מפחד, מרוב רחמים)

todo guesos i nada karne

עסק הכרוך בהרבה עמל מבלי לשאת רווחים

todo karne i nada gueso

עסק משגשג שכולו רווחים

SUPA KON KEFTIKAS DE KARNE
Materiales (6 porsiones):
1/2 kilo de karne mulida
2 kucharas de prishil
1 tomat
1 diente de ajo
1/2 vazo de arroz
2 litros de agua
sal i pimienta a gusto
azeyte para friyir
Preparasion: Mesklar la karne mulida kon la sal, la pimienta i el prishil pikado. Azer keftikas chikas, friyirlas i meterlas de un lado. A la mizma azeyte adjustar el tomat sin el kuero i sin las pipitas, rayido o molido, el ajo i la sal i deshar friyir un poko. Meterlo todo en un tendjere adekuado, adjustar la agua, deshar ke de un buyor i a la fin adjustar las keftikas i el arroz, i deshar buyir asta ke se koze.

SUPA DE KARNE KON KOPETIKAS
Materiales (6 porsiones):
1/2 kilo de karne de vaka o kodrero
2 guesos kon tutano
1/2 kilo de karne mulida
2-3 kucharas de azeyte para friyir
1/2 vazo de arroz
3 kucharas de prishil pikado
sal i pimienta a gusto
Preparasion: Enshaguar la karne kortada pedasos i los guesos, meterlo todo en una kacharola grande i kuvijar kon dos litros de agua yelada. Kuando buyo, kitar kon una kuchara la eskuma ke sale enriva i da kolor suzya a la supa. Adjustar sal i pimienta, deshar kozer en lumbre flosha serka de una ora i media o asta ke la karne se ablanda, todo el tiempo tapado. Entremientres adjustar sal i pimienta a la karne mulida, amasar bueno bueno kon las manos umidozas, azer balikas de karne de la grandor de una muez i friyir de manera muy liviana en la azeyte. Media ora antes ke la supa tenga ke ser servida echar adientro la kopetikas i kinze minutos mas tadre el arroz. Gizar asta ke el arroz se ablanda. Antes de servir la supa se esparze enriva de kada plato prishil pikado minudo.

BAMIA KON KARNE
Materiales (4 - 6 porsiones):
1/2 kilo de karne
1 kilo de bamia
2 tomates grandes
1 sevoya kortada minuda
2 kucharas de azeyte
4 vazos de agua
1 limon
sal a gusto
Preparasion: Enshaguar bien la bamia i meterla a sekar en un tifsin burakado. Kuando esta seka mundar las kavesas en forma de kono. Meter la azeyte en un resipiente ondo, friyir un poko la sevoya kon la karne echa porsiones, adjustar los tomates sin el kuero i sin las pipitas, kortados minudo; mesklar todo unas kuantas vezes. Kuando el tomat se abafa, adjustar los 4 vazos de agua i gizar asta ke la karne se ablanda. Entonses echar las bamias al kaldo, adjustar el sumo de un limon i la sal. Deshar gizar asta ke las bamias se ablandan ma kedan enteras. Ay ken uza friyir un poko la bamia antes de gizarla, i meter kuatro o sinko dientes de ajo.

KEFTES DE PATATA KON KARNE
Materiales (6 porsiones):
7-8 patatas grandes
300 gramos de karne mulida
2 guevos
sal a gusto
arina o polvo de matsa
azeyte para friyir
Preparasion: Mundar, lavar i eskaldar las patatas. Kuando estan bien blandas azerlas puree i desharlas yelar un poko. Adjustar la karne i la sal i finyir asta ke se obtiene una meskla omojena.
Kon manos umidas tomar balikas de la grandor de un guevo i entre las dos manos formar las keftes. Untarlas en la arina i el guevo i friyirlas en la azeyte ke ya fue kaentada de antes. Meter las keftes sovre un papel absorbiente para embever la azeyte i servirlas kaentes.

