frito adj. & m.

מטוגן; טוגן; טיגון

PIMINTONES ASADOS, INCHIDOS DE KEZO I FRITOS
Materiales (6 porsiones):
12 pimintones vedres o kolorados
2-3 guevos
azeyte para friyir
Para el gomo:
150 gramos de kezo de kaldera
150 gramos de kashkaval rayido
150 gramos de otro kezo duro al gusto
2 yemas de guevo, bateadas
Preparasion: Asar los pimintones en el gril, boltandolos de todas las partes, ke se asen ma ke no se kemen. A mizura ke se van asando meterlos en una salatiera tapada o en una papelera kon la bokadura serrada. Desharlos yelar i entonses kitar el kuero de enriva, azer una kortadura al deredor de la kavesa i kitar las pipitas de los pimintones.
Mesklar bien bien todo el material del gomo i meterlo a repozar al frijider por una ora. Inchir los pimintones kon el gomo, metido bien adientro para ke no se fuyga en friyendo. Aresentarlos en una tava, taparlos i meter de muevo al frijider por una ora.
Meter azeyte en una sarten i empesar a kaentarlo sovre el gaz, entremientres batear los guevos, untar los pimintones i friyirlos de todas las partes. Se pueden komer kaentes o tivios.

ARROZ FRITO
Materiales (4 - 6 porsiones):
2½ vazos de arroz
6 kucharas de azeyte
3 vazos de kaldo o agua
1 kucharika de sal
Preparasion: Alimpiar, lavar i eskurrir los dos vazos de arroz. De otra parte, alimpiar medio vazo de arroz sin lavarlo. Friyirlo en una sarten kon 2 kucharas de azeyte, asta ke toma una kolor rosha. Kitarlo de la sarten i meterlo a parte. De la otra parte kaentar kuatro kucharas de azeyte en una kacharola, adjustar el kaldo o la agua i la sal i azer buyir. Adjustarle los dos vazos de arros lavados i eskurridos de antes. Tapar la kacharola i deshar buyir un minuto. Menguar la lumbre i deshar kozer asta la absorbsion del kaldo. Djusto antes de servir adjustar el arroz frito i mesklar bien.

KEFTES DE IZMIR FRITAS
Materiales (4 porsiones):
1/2 kilo de karne de vaka mulida
4-5 patatas
3 kucharas de azeyte
1 sevoya grande
3 tomates grandes i kolorados kon pulpa o
3 kucharas de tomatada
2 revanadas de pan sin krosta
3 kucharas de prishil pikado
sal i pimienta preta a gusto
Preparasion: Mesklar la karne mulida, la sevoya rayida o pikada muy minudo, la miga de pan mojada i esprimida ansi ke la sal, la pimienta i el prishil. Amasar todo esto bueno bueno, tomar pedasos de la grandor de una muez i kon las manos mojadas dalde una forma oval. De otra parte mundar las patatas, enshaguarlas i kortarlas tajadas de medio santimetro de espesura. Friyirlas i aresentarlas en un paylon. En la mizma azeyte friyir las keftes i meterlas enriva de las patatas. Tomar los tomates, kitarles el kuero, kortarlos en pedasikos de la grandor de una aviana, sufriyirlos en la azeyte ke kedo en la tava, adjustar un vazo de agua i buyir todo en una. Kuando buyo unos kuantos minutos, vaziarlo enriva de las keftes sin las patatas ke se topan en el tifsin, taparlo i desharlo gizarse unos diez a kinze minutos. Kuando se sierve, se meten las keftes enriva de las patatas i ensima de eyas la salsa. Kale servir kaente.

MEOYO FRITO
Materiales (4 porsiones):
1 meoyo de vaka
2 guevos bateados
1 plato de arina
azeyte para friyir
sal i limon a gusto
Preparasion: Kitar kon muncha delikateza la membrana delgada ke kuvre el meoyo. Desharlo en agua yelada una ora. Eskurrir i meter a kozer durante kinze minutos en un litro de agua buyendo i salada. Deshar yelar i eskurrir el meoyo en un tefsin burakado. Separar las dos metas del meoyo i kortarlas a lo ancho en tajadas delgadas, de medio sm. Untar kada tajada en arina i guevo bateado i friyirlas de las dos partes asta ke toma kolor rosha. Meter por ensima sal i si se kere un poko de limon. Se kome kaente o tivio i si se kere kon agristada (ver recheta en este livro).