dulse m.

ריבה, קונפיטורה, מרקחת

apregonar la dulse

להכריז על ''התקופה'' (חילוף העונה); בהשאלה: הטלת איסור מסיבות חסרות טעם

dulse blanko

ממרח מתוק פופולרי בפסח

dulse para las novias/dulse spesial

מרציפן לבן

kortar la dulse

להכריז על סוף ''התקופה''

la dulse f.

'התקופה'' (חילוף העונות)

dulse de sereza

מרקחת דובדבנים

dulsuria

134410

DUKADIKOS DE KALAVASA
Materiales (2 - 3 porsiones):
1/2 kilo de kalavasas largas, no muy delgadas
200 gramos de yogurt
2-3 dientes de ajo ahajados
sal
azeyte para friyir
Preparasion: Rayer la kashka de las kalavasas i enshaguarlas. Kortarlas en forma de dukados de medio sm. de anchura i friyir asta ke toman una kolor rosha. Aresentar los dukados en un paylon, mesklar el yogurt kon los ajos i la sal, echar por enriva i servir. Se puede eskudiar tambien a kada uno su porsion de dukadikos i meter despues el yogurt por enriva.

DULSE DE BIMBRIYO I MANSANA
Materiales:
1 kilo de bimbriyo
3 mansanas agras
2¼ vazos de asukar
1/2 vazo de agua
asukar pudra
Preparasion: Lavar bien los bimbriyos, kortarlos en kuatro i kitarles el korason. Azer lo mizmo kon las mansanas. Meter las frutas en una kacharola, kuvijadas kon agua i kozer a fuego moderado asta ke las frutas se ablandan. Eskurrirlas i pasarlas por un kolador. Meter la asukar i el medio bazo de agua en otra kacharola, kozer a fuego moderado asta ke se forma un sirop espeso. Adjustar la puree de las frutas al sirop i kozerlo todo asta ke el dulse esta a punto. Meter una oja de papel de aluminium sovre una tavlá i espandir el dulse de una espesor de tres sms. Desharlo yelar i kortarlo en mogados. Despues deshar el dulse sekarse vente i kuatro oras, echar por enriva la asukar pudra i guadrarlo en resipientes serrados ermetikamente.

DULSE DE FRAGOLA
Materiales:
1 kilo de fragolas grandes
1 kilo de asukar
50 gramos de almendras blankeadas
1 limon
Preparasion:
Kitar las ojikas de las fragolas, enshaguarlas bien tres o kuatro vezes sin ahajarlas i deshar eskurrir. De otra parte, meter en una kacherola la asukar, kuvijarla kon agua i meter a buyir. Kuando el sirop se izo espeso echar adientro las fragolas, desharlas ke den dos o tres buyores, abashar la flama i deshar serka de una ora en la lumbre, asta ke el sirop se aze espeso de muevo. Un poko antes de abashar del gaz, adjustar el sumo de un limon i las almendras blankeadas. Entonses abashar de la lumbre, kitar la eskuma blanka ke se formo enriva i kuando se yelo un poko meterlo en bocha limpia i seka. Kuando se yelo enteramente se serra la bocha bien bien i se guadra en lugar fresko.

DULSE DE IGITOS VEDRES FRESKOS
Materiales:
1 kilo de igos vedres, chikos i freskos
3 vazos de asukar
3 vazos de agua
1 kuchara de agua rozada o
1 kucharika de vanilya
1/2 limon
klavos de komer o almendras blankeadas
Preparasion: Kale eskojer igitos chikos, un poko duros, kon la kashka liza i limpia. Enshaguarlos bien bien, meterlos a buyir unos kuantos minutos kon la asukar, la agua i el sumo de un medio limon, asta ke el likido se aze un poko espeso. Kitar del gaz i deshar los igos adientro del sirop la noche entera. Al dia meter a buyir de muevo, esta vez asta ke los igos se ablandan. Kon una kuchara burakada kitar los igos del sirop, aresentarlos en un plato yano i grande, asta ke se yelan. Kuando se yelaron meter a kada igo, en la parte de debasho, un klavo de komer, ke da un muy buen aroma o una almendra blankeada. Aresentar los igos en una bocha de vidro i vaziar el sirop enriva. Si el sirop esta kaldudo, meter a buyir unos kuantos minutos asta ke se aze mas espeso. Si se kere, vaziar por ensima de los igos agua rozada i serrar bien.