KEFTES DE PRASA KON KARNE
Materiales (6 - 8 porsiones):
1/2 kilo de karne mulida
1 kilo de prasa
2 revanadas de pan moreno o
2 patatas kochas, echas puree
2-3 guevos
sal i pimienta a gusto
azeyte para friyir
Preparasion: Mundar, enshaguar i kortar la prasa minudo i buyirla unos diez minutos asta ke se ablanda. Vaziar la agua, meter la prasa a eskurrir en un tifsin burakado, esprimirla i mesklarla bien kon la karne, el pan moreno mojado, esprimido i dizminuzado o la puree de patata, la sal, la pimienta i los guevos bateados. Tomar la kantidad de una kuchara yena, darle la forma de una kefte i friyir en azeyte kaente. Las keftes se sierven freskas fritas.

KEFTES DE PRASA KON KARNE I KALDO DE TOMAT
Materiales (6 - 8 porsiones):
1/2 kilo de karne mulida
1 kilo de prasa
2 revanadas de pan moreno o
2 patatas kochas, echas puree
2-3 guevos
100 gramos de tomatada.
1 limon
sal i pimienta a gusto
azeyte para friyir
Preparasion: De mizmo ke la presedente recheta solo ke despues ke se friyen las keftes, se aresentan en un paylon. Se dezaze sien gramos de tomatada en un vazo i medio de agua, kon el sumo del limon i sal a gusto i se adjusta todo a las keftes i se desha gizar despues ke buyo unos diez minutos, asta ke el kaldo se aze un poko mas espeso.

SEVOYAS REYNADAS KON KARNE I ARROZ
Materiales (2 - 4 porsiones):
4-5 sevoyas grandes
1 kuchara de polvo de supa de geyna
6 kucharas de azeyte
1 limon
sal i pimienta a gusto
Para el gomo:
250 gramos de karne mulida
2 vazos de arroz kocho
sal i pimienta a gusto
Preparasion: Mundar i enshaguar bien las sevoyas, azer una kortadura en kada sevoya de ariva para abasho, meterlas a abafar en "bain-marie" trenta minutos (o bien adientro de agua kaente, ma entonses no kale kozer mas de vente minutos, solo asta ke los kates de las sevoyas se desparten un poko). Abasharlas del gaz, desharlas yelar, despues despartir los kates los unos de los otros kon atension, para ke no se rompan. Tomar el gomo ke fue bien mesklado i inchir kada kat kon delikateza, arodearlo i pozarlo en un paylon kon bodres altos, uno al lado del otro, apretados i la aviertura para abasho afin ke no se avran durante el gizado. Meter en una kacharola 6 kucharas de azeyte, kaentar uno o dos minutos, adjustar el sumo del limon, el polvo de supa de geyna, sal i pimienta, dar un buyor i echarlo por enriva de las sevoyas reynadas, deshar buyir, abashar el fuego i gizar otros 20-30 minutos.

YAPRAKES DE KARNE
Materiales (8 - 10 porsiones):
500 gramos de karne mulida
300 gramos de ojas de parra
2 sevoyas mundadas
3 kucharas de arroz mundado
1 kuchara de azeyte
1 kuchara de prishil pikado
2 kucharas de tomatada
2 limones
sal i pimienta a gusto
Preparasion: Mesklar bien la karne mulida, las sevoyas pikadas, el arroz, el azeyte, el prishil, la sal i la pimienta (el ken le gusta puede adjustar tambien unos kuantos dientes de ajo machakado). De otra parte, alimpiar las ojas de parra (kitar las suzyas i burakadas) i meterlas a buyir muy poko en agua kon la sal i el sumo de un limon. Kitar las ojas de la agua, enshaguarlas i eskurrirlas bien. Despues tomar kada oja por la parte mat, meter adientro el gomo, duvlar los dos lados i arodear de abasho para ariva, dandole la forma de un sigaro. Aresentar los yaprakes en un paylon, uno al lado del otro i kuvrirlos kon unas kuantas ojas de parra. Aprontar una salsa kon dos kucharas de tomatada dezecha en un poko de agua, el sumo de un limon i una kuchara de azeyte, adjustar la sal i echar todo sovre los yaprakes. Adjustar mas agua i kuvrir los yaprakes. Meterlos a gizar en lumbre fuerte por kinze minutos i kontinuar a gizarlos sovre fuego moderado asta ke se embeve toda la agua.

