almodrote/almodroti/almudruti m.

פשטידת חצילים אפויים בגבינה

almadrote

18470

ALMODROTE
Materiales (4 - 6 porsiones):
2 berendjenas
200 gramos de kezo rayido
2-3 guevos
sal
azeyte
Preparasion: Asar las berendjenas bien (preferablamente enriva de la flama del gaz i no en el orno, para ke tengan savor de asado). Kuando se ablandan bien de todas las partes, mundar debasho del chorro de la fuente, pikar i mesklar kon sien i sinkuenta gramos de kezo rayido, los guevos i la sal. Kuvrir el fondo de un paylon kon azeyte i kaentar bien. Kuando la azeyte ya esta bastante kaente aresentar adientro la meskla de berendjena, echar por enriva una aregada de azeyte i meter al orno no muy kaente (150°-180° C). Kitar del orno despues de 20 minutos i echar ensima el resto del kezo rayido i meter al orno otros 15 minutos.

ESFUNGATU SUNGATU DE BERENDJENA
(ALMODROTE AL UZO DE YUGOSLAVIA)
Materiales (6 - 8 porsiones):
3-4 berendjenas non grandes
1/2 vazo de azeyte
100 gramos de kezo rayido
2 guevos
1 revanada de pan sin krosta
un poko de sal
Preparasion: Asar las berendjenas sovre la flama del gaz, enshaguarlas, mundarlas, eskurrirlas bien i pikarlas sovre una tavla. Meterlas en un resipiente grande djuntos kon el medio vazo de azeyte, el kezo, los guevos bateados, la sal i la miga de pan mojada, bien esprimida i dizminuzada, i mesklarlo todo bien. Untar un paylon de azeyte, meterlo a kaentar. Kuando ya esta la azeyte kaente echar adientro el kontenido del resipiente, meterlo al orno ke ya fue kaentado de antes, abashar la temperatura a 180° - 200° i kozer media ora. Kuando esta pronto, se korta en pedasos i se sierve kon guevos haminados.