semejante adj.

Similar, similar, compatible

dezovedese a padre i madre: semejante komposto es muy feo (Nehama)

viene en ayuda a la sekreta a famiyas deskaidas: semejantes fechos son de alavar (Nehama)

yevo un vestido semejante al tuyo (Nehama)

koza semejante no tiene akontesido (Moscona)

Ma en semejantes amores tienes poka shansa, (Papo, Navot)

no te vo ayudar nunka en semejantes males! (Papo, Navot)

i por esto fue tadrando en su kriyansa semejante a ken kere azer una koza muy estimada (Meam Loez Bereshit)

Si kere dar Yesurim ala alma i estar en la Suka, en lo ke esta aziendo luvia, o ke esta muy yelado i semejante, este es yamado manko de Konsendia, (El Gid,1967)

i semejante a estas avlas arregli en ladino (ve-'Hohiah Avraam, Izmir 1877)

El kompozitor no topa unos biervos mas konvenivles para darse a entender lo ke kere dezir ke kon unos eshemplos semejantes (Meam Loez Kantar de los kantares, Const. 1899)

No se permete ningun savio de kompozer semejantes poezias ke solamente por un eskopo muy importante (Meam Loez Kantar de los kantares, Const. 1899)

todos los atkuendos (kap) ke son: payla, kuchiyos, mezikas, palos redondos, i semejantes no deven tener ningun burako o indriz (aralik) (El gid, Istanbul 1967)

ama es el provecho semejante al kezo ke se mete en la ratonera, ke a la savor del kezo se entra el raton ama le sale por los ojos ke le viene la muerte detras (Pele Yoets I, Viena 1870)

Semejante es mi kerido al korso, o al kavrito de los siervos (Biblia, Const. 1873)

E dixoles: locos, semejantes de vuestros dioses que estan colgados de vuestros pescueҫos, e estan muy lexos de vuestros coraҫones; (Midrash aseret adibrot, manus. Sig 15)

En su longa vida de kortezana, nunka avia pensado ke un dia arrivaria onde su ija le pozaria semejante demanda . (Rolando i Eleonora, 1953)

Bianka, esfavoresida de sentir semejantes palavras, aferro las manos de Emperia.. (Rolando i Eleonora, 1953)

Tres sakos de klavos de fierro, un martio, dos dekieles, una esmoladera, i resto de kozas semejante (Asolado en la izla, 1881)

Komo ke ay? No estas viendo su ermozura, su kuero kemado, estos muskles fuertes en sus brasos es un grande plazer de ser abrasada por un ombre semejante. (Luz de Israel, 1985)

Puede ser ke kreia ke yo era semejante a el, malorozamente, no se ver los kodreros a traves de las kashas. (El Princhipiko, 2010)

A la okazion de la imigrasion kontinuala i aktuala de Turkia en Amerika se kalkula oy una kuenta de serka 5 mil djudios espanyoles de Turkia aki en Nueva York i otra semejante kuenta se kree toparse en todos los Estados Unidos … ke vienen la mayor parte kreendo amijorar sus estado material aki en Amerika (La Amerika 1910)

El governo otomano tomo las mezuras menesterozas por ke no se repeten semejantes aksidentes. (La Amerika 1910)

En efeto el kayo en manos de tres personas ke no tienen ninguna eksperiensa en semejante lavor (La Boz del Puevlo, 1918)

Exempios semejantes no son raros en nuestra kolonia i esto no lo dezimos por mostrar nuestra retorika ma para atirar la atansion de el puevlo sovre el fato ke mientres ke sefaradim estan ambrientos en New York (La Boz del Puevlo, 1918)

el governo imperial deklara de muevo ke siempre kon sus djenerozos intesiones non keria nunka ver unas semejantes piedritas (La Epoka, Sal. 1875)

i ya es provado de munchos anyos kuanto un djornal semejante ayuda al amejoramiento de una nasion (La Epoka, Sal. 1875)

yo aborresko estas kozas i fuygo de munchas milias de kamino kuando siento semejantes kozas (El prove doktor, Const. 1904)

unos disheron filozofikamente ke no vale la pena de eskrivir en la gazeta semejantes kozas ke no interesan al puevlo (La Epoka, Sal. 1900)

senyales semejantes de una sierta buyor se sienten entre las klasas bashas de los musulmanos en Sirya, en Palestina i tambien en Edjito (El Tiempo, Const. 1877)

Nozotros nos adresamos por esto a todos los lavoradores ke pasan por la Lishkat Avoda afin ke ekspliken a sus kompanieros ke deven de abstenersen de agresiones semejantes ke danyan sus intereses i los intereses de todos los lavoradores. (Manifesto de Lishkat a- Avoda, Tel Aviv 1950)

la metafora dize ke una koza aze lo ke otra sola puede azer; la komparasion dize ke una koza es semejante a otra (La eskalera, Const. 1888)

Dos de los valis respondieron ke no tienen remarkado koza semejante. (Sipure Sefarad)