KEFTES DE KARNE I BERENDJENA ASADA
Materiales (2 - 4 porsiones):
250 gramos de karne mulida
1 vazo de puree de berendjena
1 sevoya mediana
2 guevos bateados
1 revanada de pan moreno o
arina de matsa, segun el menester
2 kucharas yenas de prishil pikado
azeyte para friyir
sal i pimienta a gusto
Preparasion: Mesklar bien la berendjena asada i echa puree, la karne mulida i la sevoya pikada bien minudo. Si ay likido soltado por la berendjena en demazia, se kita kon una kuchara o se vazya. Despues adjustar los guevos bateados, el prishil pikado i la revanada de pan moreno mojado, esprimido bien bien i dizminuzado o arina de matsa, segun el menester. Mesklar todo el material bien bien asta obtener una masa kondensada, solida. Preparar keftes chikas i friyir en azeyte muy kaente para ke se aferren. Se kome kaente komo "hors d'oeuvre" o primer plato. Si se kere ofreser komo komida, akompanyada de arroz, fideos o makaron, se gizan kon kaldo de tomat i el sumo de medio limon.

KOPETIKAS DE KARNE KON PUREE DE BERENDJENA
Materiales (6 - 7 porsiones):
Para la puree de berendjena:
3 berendjenas medianas
3 kucharas de azeyte
3-4 dientes de ajo
una preza de asukar
sal a gusto
Para las kopetikas:
1/2 kilo de karne mulida
1 revanada de pan moreno seko
1 kuchara de prishil pikado
1 guevo bateado
sal i pimienta preta a gusto
Preparasion: Asar las berendjenas bien de todas las partes i mundarlas debasho del chorro de la fuente kon agua yelada. Meterlas a eskurrir bien bien, despues pikarlas kon un kuchiyo. En una kacharola kaentar la azeyte, meter los dientes de ajo machakados ke se friygan un poko; adjustar la berendjena pikada, la sal i la preza de asukar. Mesklar bien i meter a gizar por media ora en lumbre flosha. De otra parte, mesklar en otra kacharola el pan dizminuzado, ke antes fue metido en mojo y bien esprimido, kon la karne, la sal, la pimienta preta i el prishil. Amasar bien asta ke todos los materiales se mesklan el uno kon el otro i despues kon manos un poko mojadas azer kopetikas chikas, de la grandor de una muez. Meterlas adientro de la puree de berendjena, tapar la kacharola i gizar en lumbre flosha. Despues de media ora gostar, si falta algo adjustarlo. Meter al orno por otros kinze minutos. Se kome kaente.

FASULYA KON KARNE
Materiales (4 - 5 porsiones):
1 kilo de fasulya freska
1 sevoya grande
3-4 kucharas de azeyte
750 gramos de karne
2-3 kucharas de tomatada
1 tomat
sal a gusto
Preparasion: Enshaguar bien la fasulya, kortar las puntas, kitar los ilos de las dos partes (si es muy freska no ay ilos en los lados). Kortarlas en dos (si son fasulyas anchas se deve kortar a la larga tambien). Alimpiar i kortar la sevoya minudo, abafarla en la azeyte, adjustar la karne kortada en porsiones i sufriyirla de todas las partes. Meter la fasulya en una oya onda, echar por enriva la sevoya abafada, la karne, la tomatada dezecha en un poko de agua i el tomat kortado minudo. Kuvrir kon agua i adjustar la sal. Tapar la oya i deshar ke empese a buyir. Entonses abashar la flama i deshar ke se gize una ora o ora i media o asta ke la karne se ablanda i el kaldo se aze espeso. Si ay menester se adjusta mas agua i se desha kozer un poko mas.

