espinaka f.

תרד

esfongato de espinaka

מאפה תרד

spinaka

444840

ESFUNGATU SUNGATU DE BERENDJENA
(ALMODROTE AL UZO DE YUGOSLAVIA)
Materiales (6 - 8 porsiones):
3-4 berendjenas non grandes
1/2 vazo de azeyte
100 gramos de kezo rayido
2 guevos
1 revanada de pan sin krosta
un poko de sal
Preparasion: Asar las berendjenas sovre la flama del gaz, enshaguarlas, mundarlas, eskurrirlas bien i pikarlas sovre una tavla. Meterlas en un resipiente grande djuntos kon el medio vazo de azeyte, el kezo, los guevos bateados, la sal i la miga de pan mojada, bien esprimida i dizminuzada, i mesklarlo todo bien. Untar un paylon de azeyte, meterlo a kaentar. Kuando ya esta la azeyte kaente echar adientro el kontenido del resipiente, meterlo al orno ke ya fue kaentado de antes, abashar la temperatura a 180° - 200° i kozer media ora. Kuando esta pronto, se korta en pedasos i se sierve kon guevos haminados.

AVIKAS KON PAZI O ESPINAKA
Materiales (6 - 7 porsiones):
1/2 kilo de pazi o espinaka
2 vazos de avikas
1 kucharika yena de tomatada
1 kuchara no yena de polvo de supa de geyna
sal i pimienta a gusto
1/2 kilo de karne (si se kere)
Preparasion: Meter las avikas en mojo una noche entera; a la demaniana vaziar la agua, kuvijar kon agua limpia i darles un buyor para kitar los gazes. Kuando la agua buye, enshaguar las avikas por segunda vez i meterlas en un tendjere kuvijadas kon agua, adjustar el resto del material, en desparte de la pazi o la espinaka i de la sal. Si se kere se puede meter endjuntos tambien medio kilo de karne echa porsiones. Meter todo a gizar. Kuando las avikas ya se empesan a ablandar, adjustar la sal i la espinaka alimpiada o la pazi ke fue mundada, enshaguada i kortada a un sm. de anchura, inkluzo los ravos, i deshar gizar asta ke la karne, si fue metida, i las avikas se ablandan i se arefinan.

PAZI O ESPINAKA KON ARROZ
Materiales (2 porsiones):
1/2 kilo de pazi o de espinaka
1 sevoya chika
1/3 de vazo de arroz
1 tomat rayido
2 kucharas de sumo de limon
3 kucharas de azeyte
1 kucharika de polvo de supa de geyna
pimienta
Preparasion: Alimpiar bien la pazi o la espinaka, enshaguarla i eskurrirla, kortarla de un santimetro de anchura djuntos los ravos. Kortar la sevoya, meterla kon las tres kucharas de azeyte a abafar adientro de una kacharola. Adjustar la pazi o la espinaka, el arroz, el tomat rayido i la agua ansi ke la sal, el limon, la pimienta i el polvo de supa de geyna. Gizarlo todo asta ke el arroz se ablanda. Es una komida liviana i muy saludoza.

KEFTES DE PAZI O ESPINAKA KON KEZO
Materiales (20-25 keftes):
1/2 kilo de pazi o de espinaka
100 gramos de kashkaval o kezo rayido
2-3 guevos
1 vazo de arina o
2 revanadas de miga de pan moreno
1/2 vazo de leche
sal i pimienta a gusto
azeyte para friyir
Preparasion: Eskaldar la pazi o espinaka, eskurrirla i esprimirla, kortarla minudo djuntos kon los ravos i mesklarla kon el resto del material. Meter a kaentar la azeyte en una sarten, kuando esta bastante kaente, tomar kon una kuchara de supa de la meskla, darle la forma de una kefte i friyirla de las dos partes.

