ויהי אחרי מות יצחק ויעזוב את כל מקנהו ואת קניינו ואת כל אשר לו לבניו.

ויאמר עשו אל יעקב: "הבה נא את אשר הניח אבינו אלינו ונחלקהו לשניים ואני אבחר."

ויאמר יעקב: "כן נעשה."

ויקח יעקב את כל אשר הניח להם יצחק בארץ כנען, את הבהמה ואת העושר ואת כל הרכוש ויחץ אותו יעקב לשניים לפני עשו ובניו. ויאמר אל עשו: "הנה כל אלה לפניך. עתה בחר לך מהם את החצי אשר תקח לך."

ויאמר יעקב אל עשו: "שמע נא אחי לאשר אדבר אליך לאמור: "יי אלהי השמים והארץ דיבר אל אבותינו אברהם ויצחק לאמור: לזרעך אתן את הארץ הזאת לרשתה עד עולם. עתה הנה כל אשר עזב אבינו לפניך והנה כל הארץ לפניך – בחר לך מהם את אשר תחפוץ: אם את כל הארץ תחפוץ קחנה לך ולבניך עד עולם, ואני אקח את העושר הזה. ואם את העושר תחפוץ קחני לך, ואני אקח את הארץ הזאת לי ולבני לרשתה עד עולם."

ושם היה נביות בן ישמעאל עם בניו בארץ. וילך עשו ביום ההוא ויתייעץ עמו לאמור: "כזה וכזה דיבר אלי יעקב וכזאת וכזאת השיבני. עתה עוצה עצתך ונשמענה."

ויאמר אליו נביות: "מה הדבר הזה אשר ידבר יעקב אליך! הנה כל בני כנען יושבים בארצם לבטח ויעקב אמר יירשנה עם זרעו כל הימים. עתה לך לך ולקחת כל עושר אביך ועזבת את יעקב אחיך בארץ כאשר דיבר."

ויקם עשו וישב אל יעקב ויעש כל אשר יעץ עליו נביות בן ישמעאל. ויקח עשו את כל העושר אשר עזב יצחק את הנפש ואת הבהמה ואת המקנה ואת הרכוש ואת כל העושר, לא נתן ליעקב אחיו ממנה מאומה. ויעקב לקח את כל ארץ כנען מנחל מצרים עד נהר פרת ויקחנה לאחוזת עולם ולבניו ולזרעו אחריו עד עולם. וגם מערת המכפלה אשר בחברון אשר קנה אברהם מאת עפרון לקח יעקב לאחוזת קבר לו ולזרעו עד עולם מאת עשו אחיו. ויכתוב יעקב את כל הדברים האלה בספר המקנה ויחתום ויעד עדים נאמנים על כל אלה. ואלה הדברים אשר כתב יעקב בספר לאמור: "ארץ כנען וכל עריה החתי והחיוי והיבוסי והאמורי והפריזי כל שבעת גויי הכנעני מנהר מצרים עד נהר פרת, וכל עיר חברון קריית הארבע והמערה אשר בה – את הכל קנה יעקב מאת עשו אחיו במחיר לאחוזה לו ולבניו ולנחלה לזרעו אחריו עד עולם.

ויקח יעקב את ספר המקנה ואת החתום המצוה והחוקים ואת ספר הגלוי ויתנם בכלי חרש למען יעמדו ימים רבים ויתנם ביד בניו.

ועשו לקח את כל אשר הניח אביו אחרי מותו מיד יעקב אחיו. ויקח את כל הרכוש מאדם ועד בהמה מגמל ועד חמור משור ועד שה מכסף ועד זהב אבנים ובדולח וכל העושר אשר ליצחק בן אברהם. לא נותר דבר אשר לא לקח לו עשו מכל אשר הניח יצחק אחרי מותו. ויקח עשו את כל אלה וילך אל ארץ שעיר החורי הוא ובניו אל מקומם מפני יעקב אחיו ובניו וייאחז עשו בתוך בני שעיר ולא שב עשו ארצה כנען מהיום ההוא והלאה.

ותהי כל ארץ כנען לבני ישראל לנחלה עד עולם. ועשו וכל בניו ירשו את הר שעיר.

ס' הישר, 93-92. – גינצברג ה, 321-320 (316). – א"י ג, 203-200.