kalavasa f.

קישוא; דלעת

esfongato de kalavasa

פשטידת/מאפה קישואים

kalavasa amariya

דלעת

kalavasa vazía

כינוי לאדם נבער מדעת

BOKADIKOS DE KALAVASA
Materiales (4 personas):
1 kilo de kalavasas delgadas
1 safanoria
2 kucharas de azeyte
2 kucharas de salsa de tomat
6 dientes de ajo
1 kuchara de polvo de supa de geyna
1/2 limon
1/2 kucharika de asukar
1½ kupas de agua
sal
Preparasion: Las kalavasas se enshaguan bien, se kortan en kuatro a la largura i despues en pedasos de kaje dos sms. a la ancha. Se aresentan en un paylon, se mete enriva la safanoria kortada en tajadas, se adjustan los ajikos, la salsa de tomat dezecha en una kupa de agua, el sumo del medio limon esprimido, la asukar, el polvo de supa de geyna dezecho en media kupa de agua i la sal. Se mete a buyir sovre lumbre fuerte. Kuando ya dio una buyor, se abasha la lumbre i se desha asta ke las kalavasas estan bien kochas.

BOKADIKOS DE KALAVASA KON SEVOYAS I AJOS
Materiales (6 - 8 porsiones):
1½ kilos de kalavasikas delgadas
2 tomates
3 sevoyas grandes
8-10 dientes de ajo
2 vazos de agua
1 kuchara de salsa de tomat
1 kucharika de polvo de supa de geyna
1/2 vazo de azeyte
sal i pimienta a gusto
Preparasion: Mundar las kalavasikas, kortar las dos puntas, enshaguarlas bien. Kortar kada kalavasa en kuatro a la larga i despues en tres o kuatro pedasikos, meter sal por enriva i desharlas de una parte.
Mundar i enshaguar las sevoyas, kortarlas en tajadas i meterlas a abafar en un poko de azeyte, en un paylon ke va al orno. Enshaguar los bokadikos de kalavasa, eskurrir i aresentarlos enriva de la sevoya. Enshaguar los tomates, kitar las pipitas, kortarlos minudo i meter enriva de las kalavasas, esparzido bien por todas las partes. Azer lo mizmo kon los dientes de ajo ke fueron mundados i pikados. Dezazer la salsa de tomat i el polvo de supa de geyna en los dos vazos de agua i echar por enriva ansi ke la azeyte ke kedo. Adjustar sal i pimienta. Meter al orno moderado (180°) por una ora o ora i media. Despues de este tiempo si las kalavasikas toman una kolor eskura ma no estan ainda bastante gizadas, se pueden tapar kon papel aluminium i deshar kozer otra media ora en el orno.

KALAVASAS REYNADAS DE KARNE
Materiales (6 - 8 porsiones):
4 kalavasas largas
1/4 kilo de karne mulida
1 sevoya
2 kucharas de prishil pikado
1/2 kucharika de pimienta
1/2 vazo de azeyte
1 kucharika de sal
Preparasion: Las kalavasas no se mundan ma se les raye la kashka kon el kuchiyo (kale rayer i no mundar. Esto no desha ke la kalavasa se despape), se lavan, se kortan en dos, se kita lo de adientro kon una kucharika, o kon un kuchiyo chiko, deshando la punta serrada, de manera ke se krea komo un vazo. Se friyen en azeyte kaente, boltandolas para ke se friygan de todas las partes asta ke se azen de una kolor rosha. En el mizmo azeyte, despues de aver friyido las kalavasas, se mete la sevoya kortada minuda i el prishil pikado, la karne mulida i lo ke se kito de adientro de la kalavasas (todo bien pikado), se friye diez minutos, se adjusta sal i pimienta (los ke lo desean pueden adjustar tambien una kuchara de arroz). Kon este gomo se inchen las kalavasas, se meten en un tifsin las partes aviertas una enfrente de otra, ke keden apretadas para ke no se vazyen, se echa medio vazo de agua i se koze en fuego regular durante una ora.

DUKADIKOS DE KALAVASA
Materiales (2 - 3 porsiones):
1/2 kilo de kalavasas largas, no muy delgadas
200 gramos de yogurt
2-3 dientes de ajo ahajados
sal
azeyte para friyir
Preparasion: Rayer la kashka de las kalavasas i enshaguarlas. Kortarlas en forma de dukados de medio sm. de anchura i friyir asta ke toman una kolor rosha. Aresentar los dukados en un paylon, mesklar el yogurt kon los ajos i la sal, echar por enriva i servir. Se puede eskudiar tambien a kada uno su porsion de dukadikos i meter despues el yogurt por enriva.

