almendra f.

שקד; טבעת דמוית שקד

almendras de oro

מטילי זהב קטנים בדמות קליפות שקד

ARROZ KON PINYONES, ALMENDRAS, PASAS I KANELA
Materiales (4 porsiones):
2 vazos de arroz
4 vazos de supa de geyna o de aguas mesklada kon
4 kucharas de polvo de supa de geyna
1/2 kucharika de kanela
1/2 vazo de pinyones
1/2 vazo de almendras blankeadas
1/2 vazo de pasas sin kueshko, enshaguadas i bien sekadas
6 kucharas de azeyte
Preparasion: Gizar el arroz komo el arroz kon kaldo de tomat, ma en lugar de la tomatada adjustar la media kucharika de kanela a la agua del arroz. Despues ke el arroz ya esta pronto i se metio a repozar, friyir en una sarten las almendras, los pinyones i las pasas asta ke toman una kolor rosha, ke entonses se kitan de la azeyte. Aresentar el arroz en una pineta i garnizarlo kon las almendras, pinyones i pasas. Por mas fasilidad se puede meter el arroz en una fayancha, garnizarlo i konservarlo en el orno, kaentado muy flosho asta la ora de komer.

PISHKADO GIZADO KON MUEZ O ALMENDRA
Materiales (4 porsiones):
1 kilo de pishkado ke se puede azer puestas
(kefal, sazan, file, etc.)
3-4 dientes de ajo pikado
1 kuchara yena de prishil pikado
2 vazos de agua
2 kucharas de azeyte
1/2 vazo de muez o almendra mulida godro
1/2 limon
sal i pimienta a gusto
Preparasion: Alimpiar i enshaguar el pishkado, kortarlo en puestas i meterlo a eskurrir. Aresentarlo en un paylon. De otra parte, aprontar en una kacharola la agua, la azeyte, el ajo, el prishil, el sumo de limon, la sal i la pimienta i meter al gaz ke de un buyor o dos. Despues ke buyo, echarlo todo por enriva del pishkado i meter a gizar vente minutos. Antes de servir esparzir por enriva la muez o la almendra machakada.

MOGADOS DE ALMENDRA (MASAPAN)
Materiales:
1/2 kilo de almendra sin kashka
2 vazos de asukar pudra
1 guevo bateado
Preparasion: Buyir agua en una oya, echar adientro las almendras, tapar la oya, amatar la lumbre i desharlas uno poko de tiempo (5-7 minutos) asta ke se puede kitar el kuero de las almendras. Mundarlas, enshaguarlas i meterlas a sekar. Kuando se sekaron, molerlas i pasarlas a un resipiente, mesklarlas kon la asukar i el guevo. Amasar todo bien. Kuando la masa esta pronta, tomar un poko kon las manos ke fueron mojadas kon sumo de limon, dar la forma de un palo de la godror ke se kere i kon un kuchiyo kortar en forma de mogados. Aresentar en una tava i deshar sekar un dia o dos. Meter los mogados en una bocha serrada, ansi pueden turar mas de un mez. Se pueden guadrar en el frijider tambien.

MUSTACHUDOS DE ALMENDRA O MUEZ
Materiales:
1½ kupas de muez (o almendra) machakada
1/2 kupa de arina
1/2 kupa de asukar
1/2 kucharika de kanela
1 guevo bateado
asukar pudra
Preparasion: Mesklar i amasar todo muy bien. Tomar pedasos de la grandor de una muez, darles la forma de una bala o de una kulevrika, i arodearlos despues adientro de la asukar pudra.