fasulia (t.) f.

שעועית ירוקה, פאסוליה

PRASIFUCHI DE PAZI O ESPINAKA
Materiales (6 - 8 porsiones):
1 kilo de pazi o espinaka
4 guevos
2 patatas o
2 revanadas de pan
2 vazos de kashkaval rayido
sal a gusto
Preparasion: Lavar el pazi o la espinaka bien bien, kortar no muy delgado i echarlo adientro de un tendjere kon agua buyendo, eskaldar sinko minutos, sovre todo para ke se ablanden los tronchos. Eskurrir, enshaguar kon agua yelada i esprimir bien. En un resipiente mesklar bien el pazi, las patatas kochas i echas puree o la miga del pan mojada i bien esprimida, los guevos bateados, el kezo i la sal. Kuvrir el fondo de un paylon kon azeyte i meterlo a kaentar. Despues ke la azeyte esta kaente echar adientro el prasifuchi i aresentar bien de todas las partes para ke este igual. Echar por enriva una aregada de azeyte i meter al orno ke ya fue kaentado de antes a 180° - 200° por 45 minutos. El prasifuchi esta pronto kuando toma una kolor rosha i los bodres se despegan del paylon.

FASULIA
Materiales (4 porsiones):
1 kilo de fasulya
3 tomates
1 sevoya
1 kucharika de polvo de supa de geyna
1 kuchara de salsa de tomat
2 vazos de agua
1 kuchara de azeyte
sal a gusto
Preparasion: Enshaguar bien la fasulya, kortar las puntas, kitar los ilos de los bodres i kortarlas en dos o tres pedasos. Mundar la sevoya, kortarla minuda i meterla a abafar en lumbre flosha kon la kuchara de azeyte. Kitar el kuero i las pipitas del tomat, kortar minudo, meterlos a abafar kon la sevoya. Kuando ya se abafo bien, meter la fasulya en una oya, echar por enriva la sevoya i el tomat abafados, la tomatada dezecha en dos vazos de agua, djuntos kon la sal i la kucharika de polvo de geyna. Meter a gizar. Kuando buyo, abashar el fuego i deshar gizar avagar avagar sovre lumbre flosha, asta ke keda solo un poko de kaldo.