relijión/religión f.

דת, אמונה

La siensia sin relijion es kosha, la relijion sin siensia es siega

Ensenyadles la religion djusta, arvol de vidas, (Papo, Navot)

I porke non abandono su relidjion es viktoriozo en kada kombate i gerra. (La segunda Ester, 1911)

sus modestia, sus atamiento a la relijion / damas i senyores formavan una fuerte lejion (manus. Vitali Varon, Const. 1948)

Sino ke para akeos ke deja ya arrivaron a un estudio alto de la ley, i esta firme en su relijion en sus kualidades, (El Gid,1967)

Los enemigos de Yisrael - los antisemitas - se burlan kon menospresio de este puevlo no mas ke por kavza de su relijion (Meam Loez Kantar de los kantares, Const. 1899)

Israel si kontinua a vivir dientro delos otros puevlos en las kuatro partes del mundo es grasias a su livro, es grasias a su relijion (manus. Vitali Varon, Const. 1948)

en akel momento, el penso salvar a lo manko el livro, la relijion. El topo el remedio de salir de Yerushlayim i de aderesarse direktamente al emperador demandandole la otorizasion de avrir una eskola en Yavne, un kazaliko serka de Yerushalayim (manus. Vitali Varon, Const. 1948)

munchos son los ke bushkaron a vengarsen ma kuando eyos no parvinieron bushkaron a azerlos desbarasar de su relijion (manus. Vitali Varon, Const. 1948)

Keda de apartener a la komunidad, el ke pasa a una otra relijion i ke deklara no kerer ser mas konsiderado komo judio. (La boz de oriente, 1931)

El djudio nunka no esta seguro de su vida i averes a kavza del antisem[iti]zmo armado soto el fanatizmo de las relijiones del kristianizmo (La Amerika 1910)

El sionizmo kere ke los djudios del mundo en lugar ke enrikesan las tierras del kristianizmo, ke sea enrikesido el puevlo otomano onde el sentimiento de relijion non es del karakter del kristianizmo (La Amerika 1910)

Si el papa de Roma avlara por igualidad en toda la umanidad sin diferensia de rasa i relijion, puede ser puedra ganarse algo de respekto i konsiderasion (La Amerika, 1917)

no ay dia onde munchos judios no se konvertan ala relijion del paes (El Tiempo, 1896)

de el Dio ke me la mando a esta, damelda ak?, yo la perfijare i la engrandesere a la relijion judia i kuando viene el padre, kolay sera. (La famoza kantadera, Tel Aviv 1950)

Por la prima vez en mi vida, una ninya me plazio tanto i konbino ke eya sea de otra relijion (La Ermoza Alis, Tel Aviv 1954)

Si yo tomo a esta ija eya konservara su relijion, los uzos i kostumbres de su famiya i de su nasion (La Ermoza Alis, Tel Aviv 1954)

Yo no tengo ninguna relijion, no so kristiano, no so del todo fanatiko (La Ermoza Alis, Tel Aviv 1954)