DULSE DE KAYISI
Materiales:
1 kilo de kayisi
1 kilo de asukar
1 limon
Preparasion: Enshaguar bien los kayisis, kitarles el kueshko en aziendo un korte no muy ondo en medio, para ke el kayisi kede entero i no piedra su forma. En un paylon meter el medio kilo de asukar, adjustar los kayisis i taparlos kon el resto de la asukar. Adjustar el sumo de un limon i meter de un lado unas dos oras, asta ke la asukar se dezaze mas o menos en la agua ke sale del kayisi.
Despues de dos oras, meter el paylon sovre lumbre fuerte. Preparar un tefsin burakado kon un paylon debasho. Kuando se ve ke el kayisi ya se kozio, kitarlo kon una kuchara burakada i meterlo en el tefsin burakado para ke eskurra la asukar. Kuando ya se kitaron todos los kayisis, deshar el sirop en la lumbre ke se apure; adjustar el sirop ke eskurrio del tefsin burakado i desharlo buyir asta ke viene en punto, kere dizir ke kuando se toma del sirop kon kuchara, el likido deve ser espeso i no kaldudo.
Los kayisis se kitan kon delikateza, sin desformarlos, del tefsin burakado, se aresentan en un paylon i se echa por enriva el sirop. Solo despues ke se yelo todo, se mete enriva un panyo delgado, komo un tul, i se desha tres o kuatro dias en el sol, en boltanto los kayisis de vez en kuando para ke embevan el sirop de todas las partes. Despues de esto se aresentan en una bocha ke se serra bien.

DULSE DE KONDJA
Materiales:
6 kondjas grandes de kolor bordo
3 vazos de asukar
2-3 vazos de agua
1 limon
Preparasion: Kitar los petales de las kondjas, enshaguarlos bien i eskurrirlos en un tefsin burakado. Meter los petales en una kacharola, adjustar la asukar i la agua, meter sovre la lumbre i deshar buyir kinze o vente minutos mesklando de vez en kuando, asta ke los petales se ablandan i piedren un poko de sus kolor. Sinko minutos antes de abasharlos de la lumbre, adjustar el sumo de un limon. Kuando esta pronto, deshar yelar i meter en una bocha. Este es un dulse muy pastozo i kon guezmo muy alavado.

DULSE DE MANSANA
Materiales:
1 kilo de mansanas agras
1 kilo de asukar
2 kupas de agua
1 limon
Preparasion: En primer lugar, buyir la agua kon la asukar asta ke se obtiene un sirop no muy espeso. Entremientres mundar las mansanas i rayerlas (kada mansana ke se raye se deve esprimir i echar al sirop ke esta buyendo, para empidir su eskuresimiento). Kuando todas las mansanas ya fueron adjustadas al sirop se desha kozer sovre lumbre mediana. El dulse esta pronto kuando una gota del sirop se enteza, imediatamente despues ke se echa sovre un plato. Entonses se adjusta el sumo del limon, se da otrun buyor i se abasha de la lumbre.

DULSE DE MANSANA
Materiales:
1 kilo de mansanas agras
1 kilo de asukar
2 kupas de agua
1 limon
Preparasion: En primer lugar, buyir la agua kon la asukar asta ke se obtiene un sirop no muy espeso. Entremientres mundar las mansanas i rayerlas (kada mansana ke se raye se deve esprimir i echar al sirop ke esta buyendo, para empidir su eskuresimiento). Kuando todas las mansanas ya fueron adjustadas al sirop se desha kozer sovre lumbre mediana. El dulse esta pronto kuando una gota del sirop se enteza, imediatamente despues ke se echa sovre un plato. Entonses se adjusta el sumo del limon, se da otrun buyor i se abasha de la lumbre.