TAPADA DE ESPINAKA
Materiales:
Para la masa:
2-3 vazos de arina
1½ vazos de azeyte
3/4 vazo de agua
1 kucharika de sal
Para el gomo:
1/2 kilo de espinaka
100 gramos de kezo blanko
1/2 vazo de kashkaval rayido
1/2 kucharika de sal
Preparasion de la masa: Meter en un resipiente dos vazos de arina i adjustar la sal, azer en medio un foyo i vaziar la azeyte i la agua. Empesar a finyir la masa. Si esta muy blanda adjustar avagar avagar el treser vazo de arina (si ay menester se puede adjustar un poko mas de arina) asta ke se obtiene una masa suave. Deshar la masa repozar.
Preparasion del gomo: Lavar la espinaka, desharla eskurrir, meterla sovre un panyo limpio para enshugarla i embever el resto de la agua. Kortar la espinaka minudo, adjustar los kezos i la sal i mesklar bien.
Tomar la metad de la masa, avrirla kon una flecha sovre la laja de la kuzina ke ya fue polvoreada de antes kon arina, meter en un pyrex de 15 x 30 sms. de dimension, echar por enriva el gomo de espinaka i kezo i tapar kon la otra metad de la masa. Kon los dedos apretar bien los bodres para ke la tapada no se avra, azer ensima kortes de la grandor ke se kere, echar por enriva kashkaval rayido i meter a orno ke ya fue kaentado de antes a 180° - 200°. La tapada esta pronta kuando toma una kolor rosha i los bodres se despegan del resipiente.
Esta tapada se puede azer de pazi o de patata tambien. Kuando se aze de patata se apronta un gomo kon tres patatas eskaldadas ke fueron echas puree i en desparte de los kezos, un guevo tambien.

TAPADA DE ESPINAKA KON MASA MAL TOMADA AL UZO DE ESTAMBOL
Materiales (4 - 6 porsiones):
Para la masa:
2½ vazos de arina
200 gramos de margarina
(1 paketo)
1/3 de vazo de agua yelada
1 kuchara de vinagre
un poko de sal
Para el gomo:
1/2 kilo de espinaka o pazi
200 gramos de kezo rayido
1 guevo bateado
susam
un poko de sal, si el kezo no es salado
Preparasion de la masa: En un paylon ondo mesklar la margarina kon la arina i la sal asta ke la arina se aze granuda. Adjustar la agua mesklada kon el vinagre i amasar bien. Kuando la masa esta pronta, kuvrir kon un nylon i meter al frijider por diez o dodje oras, despues de lo kualo se puede emplear.
Preparasion de la tapada: Enshaguar bien la espinaka, eskurrirla, kortarla delgado al tanto ke se puede i deshar sekar sovre un panyo limpio, dandole bueltas de vez en kuando para ke se seke mas presto. Si es pazi se toma solo las ojas sin los ravos ke se meten a parte para gizarlos kon arroz.
Despues tomar la metad de la masa, avrir kon una flecha sovre la meza polvoreada de arina i aresentar en un paylon kon bodres altos, ke fue untado kon azeyte o margarina. Mesklar la espinaka kon el kezo, meter por enriva i tapar kon la otra metad de la masa ke fue avierta komo la primera metad. Kon los dedos apretar los bodres de la masa, de enriva i de debasho para ke la tapada no se avra. Untar por ensima el guevo bateado, esparzir un poko de susam i meter a orno kaentado de antes a 180° asta ke toma una kolor rosha.
Jeneralmente esta tapada se sierve para dezayunar, akompanyada kon guevos haminados, yogurt i a vezes kon un vaziko de raki.

GUEVOS KON ESPINAKA
Materiales (4 porsiones):
1/2 kilo de pazi o espinaka
4 guevos
1/2 vazo de agua
2 kucharas de azeyte
sal i pimienta a gusto
Preparasion: Mundar, enshaguar i kortar la espinaka delgada, meterla a kozer en lumbre flosha en una sarten kon agua, azeyte, sal i pimienta. Kuando se kozio, avrir por enriva los kuatro guevos. Si se dezea ke las yemas de los guevos sean duras, komo guevos haminados, se tapa la sarten durante el gizado i si a la kontra se kere ke las yemas sean komo el guevo rifidan, se deshan sin tapar.