KALAVASAS REYNADAS DE KARNE
Materiales (6 - 8 porsiones):
4 kalavasas largas
1/4 kilo de karne mulida
1 sevoya
2 kucharas de prishil pikado
1/2 kucharika de pimienta
1/2 vazo de azeyte
1 kucharika de sal
Preparasion: Las kalavasas no se mundan ma se les raye la kashka kon el kuchiyo (kale rayer i no mundar. Esto no desha ke la kalavasa se despape), se lavan, se kortan en dos, se kita lo de adientro kon una kucharika, o kon un kuchiyo chiko, deshando la punta serrada, de manera ke se krea komo un vazo. Se friyen en azeyte kaente, boltandolas para ke se friygan de todas las partes asta ke se azen de una kolor rosha. En el mizmo azeyte, despues de aver friyido las kalavasas, se mete la sevoya kortada minuda i el prishil pikado, la karne mulida i lo ke se kito de adientro de la kalavasas (todo bien pikado), se friye diez minutos, se adjusta sal i pimienta (los ke lo desean pueden adjustar tambien una kuchara de arroz). Kon este gomo se inchen las kalavasas, se meten en un tifsin las partes aviertas una enfrente de otra, ke keden apretadas para ke no se vazyen, se echa medio vazo de agua i se koze en fuego regular durante una ora.

MAKARON REYNADO DE KARNE
Materiales (4 - 5 porsiones):
250 gramos de makaron
2 litros de agua
1 kucharika de sal
Para el gomo:
200 gramos de karne mulida
1 sevoya mediana
1 tomat
1 patata eskaldada
4 guevos
3 kucharas de azeyte
sal i pimienta a gusto
Preparasion: Abafar la sevoya, adjustar la karne mulida despartiendola kon un piron para ke no keden bultos, adjustar sal i pimienta i deshar sovre la lumbre asta ke todo se sufriye. Abashar de la lumbre i adjustar el tomat mundado i kortado bien minudo.
De otra parte meter a buyir los dos litros de agua kon una kucharika de sal. Kuando buye la agua echar adientro el makaron i eskaldarlo de dodje a kinze minutos asta ke se ablanda. Despues enshaguarlo basho agua yelada i meterlo a eskurrir. En un resipiente bastante grande i ondo batear dos guevos, adjustar un poko de sal i la metad de los makarones, mesklarlo todo. Untar de azeyte un paylon i meterlo a kaentar a la lumbre. Kuando la azeyte esta kaente, aresentar el makaron mesklado kon los guevos, adjustar el gomo ke fue aprontado de antes i deshar ke kontinue a kaentarse sovre lumbre moderada. Batear un otro guevo i adjustar la otra metad del makaron i un poko de sal, mesklar i echarlo todo sovre el gomo. A la fin, tomar la patata eskaldada, azerla puree, mesklar kon el kuatren guevo, un poko de sal i pimienta i echarlo por enriva del makaron. Meter al orno kaentado de antes a 200° i kozerlo 45 - 50 minutos, asta ke toma una kolor rosha.

KEBAP TURKO VERDADERO
Materiales (6 - 8 porsiones):
1 kilo de karne de vaka mulida.
150 gramos de godrura, tambien de vaka
1½ kucharikas de espesia para kebab, no fuerte
1½ kucharikas de ajo granulado
1½ vazos de agua gazoza (kon soda)
1 kucharika de sal
1 kucharika de pimienta preta
Preparasion: Moler la karne i la godrura dos vezes. Adjustar el resto del material, mesklar i amasar bien bien, meter al frijider una noche entera o si no ay tiempo, a lo menos kuatro oras. Kitar del frijider i kon manos mojadas tomar pedasos i darles la forma de dedos de la grandor ke se kere. Asar en el gril elektriko o kon karvon - no demazia para ke no se seke.