DULSE DE KASHKA DE SIDRA
Materiales:
3 sidras grandes
3/4 kilo de asukar
4 vazos de agua
2 limones
Preparasion: La kashka de la sidra es muy amarga. Para kitarle la amargura ay menester de un proseso ke tiene unas kuantas fazas. Por empesar, rayer un poko las kashkas, kortarlas en gajos i meterlas en un resipiente kon agua ke se troka unas kuantas vezes. Despues en una oya meter a buyir kuatro vazos de agua kon las kashkas i una preza de sal, de sinko a diez minutos. Abashar de la lumbre i deshar yelar. Trokar la agua i buyir de muevo unas kuantas vezes asta ke la agua ya no es mas amarga. Entonses eskurrir bien i esprimir las kashkas ma no deformarlas. Preparar el sirop en metiendo a buyir la asukar, la agua i el sumo de los dos limones. Kuando el sirop buye i aze fushkas grandes se adjustan las kashkas i se desha ke torne a buyir asta ke las kashkas se ablandan; entonses kitarlas kon kuchara burakada i aresentarlas en bochas de vidro. Deshar el sirop buyir un poko mas para ke devenga mas espeso. Entonses abasharlo de la lumbre, deshar ke se yele un poko i echarlo enriva de las kashkas de sidra. Serrar bien los bokales kuando el dulse esta yelado.
Si no ay sidra, este dulse se puede azer de pomelo tambien.

DULSE DE UVA BLANKA
Materiales:
1 kilo de uva blanka
1 kilo de asukar
1 vazo de agua
1 limon
Preparasion: En un resipiente ondo meter a buyir la agua kon la asukar. Kuando empeso a buyir i el sirop se izo un poko mas espeso, meter adientro la uva, bien enshaguada, una a una en kitandoles todos los palos. Deshar buyir sin mesklar. Para ver si el dulse esta pronto, se mete una gota del sirop en un plato seko. Si la gota no se espandio, el dulse esta pronto. Entonses adjustar el sumo de un limon, deshar buyir otros dos minutos i abashar de la lumbre. En una bocha seka meter una kuchara del dulse para ke la bocha se kaente avagar avagar i no se rompa (es importante de meter el dulse en la bocha en lo ke esta ainda kaente, de esta manera se forma enriva una tela ke prezerva al dulse de mofo). Despues se mete el resto i no se serra asta ke se yela.

DULSE DE VISHNA
Materiales:
1 kilo de vishna
1½ kilos de asukar
1 limon
Preparasion: Kitar los palikos de la vishna, enshaguarla i meterla en un tefsin burakado. Kon muncha delikateza kitar los kueshkos. Meter la asukar en un resipiente, tapar kon agua i meter a buyir sovre lumbre fuerte. Kuando la asukar vino apunto (para ver si la asukar vino a punto, se toma una gota i se mete sovre el dedo i se desha eskurrir. Si no eskurre en el momento i kaye avagar avagar es ke ya vino a punto), echar la vishna adientro de la asukar, buyir unos sinko minutos i abashar de la lumbre. Deshar repozar kuatro o sinko oras para ke la vishna trave la asukar. Meter de muevo sovre lumbre no fuerte asta ke la asukar se apura i viene de muevo a punto. Antes de abashar de la lumbre, adjustar el sumo de un limon i deshar buyir un poko mas. Kon una kuchara kitar la eskuma ke se formo ensima i kuando se yelo un poko, meter el dulse en bochas. Kuando el dulse se yelo enteramente tapar las bochas i meterlas en un lugar yelado.