Si en servisio de los sakrifisios fue abandonado
I si muestro santuvario fue ruinado
El puevlo de Yisrael no sera nunkua ekstreminado
Por l'amor de muestro Patriarka Avraam el menerado
Su devuamiento o Dio rekonoseras )
De su finelidad solo tu te akodraras )
Kuando le dishites toma a tu ijo i lo degoyaras ) x2
I su sangre sovre el altar destelnyaras )
Presto korio Avraam por aprontar a su ijo
Ke su alma kon su alma eran un fuerte atadijo
Apronto la lenya i el fuego sigun el Dio kijo
Sin ke Ishak supiera el eskopo de este rijo
Lijero komo el korso se sometio Ishak a su komando
A su padre le disho tu te as olvidado
El fuego i la lenya ya estamos yevando
Onde esta el animal ke seria degoyado
Entonses su padre por no aturvarlo
Le respondio a su ijo por kontentarlo
El Dio aprontara el animal por degoyarlo
Mozotros devemos kaminar i esperarlo
Padre i ijo kon muncho devuamiento
Kontuniaron sus kamino kon pureza i santifikamiento
Azer la veluntad del Dio era sus unikos pensamiemto
Traversaron montes kon apresuramiento
Kuando eyos vieron de la parte de Oriente
Ke una nuve abashava i estasionava en el monte
Aprontaron los lenyos kon un amor ardiente
Por azer la veluntad de Dio Potente
Kuando Ishak entendio ke el devia ser sakrifikado
Le disho a su padre en edad muy avansada
Padre mio, atame komo el kodrero bien asegurado
No seas piadozo aunke so tu arregalado
El Dio m'eskojio i me kijo mereser
No puedemos kontra el, devemos obedeser
La fin de el ombre esto deve de ser
Murir i d'entre los bivos despareser
Kon fuersa i koraje obedesiendo a sus Dio
Ato Avram a su ijo ke a los sien anyos le nasio
Enriva de los lenyos lo espandio
I el fuego en el altar ensendio
Su garganta espandio sin izitasion
I su padre se aserko kon yena intision
Por degoyarlo i ofreserle alsasion
I el Dio lo mirava kon antansion
Lo ke izo este padre asen kantar
Sin ninguna piadad a su ijo iva kortar
Para ayegarlo al sakrifisio sovre el altar
Por ekzekutir el orden de su Dio i respektar
Kuando Avraam metia el kuchiyo en la garganta
Una boz del sielo le yamava a boz alta
"Avraham! Avraham! no tokes al mansevo, ya basta
Degoya este barves i a Ishak dezata
Este animal sea su remplasamiento
Destinado para esto diste su nasimiento
Ya konosi la pureza de su sentimiento
Su fidelidad i su devuamiento
La memoria de este akto sea o Dio delantre de tu siya
Padre i ijo ke ovedesieron kon grande enerjia
No olvides su aliansa kon la nasion djudia
Oye a muestras orasiones en este dia
Tus ijos fideles te yaman kon abatision
Este akto importante sea su mamparasion
Resgata kon tus piadades a tu nasion
Ke espera siempre tu salvasion
(otras 9 estrofas) |
פיוט הסליחות "אם אפס רובע הקן" בלאדינו |