MEDIAS DE KALAVASA I
Materiales (6 - 8 porsiones):
1 kilo de kalavasas largas, no muy delgadas
400 gramos de puree de patata
12-14 kucharas de kezo o kashkaval rayido
1 vazo de agua
tomatada
sal a gusto
arina
azeyte para friyir
Preparasion: Rayer la kashka de las kalavasas, enshaguarlas, kortarlas a la larga i despues a la ancha de en medio, de manera ke se obtiene de kada kalavasa kuatro medias. Kon la punta de una kucharika vaziar las medias de sus pulpa, asta ke kedan komo unas barkitas. (No echar la pulpa. Se puede rayer o pikar minudo i azer kon eya gomo de handrajo para boyos o burekas).
Mesklar la puree - ke no deve ser kalduda - kon el kezo, un guevo bateado i la sal. Kon una kuchara inchir las medias. Untar, solo de la parte del gomo, en la arina i despues en el otro guevo bateado. Friyir las medias en primero de parte del gomo i despues de la otra parte tambien. Aresentarlas en un paylon una al lado de la otra. Dezazer la tomatada kon la agua, si ay kaldo de tomat fresko es ainda mas savrozo; adjustar un poko de sal i kuvrir las medias de kalavasa kon el kaldo. Gizar en lumbre flosha, avagar avagar asta ke las kalavasas se ablandan. Es bueno de deshar un poko de kaldo.

MEDIAS DE KALAVASA II
Materiales (10 porsiones):
10 kalavasikas
1/2 vazo de kashkaval rayido
250 gramos de kezo blanko
2 guevos
1-2 kucharas de arina
1 kucharika de sal
azeyte para friyir
Para la salsa:
100 gramos de tomatada
2 vazos de agua
sal a gusto
Preparasion: Lavar bien las kalavasikas i desharlas kon las kashkas para ke keden mas tiernas. Kortarlas, a lo largo, en dos i kitar un poko de la pulpa. Mesklar los kezos kon los guevos, la arina i la sal i inchir las medias kalavas kon este gomo (si el gomo esta kaldudo adjustar un poko mas de arina). Despues kaentar azeyte en una sarten i friyir las medias kalavasikas de la parte del gomo metiendolas en la azeyte kon muncha delikateza. En el momento ke ya toman una kolor rosha aboltarlas en la azeyte i friyirlas pokos minutos de la parte de la kashka tambien. Aresentar las medias kalavasikas en un pyrex, echar por enriva la tomatada dezecha en las dos kupas de agua i meter al orno ke ya fue kaentado de antes a 200°. Kozer 45-50 minutos. Las kalavasikas deven estar blandas ma no dezechas. Si se kere, antes de kitar del orno se puede echar por enriva mas kashkaval rayido i meter al gril por pokos minutos, asta ke el kashkaval se dirrite i empesa a tomar una kolor rosha. Servir kaente.

FRITADA DE KALAVASA KON PRISHIL I PIMIENTA
Materiales (4 - 6 porsiones):
1 kilo de kalavasikas delgadas
4-5 guevos bateados
2 kucharas de prishil pikado
1 sevoya grande
1 kuchara no muy yena de anito pikado
2 dos revanadas de pan
sal i pimienta a gusto
Preparasion: Enshaguar, mundar i rayer las kalavasas. Mundar i enshaguar la sevoya i kortarla minudo. Batear los guevos, adjustar el prishil, el anito, la miga de pan mojada, esprimida i dezminuzada, sal i pimienta. A la fin, adjustar las kalavasas i la sevoya ke ya fueron bien esprimidas. Aresentar la fritada en un paylon ke fue untado kon azeyte i bien kaentado. Echar por enriva una aregada de azeyte i meter a orno kaentado a 200° por 45-60 minutos. La fritada esta pronta kuando esta bien seka i toma una kolor rosha por ensima.

FILIKAS DE KALAVASA
Materiales:
1/2 kilo de fila pronta (un paketo)
1/2 kilo de kalavasa dulse
sal a gusto
Preparasion:
Mundar la kashka de la kalavasa, kortarla en kubos, lavarla, meterla en una kacharola i kuvrirla de agua. Meter a kozer. Adjustar mas agua si ay menester. La kalavasa deve kedar blanda ma no muy apurada. Despues ke ya se kozio, azerla puree, adjustar la sal (los ke lo dezean pueden adjustar una kucharika de asukar tambien). Entremientres kortar la fila en dos pedasos; polvorear la laja de la kuzina kon arina, tomar una metad de la fila, polvorearla kon arina por enriva tambien i kon un flecha avrirla asta ke toma la dimension de 20 x 30 sms. Entonses kortar la fila en tiras de 3 x 20 sms. (de manera ke se obtiene 10 tiras), meter un poko del gomo de la kalavasa en la punta de kada tira i arodearla komo un sigaro. Azer lo mizmo kon la otra metad de la fila. Kuando ya fue eskapado este lavoro, meter las filikas de kalavasa en un pyrex ke fue untado kon un poko de margarina i kozer en el orno ke ya fue kaentado de antes a 180° - 200°. Las filikas estan prontas kuando toman una kolor rosha.