senyal m.

Sign, signal

senyales

איתות

Lagrima en el ojo, sinyal de buen korason

-''esto ke tu me dishistes olgara saver senyal'' (Toledo, Koplas de Yosef)

ken puede abasteser por alavar tus senyales (Keter Malhut, Mahzor Saloniki 1876)

i sovre sus bayrakes kada konpanya tiene su senyal (Keter Malhut, Mahzor Saloniki 1876)

kuanto a El ay para ke sea senyal komo El es uno i krio kriansas para ke sean testiguos sovre su barragania i sovre la grandeza de su reino (Hovot 'ha-Levavot, Const. 1569)

a punto se avrio la tierra i kayeron eyos i sus livros abasho no kedo de eyos ninguna senyal de eyos (manus. Minhat Ani, Yerushalayim 1880)

en siendo yo en la edad de 13 anyos, se topava un haham grande en el dor ke se entendia en las senyales de la mano (Shivhe Hayim Vital, Sal. 1892)

i le dio a el todas las senyales ke en mi (Shivhe Hayim Vital, Sal. 1892)

i en medio del mizbeah avia una senyal kolorada komo un ilo ke lo arrodeava al mizbeah ? para apartar entre las sangres (Meshivat nefesh I , Const. 1743)

I si la mancha klara se estuviere en su lugar, i no se uviere estendido en el kuero, sino ke esta eskura, inchasion es de la kemadura, i el saserdote lo dara por limpio; porke senyal de la kemadura es. (Biblia, Const. 1873)

La manyanada esklaresio i el aire kedo de su ravia, i mis ojos se espandieron a la facha de la mar por bushkar a la nave i mas ningun senyal de eya no se vido. (Asolado en la izla, 1881)

Kuando el senyal fue dado ke todo ya estava pronto i ke todos devian retirarsen para atras de espanto de algun aksidente (Leonidas el nadador, 1911)

Le mankava de dar tres puntos de la parte siedra de la kavesa i sin avlar el izo senyal al doktor, ke ya estava pronto. (El muerto ke esta bivo, 1912)

Pavlo no respondio, ma el izo senyal kon la kavesa komo por dezir ke ya estava bien de akordo i aboko la kavesa para ke se la kortaran. (El muerto ke esta bivo, 1912)

su vista era terrivle i de sus grandes ojos salidos por afuera se via senyales de lokura (El rey i el shastre, Yerushalayim 1903)

su vista era terrivle i de sus grandes ojos salidos por afuera se via senyales de lokura (El rey i el shastre, Yerushalayim 1925)

Valker konosia algunas kartas, metia senyales en otras, mesklava el las kartas en pozando a su plazer kada karta a su lugar, i de esta forma el pervenia a ganar akea noche (El prove doktor, Const. 1904)

las karas de la jovene dama de kompanyia se enkoloradesieron; malgrado eya, bolto sus ojos verso el konte en senyal de rekonosensia (La Epoka, Sal. 1900)

senyales semejantes de una sierta buyor se sienten entre las klasas bashas de los musulmanos en Sirya, en Palestina i tambien en Edjito (El Tiempo, Const. 1877)

El tribunal adereso la demanda al patriarka Avraam. Este ultimo respondio: Visto ke la persona en kestion tenia todos los senyales de Djudio i ke ya fue admitido en el paraizo, el no puedia restituirlo por no azer un exempio. (El Djugeton, Const. 1908)

i en examinando a este konvertido, vido ke el yeva los senyales de un simple djudio, i ansi el pudo entrar adientro de gan eden. (El Djugeton, Const. 1908)

Bien entendido ke izieron ge'hinam de arriva abasho, bushkaron en todas las kalderas, examinaron todos los rejistros, telefonearon a tahtision, demandaron a todos los departamientos, telegrafiaron a todas las imprimerias, bushakaron en los klubes, braserias, meanes, i no uvo ninguno ke supiera dar sus senyales (El Djugeton, Const. 1908)

I ansi, ayi onde kreian de topar una buena senyal, enkontran una buena borrachona (Matador de kriaturas, Yerush. 1908)

Una otra vez, un manseviko de una vista poko novle, se keda komo tomado a la vista del matado. Despues el reviene en si, mira kon mas atension adientro del vidro, aze entre si senyales kon sus ojos, mira mas mejor ainda I en fin aziendo unos djestos kon los lavios el se retira de ayi (Matador de kriaturas, Yerush. 1908)

izo senyal a una otra mujer ke avia ainda en la karrosa i todas dos entraron adientro de kaza (Muerta de mala muerte, Yerush. 1911)

Ke senyal ay a mi por darte a ti? (Sipure Noraot,1885)

Si keres por andarte a tu sivdad, a lo menos desha a mi una senyal (Sipure Noraot,1885)

Le disho: Si no te kreyes de mi, dita senyal tienes en tus karnes. (Kuentos de Yerushalayim, 1923)

Refua para bo'hak i para yalefet ke es para barruga o para senyal ke le kedo de tinya o de lepra i de sarna ke akeya senyal ke le keda se yama bo'hak en lashon a-kodesh. Para ke le pase ke se meta zera de onbre i se melezina (manus. Papo, Sarajevo 1840)

Refua para holi de puntos de los pechos de las mujeres se untara la mujer su kara la tarde i la manyana en la tarde ke se unte su kara kon azeite de guevos i en la manyana ke se lave kon agua kayente i kon salvado i ke se uze ansi un poko de tienpo se le sarlan de las karas las senyales de las barrugas o manchas (manus. Papo, Sarajevo 1840)

para tornar lugar dela ferida en vista de karne i para ke no kede mancha ni senyal: halav 'ha-hamorim limpiara lugar dela ferida i lo aze akel lugar komo resto de vista de karne de el kuerpo komo la primeria (manus. Papo, Sarajevo 1840)