PASTEL DE KARNE
Materiales (6 - 8 porsiones):
Para la masa:
2½ kupas de arina
150 gramos de margarina ablandada
1 kuchara de azeyte
1 kuchara de vinagre
1/2 kuchara polvo de soda
1/4 de kupa de agua
50 gramos de susam
1 preza de sal
Para el gomo:
1/2 kilo de karne mulida
1 sevoya grande
2 guevos haminados
2 kucharas de prishil pikado
1 kuchara de agua
2 tomates
1 guevo
sal i pimienta a gusto
Preparasion de la masa: Adientro de un resipiente serner la arina kon la sal. Azer un foyo en medio, adjustar la azeyte i la margarina ablandada i empesar a azer la masa, adjustando avagar avagar el vinagre i la agua kon la soda. Amasar bien i kuando la masa esta pronta emburujarla en una oja de nylon i desharla en el frijider por una ora.
Preparasion del gomo: Meter la sevoya a friyir asta ke toma una kolor rosha klara, adjustar la karne i sufriyir endjuntos, en dizminuzando la karne de vez en kuando, ke no se aga bultos. Adjustar la sal, la pimienta, el prishil, el tomat sin el kuero i sin las pipitas, kortado minudo i los guevos haminados kortados minudo i mesklar bien.
Preparasion del pastel: Tomar la masa, despartirla en dos, avrir la metad i meterla en un tefsin untado kon margarina. Meter ensima el gomo de manera igual por todas las partes, tapar kon la otra metad de la masa i apegar los bodres en apretando kon los dedos. Untar por ensima kon el guevo mesklado kon un poko de agua i un poko de susam. Meter a orno moderado de 180° asta ke toma una kolor rosha i se despega de los bodres.

KUZI GIZADO KON ARROZ
Materiales (4 - 5 porsiones):
1 kilo de karne de kodrero sin gueso
2 vazos de arroz
1 sevoya kortada minudo
2-3 kucharas de azeyte
5 vazos de agua
pimienta preta i sal a gusto
Preparasion: Enshaguar, eskurrir bien i kortar la karne en pedasos no grandes. En una sarten, kaentar la azeyte i meter a abafar la sevoya kon la karne, asta ke la sevoya toma una kolor rosha. Adjustar un vazo de agua i un poko de sal, tapar i deshar en lumbre flosha, ke se gize una ora o asta ke la karne ya esta kocha. Entonses adjustar los 4 vazos de agua ke kedan i la pimienta. Tapar de muevo asta ke buye el kaldo kon la karne adientro. Adjustar el arroz ke ya fue alimpiado, enshaguado i bien eskurrido, mesklar bueno kon una kuchara de palo, i asperar ke empese a buyir de muevo. Abashar la lumbre, tapar i gizar asta ke se embeve todo el kaldo i el arroz puja. Kuando ya esta pronto, destapar i kuvijar kon un panyo limpio i tapar de muevo. Se desha ansi serka de 30-40 minutos, asta ke se va servir.

MINA DE KARNE
Materiales (4 porsiones):
6 matsot
5 guevos
250 gramos de karne mulida
1 sevoya grande
2 kucharas de prishil pikado
1 tomat grande
1 patata kocha
sal i pimienta a gusto
Preparasion: Mojar bien las matsot i meterlas a eskurrir. De otra parte friyir la sevoya kortada minudo asta ke se aze transparente, adjustar la karne mulida i dizminuzarla asta ke se koze. Adjustar el tomat sin kueros i sin pipitas i kortado minudo, kozer otros sinko minutos, abashar de la lumbre i adjustar el prishil, la sal i la pimienta. En otro resipiente batear kuatro guevos. Esprimir las matsot i mesklarlas kon los guevos. Untar un paylon kon azeyte, kaentarlo un poko en la lumbre i aresentar la metad de la meskla de guevos i matsot, de manera ke tape bien el fondo. Sovre esto meter el gomo de la karne, meter ensima de la karne el resto de las matsot meskladas kon los guevos, de manera ke sea kuvijada de todas las partes. Adjustar las patatas echas puree, sal i pimienta i un guevo bateado kon un poko de agua i kuvrir las matsot kon la puree. Meter en orno a 180° i kozer media ora. Kuando toma una kolor rosha i se despega de los bodres, la mina ya esta pronta.