gyuvech m.

גיבץ' - תבשיל ירקות ובשר

givech

203020

guvech

210250

yuvech

496890

GYUVECH
Materiales (4 - 6 porsiones):
4 pimintones
3-4 kalavasas delgadas
1-2 berendjenas
3-4 tomates
1 vazo de fasulya
3 safanorias
2 kucharas de ojas de apio pikadas
1 kuchara de prishil pikado
3 sevoyas
6-8 dientes de ajo
1 kuchara de polvo de supa de geyna
3 kucharas de azeyte
sal, pimienta i paprika a gusto
Preparasion: Mundar todas las vedruras mensionadas ariva, enshaguarlas bien i eskurrirlas. Kortar los pimintones pedasos, las kalavasikas en forma de dedos i las berendjenas en kubos i aresentarlas en un paylon kon las safanorias, los tomates kortados tajadas, el vazo de fasulya, los ajos i el apio i el prishil pikados. Aresentar todo en un paylon. De otra parte, abafar un poko la sevoya kortada tajadas godras kon la azeyte i mesklarla adientro del paylon. Adjustar sal, pimienta i paprika i kuvrir kon un vazo de agua. Tapar el paylon i meterlo a kozer sovre lumbre flosha 35-40 minutos. Entremientres dezazer el polvo de supa de geyna en medio vazo de agua i adjustarlo a la komida, gizar otros diez o vente minutos asta ke se apura bien. Se sierve kaente o yelado.
Los ke dezean komerlo kaente pueden meter el giuvech al orno por unos kinze minutos antes de servirlo.

GIUVECH DE PISHKADO
Materiales (8 porsiones):
1½ kilos de pishkado (palamida, kefal, tono, sazan)
2 kupas de arroz
6½ kupas de agua
6 pimintones (no fuertes)
6 tomates
1/2 kupa de azeyte
5 dientes de ajo pikado
sal i paprika a gusto
Preparasion: Eskojer uno de los pishkados indikados ariva, eskamarlo, kitar las grenyas, enshaguarlo bueno i kortarlo en puestas de dos a tres santimetros de godror. Mundar el arroz, enshaguarlo, eskurrirlo i kozerlo en kuatro kupas de agua, durante diez minutos en lumbre mediana. Kitarlo de la lumbre, enshaguarlo kon agua yelada i eskurrirlo. Meter el arroz en un tifsin de aluminium o pyrex de 35 sms. de diametro, echar por enriva la kupa de azeyte, aresentar los pimintones -sin las pipitas i kortados tajadas-, los tomates kortados en kuatro, el ajo machakado, el pishkado, sal i paprika. Adjustar dos vazos i medio de agua. Meter al orno, en temperatura mediana, por una ora i vente minutos. Servir kaente.